Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПЕТРЫН УЛО ЧЕРКЫЛАН КОЛТЫМО ИКЫМШЕ СЕРЫШЫЖЕ

Глава 2

1-10 Христос – илыше кӱ. Юмын святой калыкше. 11-17 Святой илыш дене илышаш нерген. 18-25 Христос гай тарзе лийза.

1Тугеже, чыла осаллыкым, чыла чояланымым, сайла кояш тӧчымым, кӧранымым да чыла орлымым коден,2кызыт гына шочшо аза семын ару шомак шӧрым йӧратыза. Тудын дене те кушшаш да утаралтмашке шушаш улыда,3вет те Господьын поро улмыжым тамленда.4Тудын деке, илыше кӱ деке, толза, Тудым еҥ-влак кӱлдымыш луктыныт, а Юмын ончылно Тудо ойырен налме да шергакан.5Шкендам илыше кӱ семын Юмын Шӱлышын пӧртшым чоҥаш пуыза, Иисус Христос гоч Юмылан келшыше надырым Шӱлыш дене пуышо святой иерей-влак лийза.6Вет Возымаште тыгай шомак уло:
«Теве Мый Сионышто кӱм пыштем,
ойырен налме шергакан негыз пусак кӱм,
Тудлан ӱшаныше намысыш ок пуро».
7Тугеже, тыланда, ӱшаныше-влаклан, тиде кӱ шергакан, а ӱшаныдыме-влаклан тудо – «чоҥышо-влакын йӧрдымыш лукмо, но пусакын негызше лийше кӱ», нунылан тудо – «шӱртньымӧ кӱ, алгаштаралтме кӱ».8Шомакым колыштдымыштлан нуно шӱртнят. Нунылан тыге лияш палемдыме.

9Но те ойырен налме тукым, Кугыжан иерейже-влак, святой калык, Юмын Шкаланже налме тукым улыда. Тендам пычкемыш гыч ӧрыктарыше волгыдышкыжо Ӱжшын кӱдыратле пашажым те увертарышаш улыда.10
Ондак те калык лийын огыдал,
ынде Юмын калыкше улыда.
Ондак тендам чаманыме огыл,
а ынде чаманыме улыда.

11Йӧратымем-влак, илаш толшо ӧрдыж еҥым сӧрвалыме семын тендам сӧрвалем: чон ваштареш кучедалше капысе сутланымаш деч шкендам кучыза12да чын Юмым палыдыме еҥ-влак коклаште порын илыза. Тыгеракын, нуно поро пашадам ужыт да, осалым ыштыше манын, мо верч тендам кызыт вурсат, толын кайыме кечынже тидын верчак Юмым мокташ тӱҥалыт.

13Тыгеракын, Господьлан кӧра чыла айдеме вуйлатыше-влакым колыштса: кугыжамат, вет тудо эн кугу кучеман,14тӧра-влакымат, кугыжа вет нуным осалланыше-влакым мут кучаш шогалташ да порым ыштыше-влакым мокташ колтен.15Вет Юмын эрыкше тыгай: порым ыштыме дене те тунемдыме еҥ-влакын шотдымо ойлымыштлан мучашым пыштышаш улыда.16Эрыкан еҥ семын ыштыза, тек тендан эрыкда осаллан леведыш огеш лий, а Юмын кулжо лийза.17Чылам пагалыза, иза-шольымытым йӧратыза, Юмо деч лӱдса, кугыжам шотлыза.

18Тарзе-влак, озада-влакын мутыштым лӱдын да пагален колыштса: поро да тыматле-влакын веле огыл, но торжа-влакынат мутыштым колыштшо лийза.19Юмым эре ушышто кучымыжлан кӧра иктаж-кӧ чын амал деч посна ойгаҥдарен орландарымым чыта гын, тиде – Юмылан келшыше.20Титакланда кырыме годым чытеда гын, тендам молан мокташ? Но порым ыштымыланда кӧра орлыкым чытеда гын, тиде Юмын ончылно келшыше,21да тидланак тендам ӱжмӧ, вет Христосат мемнан верч орлыкым чытен да мыланна корным ончыктен: те Тудын кышаж почеш кайышаш улыда.22
«Языкым Тудо ыштен огыл,
Тудын йылмыж гыч чояланымаш шоктен огыл.»
23Тудым вурсеныт гынат, вурсен вашештен огыл, орланымыж годым лӱдыктылын огыл, а чын Судитлышын кидышкыже чыла ӱшанен пуэн.24Ме, язык деч кораҥын, чын ыштен илен кертшаш улына, сандене Христос шке Капше дене языкнам ырес меҥгыш нӧлталын. Тудын сусыржо дене те паремдыме лийында.25Те [кӱтӱчӧ деч посна кодшо] йомшо шорык гай лийында, но чондам Кӱтышӧ да Аралыше деке кызыт пӧртылында.


*а 2:6 Ис 28:16.

*б 2:7 Пс 117:22, Ис 8:14.

*в 2:15 Эрык – воля, желание.

*д 2:22 Ис 53:9.

предыдущая глава Глава 2 следующая глава