Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПЕТРЫН УЛО ЧЕРКЫЛАН КОЛТЫМО ИКЫМШЕ СЕРЫШЫЖЕ

Глава 5

1-11 Черкылан да тудын вуйлатышыж-влаклан каҥаш. 12-14 Чеверласымаш.

1Мый, шкежат пресвитер, Христосын орланымыжым таныклыше да почылтшаш чапым пырля пайлыше айдеме, тендан пресвитерда-влакым сӧрвалем:2Юмын тыланда ӱшанен пуымо кӱтӱжым кӱтыза, ӧкымлыде, шке кумылын, Юмылан келшышын тудым оролыза, намысле пайдам кычалын огыл, а уло кумылын тыршен ыштыза,3тыланда ӱшанен пуымо еҥ-влакым кид йымалныда ида кучо, а кӱтӱлан корным ончыктышо лийза.4Тунам Тӱҥ Кӱтӱчӧ кончен толмо годым те лывыжгыдыме чап вуйшӱдышым налыда.

5Самырык-влакат, пресвитер-влакым колыштса. Чыланат, икте-весым колыштын, икте-весе деке тыматле шонымашан лийза, вет
«Юмо кугешныше-влак ваштареш шога,
а ӱҥышӧ-влаклан порылыкым пуа».
6Тугеже, ӱҥышӧ лийза да Юмын виян кид йымалныже лияш келшыза, шке жапыштыже Тудо тендам кӱшкӧ шогалта.7Кеч-могай тургыжланымашдам Юмылан ӱшанен пуыза: Тудо тендан верч тырша.

8Айык шонымашан лийза, шекланен шогыза: тендан ваштареш шогышыда, диавол, ырлыше лев семын, кӧм нелаш кычалын, коштеш.9Пеҥгыде ӱшанымаш дене тудын ваштареш шогалза. Те паледа: тендан иза-шольыда-влаклан уло тӱняште тыгаяк орланымашым чыташ логалеш.10А Христос Иисус дене ушнен шогымаште мемнам Шкенжын курымашлык чапышкыже ӱжшӧ чыла порылыкын Юмыжо, кӱчык жап орлыкым чытымекыда, тек тендам тӧрлата, чоткыдемда, вияҥда да пеҥгыдемда.11Тудлан куат да вий курым-курымеш лийже. Аминь.

12Мый тыланда Силуан гоч кӱчыкын возышым, тудым ӱшанле изалан шотлем. Мый тендам кумылаҥдынем да, тидыже Юмын чын порылыкшо манын, таныклынем ыле. Тиде порылыкышто те пеҥгыдын шогеда.13Тендан дене пырля ойырен налме Вавилон черке, тыгак Марк эргым тыланда саламым колтат.14Икте-весыдам йӧратымаш шупшалме дене саламлыза. Тыланда, Христос Иисус дене ушнен шогышо-влаклан, чылалан тыныслык лийже. Аминь.


*а 5:5 Притч 3:34.

предыдущая глава Глава 5 следующая глава