Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ИУДАН УЛО ЧЕРКЫЛАН КОЛТЫМО СЕРЫШЫЖЕ

Глава 1

1-2 Саламлымаш. 3-16 Шояк туныктышо-влак. 17-23 Каҥаш ден сӧрвалымаш. 24-25 Юмым чапландарымаш.

1Иисус Христосын тарзыже, Иаковын Иуда шольыжо деч –Иисус Христосын аралыме да Ача Юмын святитлыме ӱжмӧ-влаклан.

2Тек тыланда Юмын чаманымашыже, тыныслык да йӧратымаш шукемыт.

3Йӧратымем-влак, чыланнан утаралтмына нерген тыланда серымем пешак шуын, а кызыт тыланда возаш да святой-влаклан икана эрелан пуымо ӱшанымаш верч пеҥгыдын шогаш тендам сӧрвалаш кӱлешлан шотлем.4Вет шукертак судлан палемдыме да Юмым пагалыдыме еҥ-влак коклашкыда шолып пуреныт. Нунышт мемнан Юмынан порылыкшым пужлен илаш йӧным пуышо амалыш савырат, Юмо – ик шкет Кугыжа – да мемнан Иисус Христос Господьна деч кораҥыт.

5Чыла тидым паледа гынат, тыланда ушештарынем: Господь шке калыкшым Египет мланде гыч утарен луктын, но вара нунын кокласе ӱшаныдыме-влакым пытарен.6Шке кӱкшӧ верыштым кучаш шоныдымо да илемыштым кодышо суксо-влакымат Юмо курымаш шинчыр дене шинчырлен да кугу суд кечылан пычкемышыште оролен куча.7Содом ден Гоморра да воктенысе олала нергенат шарналтыза: туштат нунын семынак яжарланаш пижыныт, пӱртӱс дене келшыдыме аташланымылан шкеныштым пуэныт. Нуным курымаш туллан судитлыме, да чылалан шижтарымаш улыт.

8Туге гынат, лийдымашым шонкалыше нине еҥ-влакат тидын семынак капым шакшылат, нуно озаланымаш деч кораҥыт да чапланыше Суксо-влакым мыскылат.9Архангел Михаилат диавол дене мутланымыже да Моисейын капше нерген ӱчашымыже годым мыскылыме мут дене титаканыш лукташ тоштын огыл, а каласен: «Тек Господь тыйым чара».10Но нине еҥ-влак мом огыт пале, тудым мыскылат, а умылыдымо вольык семын пӱртӱс пуымо дене мом палат, тудын дене шкеныштым пытарат.11Ойго нунылан, вет Каинын корныж дене каят, оксалан верч Валаамын гай йоҥылышлан шкеныштым тӱрыс пуэныт да Корей семын ваштареш шогымыштлан кӧра пытат.12Кунам те, ваш-ваш йӧратен, кочкаш погынеда, нуно шем тамга гай улыт, вожылде тендан дене пырля кочкыт-йӱыт, шкенышт верч веле тыршыше кӱтӱчӧ улыт. Нуно мардеж наҥгайыме вӱддымӧ пыл, саскадыме, кок гана колышо, вожге шупшын лукмо шыже пушеҥге,13шке намысле пашаж дене шоҥешталтше, ажгыныше теҥыз толкын, корныштым йомдарыше, курымашлык шем пычкемышыш колтымым вучышо шӱдыр улыт.

14Енох, Адам деч шымше, нунын нергенат пророкла ойлен: «Теве Господь тӱжемле святой Суксыж-влак дене толеш,15чылалан судым ышта, Юмым пагалыдыме чыла еҥым пужлымышт дене ыштыме чыла осал пашашт верч да Юмым пагалыдыме нине языкан-влакын Тудын ваштареш каласыме чыла торжа мутышт верч титаканыш луктеш».16Нуно ӧпкелыше, нимо денат келшыдыме улыт, Юмым пагалыде да законым пудыртылын, шке сутланымышт почеш илат, йылмышт гыч кугешнен ойлымо мут-влак лектыт, шкаланышт пайдам налашлан сайла кояш тӧчат.

17Но те, йӧратымем-влак, мемнан Господьна Иисус Христосын Апостолжо-влакын ончык ужын ойлымыштым шарналтыза.18Пытартыш жапыште игылтыше-влак лектыт манын, нуно тыланда ойленыт. Тыгай-влак Юмылан тушманле сутланымашышт почеш ыштат,19[ик ӱшанымаш деч] шкеныштым ойырат, шке шӱм-чонышт почеш илат, шӱлышышт уке.20-21А те Господьна Иисус Христосын чаманымыжым да курымашлык илышым вучеда. Йӧратымем-влак, кунам тидым вучеда, эн святой ӱшанымашдан негызешыже шке илышдам чоҥен, Святой Шӱлыш дене ушнен кумалын, шкендам Юмын йӧратымаштыже кучыза.22Иктыштым шонкаленрак чаманыза,23весыштым тул гыч лукмо семын лӱдын утарыза, шекланен, языкан кап дене амыргыше вургемышт дечат йыгыжген, шылталыза.

24Тендам чын корно гыч кораҥме деч арален да шке чапше ончылан тендам шылталаш лийдымым да куанышаным шогалтен Кертшылан,25уш-акылан ик шкет Юмылан, Господьна Иисус Христос гоч мемнам Утарышылан, чыла жап тӱҥалме деч ончыч, кызыт да курым-курымеш чап да кӱкшыт, куат да власть лийже. Аминь.


*а 1:9 Архангел – Тӱҥ Суксо.

*б 1:19 «шӱлышышт»: тидым «(Святой) Шӱлышышт» манынат умылаш лиеш.

предыдущая глава Глава 1 следующая глава