Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПЕТРЫН УЛО ЧЕРКЫЛАН КОЛТЫМО КОКЫМШО СЕРЫШЫЖЕ

Глава 2

1-22 Шояк туныктышо-влак.

1Израиль калык коклаште шояк пророк-влакат лийыныт, тыгак тендан коклаштат шояк туныктышо-влак лектыт. Нуно пытымашке наҥгайыше шояк туныктымашым кондат да шкеныштымат тӱлен налше Господь деч кораҥыт, тидын дене шке ӱмбакышт вашке пытымашым кондат.2Шукышт нунын пужлымаш корнышт дене каят, да тидлан кӧра чынын корныжо мыскылымаште лиеш.3Опкын улмыштлан кӧра нуно шоякым ойлымо дене тендан кӱшеш илаш тӱҥалыт. Нунылан суд пунчал шукертак ямде, пытымашышт ок нере.

4Юмо языкыш пурышо суксо-влакым чаманен огыл, а пычкемышын шинчырже дене кылден, нуным тамыкыш сӱмыралын да суд кече марте орландарен оролаш пуэн.5Тошто тӱнямат Юмо чаманен огыл, Юмым пагалыдыме-влакын тӱняшт ӱмбаке вӱд ташлымашым колтен. Но чын илыме верч ойлышо Нойын ешыжым – кандаш чоным – арален коден.6Содом ден Гоморра ола-влакым Тудо пытараш судитлен да ломыжыш савырен, нине ола-влакым шалатыме дене Юмым пагалыдыме ончыкылык еҥ-влаклан шижтарен,7а шотдымо-влакын пужлен илымышт дене йӧсланыше Лотым, чын ыштыше еҥым, утарен.8Вет нунын коклаште илымыж годым тиде чын ыштыше еҥ закондымылыкым ыштымыштым ужын-колын, да тудын чыным йӧратыше чонжо кече еда орланен.9Господь чыла тидым ыштен гын, Юмым пагалыше-влакым тергымаш деч кузе утараш Тудо пала да, закондымылыкым ыштыше-влакым осал пашашт верч мутым кучаш шогалташ манын, суд кечылан оролымаште кузе кучаш, шинча.10-11Кап ден чонысо шакше сутланымаш почеш кайыше да властьым пагалыдыме-влаклан суд поснак пеҥгыде лиеш.

Нунын деч кугурак вий-куатан Суксо-влакат Господь ончылно нуным мыскылыше мут дене титаканыш огыт лук, но нине торжа да ӱскырт еҥ-влак чапланыше Суксо-влакым мыскылаш огыт лӱд.12Тыгай еҥ-влак мом огыт пале, тудым мыскылат. Нуно пӱртӱс палемдыме почеш илыше, кучалташ да пытаралташ шочшо умылыдымо янлык гай улыт да нине янлык-влак семынак пытарыме лийыт.13Закондымылыкыштлан нунылан тӱлалтеш. Кечывал кечын шерыштым темымым ракатланымылан шотлат, тендан дене пырля кочмышт-йӱмышт годым нине лавыра гай намысле еҥ-влак ондалымышт дене ракатланат.14Шинчаштышт яжарланымаш да чарныдыме язык веле, пеҥгыдем шудымо чоным кучат, шӱмышт опкынланымашлан тунемын, нуно каргымашын икшывыж-влак улыт.15Вияш корным коден, нуно йомыныт, Восорын Валаам эргыжын корныж дене каеныт, тудыжо чын огыл пашалан тӱлымым йӧратен,16но закондымылыкым ыштымыжлан тудым шылталыме: ойлен кертдыме осел, айдеме йӱк дене ойлен, пророкын ушдымылыкшым чарен шогалтен.

17Нине еҥ-влак вӱддымӧ памаш, тӱтан мардеж поктылмо шем пыл улыт. Нунылан курымашлык тӱвыт пычкемышым ямдылыме.18Вет кугешнылме яра мутым ойлыштын, нуно кап ден чонын сутланымыже, пужлымыжо дене тугай еҥ-влакым оптышыш кучат, могайышт шояште илыше-влак деч пыкше гына утлаш тӱҥалыныт.19Шкешт шӱймашын кулжо улыт гынат, нунылан эрыкым сӧрат. Вет кӧлан сеҥалтынат, тудын кулжо улат.20Мемнан Господьна да Утарышына Иисус Христосым палыме гоч тиде тӱнясе лавыра деч утлымеке, тушан угыч варнат да сеҥалтыт гын, тугеже мучаште нунылан тӱҥалтыш годымсышт деч ударак лиеш.21Чын ыштымаш корным пален налме да нунылан пуымо святой кӱштымаш деч мӧҥгеш савырныме олмеш чын ыштымаш корным огыт пале гын, нунылан сайрак ыле.22Нунын дене чын калыкмутышто ойлымо семын лийын: «Пий шке укшинчышыж деке пӧртылеш», да «Мушмо сӧсна лавыраште пӧрдалеш».


*а 2:22 Притч 26:11.

предыдущая глава Глава 2 следующая глава