Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ИАКОВЫН УЛО ЧЕРКЫЛАН КОЛТЫМО СЕРЫШЫЖЕ

Глава 2

1-13 Еҥ-влакым ойыркалыме деч шижтарымаш. 14-26 Ӱшанымаш да тудым илышыш пуртымаш.

1Иза-шольым-влак, Иисус Христослан, чапланыше мемнан Господьлан, ӱшанеда гын, еҥ-влакым ида ойыркале.2Погынымашкыда шӧртньӧ шергашан, поян вургеман еҥ пура, тыгак шӱкшӧ вургеман йорло еҥ пура гын,3поян вургемым чийышым ончен, те тудлан каласеда: «Тышке шич, тыште сай вер». А йорлылан ойледа: «Тый тушан шогал» але «Тышан, мыйын йол воктекем, шич».4Тыгеже те шкендан коклаште еҥ-влакым огыда ойыркале мо, чын огыл шонымашан судья лийын огыдал мо?

5Йӧратыме иза-шольым-влак, колыштса: кӧмыт тиде тӱняште йорло улыт, нуным Юмо ӱшанымаште поян лияш ойырен налын огыл мо? Юмым йӧратыше-влаклан Тудо Кугыжанышым сӧрен, нуно тиде Кугыжанышын наследникше лийыт.6А те йорло еҥым шотлен огыдал. Поян-влак огыл мо тендам шыгыремдылыт, да нуно огыл мо тендам судыш шупшкедат?7Тендам могай поро лӱм дене лӱмдымӧ, нуно огыл мо тудым мыскылат?8«Лишылетым шкендым йӧратыме семынак йӧрате» манме, Возымаште пуымо кугыжа законым шуктеда гын, сай ыштеда.9А еҥ-влакым ойыркаледа гын, языкым ыштеда, да законым пудыртышо улмыдам закон ончыкта.10Кӧ уло законым куча, но иктыште языкым ышта, тудо пӱтынь закон ончылно титакан.11Вет «Ит яжарлане» манын Кӧ ойлен, Тудак каласен: «Ит пушт». Тый от яжарлане, но пуштат гын, тугеже законым пудыртышо улат.12Эрыкын законжо почеш судитлалтшаш еҥ семын ойлыза да ыштыза.13Чаманыде ыштыше еҥлан суд чаманыдыме лиеш. А чаманымаш суд деч кӱшнырак шога.

14Иза-шольо-влакем, иктажше «ӱшанымашем уло» манын ойла гынат, но поро пашаже уке гын, тыште могай пайда? Тыгай ӱшанымаш тудым утарен кертеш мо?15Иза-шольын але ака-шӱжарын вургемышт ок сите да кечылан ситыше кочкышышт уке гын,16а тендан кокла гыч иктаж-кудыжо «Тыныслык дене кайыза, ырыза, кочса» манын нунылан каласа, но капыштлан мо кӱлмым ок пу гын, могай пайдаже?17Ӱшанымаш денат тыгак: поро паша деч посна тудо колышо.

18Но иктаж-кӧ каласа: «Тыйын ӱшанымашет уло, а мыйын поро пашам уло». Тый мыланем ӱшанымашетым пашат деч посна ончыкто, а мый тыланет пашам гоч ӱшанымашемым ончыктем.19Юмо икте манын, тый ӱшанет. Сай ыштет. Ия-влакат тидлан ӱшанат да чытырат.20Но палынет мо, умылыдымо айдеме: поро паша деч посна ӱшанымаш колышо.21Шкенжын Исаак эргыжым жертвенникыш пыштымыж годым мемнан Авраам ачана пашаж дене огыл мо чыныш лектын?22Ӱшанымаш тудын пашажлан полшен да пашаже ӱшанымыжым тичмашлыкыш шуктен манын, тый ужат?23Тыге Возымашын шомакше шукталтын: «Авраам Юмылан ӱшанен, сандене Юмо тудым чын ыштышылан шотлен», да Авраамым Юмын йолташыже манын лӱмдымӧ.24Айдеме ӱшанымаш дене веле огыл, пашаж дене чыныш лукталтеш манын, те ужыда?25Шолып ончаш толшо-влакым пуртышо да нуным вес корно дене колтышо яжар Раав денат тыгак лийын. Тудат шке пашаж дене чыныш лукмо лийын огыл мо?26Тыгеракын, кузе чон деч посна кап колышо, тугак поро паша деч посна ӱшанымашат колышо.


*а 2:8 Лев 19:18.

*б 2:11 Исх 20:13-14.

*в 2:23 Быт 15:6.

предыдущая глава Глава 2 следующая глава