Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПЕТРЫН УЛО ЧЕРКЫЛАН КОЛТЫМО КОКЫМШО СЕРЫШЫЖЕ

Глава 1

1-2 Саламлымаш. 3-15 Юмын ӱжмыж дене келшыше илыш. 16-21 Христос нерген пророкла ойлымын чын улмыжо.

1Иисус Христосын тарзыже да Апостолжо Симон-Петр деч – мемнан Юмынан да Утарыше Иисус Христосын чын улмышт гоч шкенан ӱшанымашна гай шергакан ӱшанымашым налше-влаклан.

2Юмо ден Господьна Христос Иисусым палыме гоч тек тыланда порылык да тыныслык шукемыт.

3Мемнам шке чапше да моткоч кугу порылыкшо дене Ӱжшым палыме гоч Тудын пылпомышсо кӱдыратле куатше илышлан да Юмым пагален илымылан чыла кӱлешым мыланна пӧлеклен.4Шке чапше да кугу порылыкшо гоч Тудо мыланна кугу да шергакан сӧрымаш-влакым пӧлеклен. Нине сӧрымаш-влак дене те, сутланымашлан кӧра тӱняште озаланыше локтылалтмаш деч куржын, Юмын гай шӱм-чонан лийын кертыда.5Санденак, уло вийын тыршен, ӱшанымаштыда порылыкым ончыктыза, порылыкышто – шинчымашым,6шинчымаште – шкем кучен моштымым, шкем кучен моштымаште – чытымым, чытымаште – Юмым пагалымым,7Юмым пагалымаште – иза-шольо-влакым жаплымым, иза-шольо-влакым жаплымаште – йӧратымашым.8Чыла тиде тендан уло да шукем шога гын, тугеже мемнан Господьна Иисус Христосым палымаште пашадыме огыда лий да саска деч посна огыда код.9А кӧн тиде уке, тудо сокыр, торашке уждымо, шкенжым ончычсо языкше деч эрнымым монден.10Сандене, иза-шольо-влак, шкендам ӱжмым да ойырен налмым пеҥгыдемдаш эшеат виян тыршыза. Тидым ыштеда гын, те нигунам огыда шӱртньӧ,11тыге тыланда мемнан Господьна да Утарышына Иисус Христосын курымашлык Кугыжанышкыже омса кумдан почылтеш.

12Садланак, те тидым паледа да тендан деке шушо чынеш пеҥгыдемдыме улыда гынат, тидын нерген мый тыланда шарныктымым ом чарне.13А тиде капыште эше кунар лиям, тендам шарныктымаш дене помыжалтарымым чынлан шотлем.14Тиде капем мый дечем вашке ӧрдыжкӧ кораҥдышашым палем. Тидым мылам мемнан Господьна Иисус Христос увертарен.15Тиде илыш гыч кайымем деч варат те чыла тидым эре шарныза манын, мый тыршаш тӱҥалам.

16Господьна Иисус Христосын куатше да толмыжо дене тендам палдарымына годым ме чоян чоҥымо йомаклан эҥертен огынал: Тудын кӱдыратле улмыжым ме шкеак ужынна.17Тудлан пеш кугу чап деч «Тиде Мыйын йӧратыме Эргым, Тудын дене Мыйын поро кумылем» манын каласыме йӱк шоктымо годым Тудыжо Юмо Ача деч пагалымашым да чапым налын.18Тудын дене пырля святой курыкышто лиймына годым пылпомыш гыч йоҥалтше тиде йӱкым ме шке колынна.19Тыгеракын, пророк-влакын шомакыштлан ме эшеат пеҥгыдын ӱшанен кертына. Ӱжара волгалташ тӱҥалмешке да шӱмыштыда эрденысе шӱдыр нӧлталтмешке, пычкемыш верыште йолгышо лампе деке мелын лийме семын тиде шомак велке мелын лийыда гын, те сайын ыштеда.20Те эн ондак теве мом палышаш улыда: Возымаште пророк-влакын ик ойлымыштымат нигӧ шкевуя умылтарен ок керт.21Вет пророкла ойлымаш нигунам айдемын эрыкше почеш лектын огыл, а Святой Шӱлыш кумылаҥдыме почеш Юмын святой еҥже-влак шомакым ойленыт.


*а 1:21 Эрык – воля, желание.

предыдущая глава Глава 1 следующая глава