Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПЕТРЫН УЛО ЧЕРКЫЛАН КОЛТЫМО ИКЫМШЕ СЕРЫШЫЖЕ

Глава 3

1-7 Вате ден марий. 8-22 Чын ыштыме верч орланымаш.

1-2Тыгак теат, вате-влак, шке марийдам колыштса. Тыгеракын, Юмын шомаклан ӱшаныдыме марий-влак ватыштын арун да Юмо деч лӱдын илымыштым ужын, нунын илышыштлан кӧра мут деч посна ӱшандарыме лийын кертыт.3Тек тендан моторлыкда тӱжвач сӧрастарымаште – ойыртемалтше ӱппунемыште, шӧртньым сакалымаште, чапле вургемыште – ок лий.4Тек кӧргысӧ шӱм айдемыда – вашталтдыме, тыматле, шыма чон – тендам моторым ышта. Тыгайже Юмын ончылно шергакан.5Юмылан ӱшаным пыштыше святой ӱдырамаш-влакат ожно шкеныштым тыгак сӧрастареныт да марийыштым колыштыныт.6Тыге Сарра Авраамын мутшым колыштын, тудым оза манын. Порым ыштеда да нимогай лӱдмаш деч огыда лӱд гын, те Сарран шочшыжо улыда.

7Тыгак теат, пӧръеҥ-влак, вийдыме улмыштым чаманен, ватыда дене шот дене илыза, нунылан пагалымашым ончыктыза, вет нуно тендан дене пырля наследник улыт да Юмын порылыкшо дене пуымо илышым налыт. Тунам кумалмыланда чарак ок лий.

8Мучашлан, чылан икгай шонымашан, чаманыше, иза-шольо-влакым йӧратыше, поро шӱман, келшен илыше, ӱҥышӧ лийза.9Осаллыклан осал дене, вурседылмылан вурседылме дене ида вашеште. Порым гына тыланыза, вет те паледа: тидланак тендам ӱжмӧ. Тыге шкеат Юмын суапландарымыжым налыда.10Вет возымо:
«Кӧ илышым йӧратынеже
да поро кече-влакым ужнеже,
йылмыжым осал деч кучыжо
да умшажым – чоян ойлымо деч,
11осал деч кораҥже да порым ыштыже,
тыныслыкым кычалже да тудын деке лишемаш тыршыже.
12Вет Господьын шинчаже чын ыштышым онча,
пылышыже тудын сӧрвалымыжым колыштеш,
но осалым ыштышым мланде ӱмбач пытараш манын,
Господьын чурийже тудын ваштареш лиеш».

13Те поро верч тыршыше лийыда гын, кӧ вара тыланда осалым ышта?14А чын ыштымыланда верч орланеда гынат, те пиалан улыда, нунын лӱдыктымышт деч ида лӱд, ида ӧр.15Господь Юмым шкендан шӱмыштыда святитлыза, да ӱшанен вучымыда шотышто умылтарымашым кӧ йодеш, кажныжлан тыматлын да пагален вашешташ эре ямде лийза.16Поро совестян лийза, тунам тендан Христос дене ушнымаште порын илымыдам шудалше-влак тендам осал-влакым вурсымо семын вурсымыштлан намысыш логалыт.17Осал пашалан орланаш сай огыл, а Юмын эрыкшылан келша гын, поро пашалан орланаш сай.18Вет Христосат, мемнам Юмо деке кондаш манын, языкланна кӧра икана орланен, чын ыштыше – чын огыл ыштыше-влак верч. Тудым кап дене колымашке шуктымо, но шӱлыш дене ылыжын.19Шӱлыш денак Тудо каен да казаматыште улшо шӱлыш-влаклан ойлен.20Ожно, Нойын илыме жапыште, ковчегым чоҥымо годым, кунам Юмо чытен вучен, нуно мут колыштдымо лийыныт. Корабльыште икмыняр еҥ гына, вес семынже кандаш чон, вӱд гоч утаралтын.21Тунамсе семынак кызыт мемнамат вӱд, вес семынже тынеш пуртымаш, Иисус Христосын ылыжмыж гоч утара. Тынеш пуртымаш – кап гыч лавырам мушкын колтымаш огыл, а поро совесть дене илаш Юмо деч йодмаш.22Христос пылпомышыш кӱзен да Юмын пурла могырыштыжо шинча. Суксо, власть да вий-влак Тудын кидше йымалне улыт.


*а 3:10-12 Пс 33:13-17.

*б 3:17 Эрык – воля, желание.

предыдущая глава Глава 3 следующая глава