Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН РИМЛЯН-ВЛАКЛАН КОЛТЫМО СЕРЫШЫЖЕ

Глава 3

9-20 Чын ыштыше иктат уке. 21-31 Ӱшанымаш гоч чыныш лекмаш.

1Тыгеже иудей лияш мо дене сайрак, да пӱчмаш могай пайдам пуа?2Чыла шотыштат сайже шуко‚ эн ондак тиде: Юмын шомак иудей-влаклан ӱшанен пуалтын.3Южышт ӱшанле лийын огытыл гынат‚ нунын ӱшанле огыл улмышт Юмын ӱшанле улмыжым укешке луктеш мо?4Уке! Еҥ-влак чылан шояче лийыт гынат‚ Юмо чын. Возымо:
«Ойлымет годым Тый чыныш лектат,
Тыйым судитлыме годым сеҥет».
5Мемнан чын огыл ыштымына Юмын чын ыштымыжым утларак раш ончыкта гын‚ мом каласена? Юмо шыдыжым ончыктымо дене чын ок ыште манын кертына мо? Мый айдеме семын ойлем.6Уке! Тыге гын‚ Юмо кузе тӱням судитлен кертеш ыле?7Но Юмын чынже мыйын чын огылемлан кӧра Тудлан шукырак чапым конда гын, молан мыйым языкан семын судитлаш?8Поро лийже манын‚ осалым ышташ тӱҥалына мо? Тидлан туныктена манын‚ южышт мемнам мыскылат. Тыгай еҥ-влак судитлалтмыштым сулен налыт.

9Тугеже ме, иудей-влак‚ моло деч сайрак улына мо? Изишат уке! Ме титаклымашым луктынна ыле: иудей-влакат‚ эллин-влакат – чылан языкын кид йымалныже улыт.10Тыге возымо:
«Чын ыштыше иктат уке‚
11шонен моштышат уке‚
нигӧ Юмым ок кычал.
12Чылан корно гыч кораҥыныт‚
икте-кодде йӧрдымӧ лийыныт.
Порым ыштыше уке‚ иктат уке.
13Нунын логарышт – почмо шӱгар‚
йылмышт дене ондалкалат‚
тӱрвышт гыч кишке аяр йога,
14нунын умшашт каргымаш да кочо дене темын.
15Вӱрым йоктараш йолышт писе,
16нуно корнешышт
шалатылмашым да орлыкым кодат.
17тыныслык корным огыт пале,
18Шинча ончылнышт Юмо деч лӱдмаш уке».

19А ме палена: законышто мо ойлалтеш‚ чылажат закон йымалсе-влаклан веле. Тыгеже‚ кажне еҥ шып лийшаш, да уло тӱня Юмын ончылно титакан лиеш.20Вет законым шукташ тыршыме дене ик айдемат Юмын ончылно чыныш ок лек. Закон гоч мо тугай язык манын умылымаш веле толеш.

21А кызыт Юмын чынжым закон деч посна палдарыме. Закон да пророк-влак тиде чын нерген таныклат.22Юмын тиде чынже ӱшаныше кажне айдемын кӧргыштыжӧ Иисус Христослан ӱшаныме дене лиеш. Нунын коклаште нимогай ойыртем уке,23вет чылан языкым ыштеныт да Юмын чапше деч посна кодыныт,24но Христос Иисус гоч шуктымо сулен налмаш дене Юмын порылыкшылан кӧра чылалан чыныш лекмаш пӧлеклалтеш.25-26Юмо Христосым сӧрасымашым ыштыше жертвылан пыштен, сӧрасымаш ӱшаныме гоч Тудын Вӱржӧ дене лиеш. Тыге Юмо шке чынжым ончыкта. Шуко чытымыж дене Тудо еҥ-влакын ончычсо языкыштым кудалтен да кызытат, мемнан жапыште, Шкенжын чынжым ончыкта: Тудо Шкеже чын да Иисуслан ӱшаныше-влакым чыныш луктеш.

27Тыгеже, мо дене мыланна моктанаш? Моктанаш амал уке. Могай закон дене амал уке? Пашам йодшо закон дене мо? Уке‚ ӱшанымашым йодшо закон дене.28Ме тыге шотлена: айдемым ӱшанымашыже чыныш луктеш, законым шуктымо тыште шотыш ок налалт.29Юмыжо иудей-влакын веле Юмышт мо? Тудо Юмым палыдыме-влакынат Юмышт огыл мо? Туге‚ Юмым палыдыме-влакынат Юмышт‚30вет Юмо икте‚ Тудо пӱчман-влакымат ӱшанымыштлан кӧра чыныш луктеш‚ пӱчдымӧ-влакымат Христослан ӱшаныме гоч чыныш луктеш.31Тыгеже‚ тидлан ӱшаныме дене ме законым укеш луктына мо? Уке. Законым пеҥгыдемдена веле.


*а 3:4 Пс 50:6.

*б 3:10-14 Пс 13:1-3‚ 52:2-4‚ 5:10‚ 139:3‚ 9:28.

*в 3:15-17 Ис 59:7-8.

*г 3:18 Пс 35:2. Тидым «Юмо деч огыт лӱд» манынат кусараш лиеш.

предыдущая глава Глава 3 следующая глава