Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ИАКОВЫН УЛО ЧЕРКЫЛАН КОЛТЫМО СЕРЫШЫЖЕ

Глава 3

1-12 Йылмым сорлыклымо нерген. 13-18 Кӱшыч толшо уш-акыл.

1Иза-шольо-влакем, шукынжо туныктышо лияш ида толаше. Мемнам, туныктышо-влакым, утларак пеҥгыдын судитлымым паледа.2Чылан ме шуко языкыш пурена. Кӧ мутышто языкыш ок пуро, тудо тичмашлыкыш шуын да уло капшымат сорлыклен кертеш.3Мемнам колыштшо манын, теве ме имньын умшашкыже сорлыкым чиктена да уло капшым виктарен кертына.4Теве корабль-влакымат, нуно тугай кугу улыт да виян мардеж покта гынат, виктарыше еҥ моткоч изи кӱсмен дене кушко шона, тушко виктара.5Тыгак йылмат: капын изи ужашыже веле, но кугун моктана.

Теве могай изи ойып кугу чодыраш тулым пижыкта!6Йылмат – тул, шоякын сӧрастарышыже. Тыге тудо кап ужашна кокла гыч уло могырым лавырта да, шкеже тамык тул дене ылыжынат, илыш оравам ылыжта.7Вет кеч-могай янлык ден кайык-влакым, нушкын коштшо ден теҥызыште илыше-влакым айдеме кидше йымалне кучен кертеш да тидым ыштен.8А йылмым ик еҥат кид йымалныже кучен ок керт: тудо – кучен кертдыме осал, колымашым кондышо аяр дене темын.9Тудын дене Юмым да Ачам моктена, тудын денак айдемым, Юмо тӱсаным ыштымым, каргена.10Тудо умша гычак моктымаш да каргымаш лектеш. Иза-шольым-влак, тыге лийшаш огыл!11Ик памаш шинча гыч тамле да кочо вӱд йога мо?12Иза-шольо-влакем, оливым смоква пушеҥге але смоква саскам виноград вондер шочыктен кертеш мо? Ик памашат ик жапыште шинчалан да шере вӱдым йоктарен ок керт.

13Кӧ тендан коклаште уш-акылан да ушан? Тек уш-акылжым шкенжым сайын кучымо дене да уш-акыл гыч лекше тыматле пашаж дене ончыкта.14Но шӱмыштыда кочо кӧранымаш да шке верч тыршымаш уло гын, ида моктане да чын нерген шоям ида ойло.15Тиде кӱшыч толшо уш-акыл огыл, а мландысе, чон гыч лекше, ия деч шочшо уш-акыл.16Вет кушто кӧранымаш да шкалан тыршымаш, тушто шотдымылык да чыла тӱрлӧ уда паша.17Но кӱшыч толшо уш-акыл, эн ондакше, яндар, а вара тынысле, тыматле, мут колыштшо, чаманымаш да поро саска дене темше, еҥ-влакым ойыркалыдыме, сайла кояш тӧчыдымӧ.18Тыныслыкым ыштыше-влакын тыныс дене ӱдымӧ саскашт – тиде чын ыштымаш.


*а 3:6 «Шоякын сӧрастарышыже»: тидым «Чын огылын тӱняже» манынат кусараш лиеш.

предыдущая глава Глава 3 следующая глава