Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПЕТРЫН УЛО ЧЕРКЫЛАН КОЛТЫМО ИКЫМШЕ СЕРЫШЫЖЕ

Глава 1

1-2 Саламлымаш. 3-12 Илыше ӱшанен вучымаш. 13-25 Святой лийза.

1-2Иисус Христосын Петр Апостолжо деч Понтышто, Галатийыште, Каппадокийыште, Асийыште да Вифинийыште ӧрдыж еҥ семын шаланен илыше-влаклан.

Тендам Ача Юмын ончылгоч палымыж почеш Шӱлыш дене святитлыме гоч Иисус Христосым колышташ да Тудын Вӱржым шыжыктыме дене эрналташ ойырен налме. Тек тыланда Юмын порылыкшо да тыныслык шукемыт.

3Мемнан Господьна Иисус Христосын Юмыжо да Ачаже моктымо лийже! Иисус Христосын колымаш гыч ылыжмыж гоч Тудо мемнам Шкенжын кугу порылыкшо дене илыше ӱшанен вучымашке шочыктен,4шӱйдымӧ, локтылалтдыме, лывыжгыдыме наследствым сӧрен. Тидыже тыланда пылпомышто аралалтеш5– тыланда, ӱшанымыланда кӧра Юмын куатше дене утаралтмашлан аралыме-влаклан. Тиде утаралтмашыже пытартыш саманыште кончаш ямде.6Тыланда тӱрлӧ тергымаште кызыт изишлан ойгаҥаш логалеш гынат, тидлан куаныза.7Пытен йомшаш шӧртньымат тул дене тергат, а тендан ӱшанымашдан чытен шоген кертмыжын шӧртньӧ деч шуко пачаш шергакан улмыжо пале лийшаш да Иисус Христосын толмыж годым тауштымашым, пагалымашым да чапым кондышаш.8Иисус Христосым те ужын огыдал гынат, Тудым йӧратеда, кызыт Тудым огыда уж гынат, Тудлан ӱшанеда да каласен моштыдымо, чапле куан дене йывыртеда,9вет те ӱшанымашын саскажым, чондан утаралтмыжым, налыда.

10Тыланда палемдыме порылык нерген ончылгоч ойлышо пророк-влак тиде утарымашым кычалыныт, шымленыт.11Нунын кӧргыштышт Христосын Шӱлышыжӧ Христосын ончыкылык орланымыж нерген ойлен да тидын деч вара толшаш чап нерген ончылгоч таныклен. Тыгодым Шӱлышын мо нерген да могай жап нерген ойлымыжым нуно шымленыт.12Нунылан палдарыме лийын: Поро Уверым каласкалыше-влак ынде тыланда пылпомыш гыч колтымо Святой Шӱлыш дене мом увертареныт, тудын нергенак ойлымышт годым нуно шкаланышт огыл, а мыланна ыштеныт. Чыла тидым Суксо-влакат келгын ончалнешт.

13Сандене, [йӧратымем-влак,] ушдам ямдым кучыза, айык шонымашан лийза, Иисус Христос толмо годым тыланда пуалтшаш порылыклан тичмаш ӱшаным пыштыза.14Мутым колыштшо йоча гай лийза: пычкемыште лиймыда годым тендам тӱрлӧ сутланымаш алгаштарен, но ынде тудлан ида келыштаралт,15а тендам ӱжшӧ Святой семын те шкежат кеч-мом ыштымыда годым святой лийза.16Возымо: «Святой лийза, вет Мый святой улам».

17Кажне еҥым пашаж почеш ойыркалыде Судитлышым те Ача маныда гын, тугеже ӧрдыж еҥ семын илыме тиде жапдам лӱдын эртарыза.18-19Те паледа: ачада-влакын кодымо кӱлдымӧ илыш-шот деч тендам пытышаш ший але шӧртньӧ дене огыл тӱлен налме, а Христосын, титакдыме да яндар Пачан, шергакан Вӱржӧ дене тӱлен налме улыда.20-21Христосым тӱня тӱҥалтыш деч ончычак ойырен налме, а тыланда кӧра, Тудын гоч Юмылан ӱшаныше-влаклан кӧра, Христосым тиде пытартыш саманыште палдарыме. Тендан Юмылан ӱшанымыда лийже да те ӱшандам Тудын ӱмбаке пыштен кертса манын, Юмо Тудым колымаш гыч ылыжтен да Тудлан чапым пуэн.

22Иза-шольо-влакым сайла кояш тӧчыде йӧраташ манын, чыным колыштмо дене Шӱлыш гоч чондам эрыктен улыда гын, тугеже яндар шӱм дене икте-весыдам эре йӧратыза,23вет те шӱйшаш урлыкаш деч огыл, а шӱйдымӧ урлыкаш деч угыч шочында, тидыже – Юмын илыше да курымеш улшо шомакше.24Вет
«Кажне айдеме шудо гай,
тудын чыла чапше шудо пеледыш гай.
Шудо кошка, пеледышыже йога,
25но Господьын шомакше курымеш кодеш».
А тиде шомакше – тыланда каласкалыме Поро Увер.


*а 1:16 Лев 11:44.

*б 1:24-25 Ис 40:6-8.

предыдущая глава Глава 1 следующая глава