Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПЕТРЫН УЛО ЧЕРКЫЛАН КОЛТЫМО ИКЫМШЕ СЕРЫШЫЖЕ

Глава 4

1-11 Юмылан илымаш. 12-19 Христослан ӱшанымылан верч орланымаш.

1Тыгеракын, Христос мемнан верч кап да чон дене орланен гын, тугеже теат тыге шонымым саркураллан налза, вет кап да чон дене орланыше айдеме языкым ыштымым чарна,2сандене тудо кап дене илаш кодшо ӱмыржым ынде айдемын сутланымыж почеш огыл, а Юмын эрыкше почеш ила.3Чын Юмым палыдыме-влакын кумылыштым шуктен, мом эртыше илыш жапыште ыштенда, тидат сита: те пужлен, сутланен, [пӧръеҥ пӧръеҥ дене коштын, вольык дене коштын, удам шонен,] аракам йӱын, шот деч посна кочкын-йӱын да шояк юмылан намыслын кумалын иленда.4Но те нунын дене пырля пужлымаш йогынышко огыда ушно, сандене нуно ӧрыт да тендам вурсат.5Илыше ден колышо-влакым судитлаш Ямде Улшо ончылно нуно мутым кучаш шогалыт.6Вет колышо-влак айдеме семын кап дене судитлалтыныт гынат, Юмо семын шӱлыш дене илышт манын, нуныланат Поро Уверым каласкалыме.

7Но чылажынат мучашыже лишнак. Тугеже ушан-шотан да кумалмаште пеҥгыде лийза.8Эн ондак икте-весыдам тыршен йӧратыза, вет йӧратымаш шуко языкым леведеш.9Ӧпке деч посна икте-весыдам шкендан деке пуртыза.10Те кажныже, Юмын шуко сынан порылыкшылан пашам ыштыше поро служитлыше семын, Тудын деч налме моштымаш дене икте-весылан тарзыланыза.11Кӧ ойла гын, Юмын шомакшым ойлымо семын ойлыжо, кӧ служитла гын, Юмын пуымо вий дене служитлыже. Тек Юмо чыла шотыштат Иисус Христос гоч чапландаралтеш. Тудлан курым-курымеш чап да куат лийже. Аминь.

12Йӧратымем-влак, тендан дене ала-мо умылыдымо лиеш манын шонен, тендам тергаш колтымо туллан ида ӧр.13Христосын орланымашкыже ушнымыда семын куаныза, тунам Тудын чапше кончымо годымат куанаш да йывырташ тӱҥалыда.14Тендам Христосын лӱмжӧ верч вурсат гын, пиалан улыда: Чап Шӱлыш, Юмын Шӱлыш, тендан ӱмбалне. Нуно Тудым мыскылат, а те чапландареда.15Тек тендан кокла гыч нигӧат еҥым пуштмылан, шолыштмылан але осалым ыштымылан, але еҥ пашаш шӱшкылтмылан ок орлане.16Но иктаж-кӧ Христослан ӱшанымыжлан орлана гын, ынже вожыл, а тыгай ужашлан Юмым чапландарыже.17Вет судлан Юмын мӧҥгысыж-влак деч тӱҥалаш жап. А мемнан деч тӱҥалеш гын, Юмын Евангелийжылан тореш лийше-влаклан могай мучаш лиеш?18
«Чын ыштыше пыкше утаралтеш гын,
Юмым пагалыдыме да языкан еҥ кушко логалеш?»
19Тугеже Юмын эрыкше почеш орланыше-влакат тек чоныштым ӱшанле Ыштышын кидышкыже пуат да умбакыжат порым ыштат.


*а 4:2 Эрык – воля, желание.

*б 4:18 Притч 11:31.

*в 4:19 Эрык – воля, желание.

предыдущая глава Глава 4 следующая глава