Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ИАКОВЫН УЛО ЧЕРКЫЛАН КОЛТЫМО СЕРЫШЫЖЕ

Глава 1

1 Саламлымаш. 2-8 Ӱшанымаш ден уш-акыл. 9-11 Йорлылык да поянлык. 12-18 Тергымаш да алгаштарымаш. 19-27 Юмын шомакшым колыштмаш да шуктымаш.

1Юмын да Господь Иисус Христосын Иаков тарзыже тӱрлӧ вере илыше латкок тукымлан: куаныза.

2Иза-шольым-влак, кунам тӱрлӧ тергымашке логалыда, тидым кугу пиаллан шотлыза.3Ӱшанымашдам тергыме деч чытымаш шочеш манын, те паледа.4Те чыла шотыштат тичмашлыкыш шуза да ситыдымаш деч посна лийза манын, чытымаш шке пашажым тичмашлыкыш шуктышаш.5А тендан кокла гыч иктаж-кудыжын уш-акылже ситышын огыл гын, тек Юмо деч йодеш. Тудо мом йодмыжым налеш, вет Юмо чылалан кумылын да шылталыде пуа.6Но тек ӱшанен, изишат кокытеланыде йодеш, вет кокытеланыше еҥ – мардеж лупшымо да кышкыме теҥыз толкын гай.7Господь деч иктаж-мом налам манын, тек тыгай еҥ ок шоно,8тудо – кок семын шонышо, мом гына ышта, нимоштат пеҥгыде огыл.

9Изиэш ужмо иза тек кӱкшытшылан куана,10а поян – ӱлыкшӧ улмыжлан, вет поян еҥже шудо пеледыш гай пыта.11Кече нӧлтеш, лӱп шокшо лиеш да шудым кошта, шудо пеледыш велеш, йытыра тӱсшӧ йомеш. Поянат шке корныштыжо тыгак лывыжга.

12Тергымашым чытен кертше айдеме пиалан, вет тергымашым эртымеке, тудо илыш вуйшӱдышым налеш, тидым Господь Тудым йӧратыше-влаклан сӧрен.13Алгаштарымашке логалмеке, Юмо мыйым алгаштара манын, тек нигӧ ок ойло. Юмым осаллык алгаштарен ок керт, Шкежат нигӧм ок алгаштаре.14Кажным шкенжын сутланымыже алгаштара, тудым шупшеш да ондален конда.15А вара сутланымаш, иланымеке, языкым шочыкта, а язык – колымашым.

16Йӧратыме иза-шольым-влак, ида ондалалт.17Чыла поро да тичмаш пӧлек кӱшычын, волгыдо-влакын Ачашт деч, вола, Тудын дене вашталтмашат, весемме ӱмылат уке.18Ме Тудын ыштымыжын тӱҥалтыш саскаже лийшаш улына, сандене Тудо шке шонымыж почеш мемнам чынын шомакше дене шочыктен.

19Тыгеракын, йӧратыме иза-шольым-влак, тек кажне айдеме колышташ писе, ойлаш вашкыдыме, шыдешкаш вашкыдыме лиеш,20вет айдемын шыдыже Юмын чынжым ок шукто.21Сандене чыла ару огылым да чыла тӱрлӧ осалым кораҥдыза. Туныктымо шомакым ӱҥышын шӱмышкыда пыштыза, тудо тендан чондам утарен кертеш.

22Шомакым шуктышо лийза, а колыштшо веле огыл, нуно шкеныштым шке ондалат.23Вет кӧ шомакым колыштеш да ок шукто гын, тудо пӱртӱс пуымо чурийжым воштончышышто ончышо айдеме гай.24Шке ӱмбакыже ончалмеке, тудо кораҥеш да могай улмыжым тунамак монда.25Но тичмаш законым, эрыкын законжым, кӧ тӱткын онча, куча да мом колмыжым ок мондо, а пашам шукта гын, ыштымаштыже пиалан лиеш.

26Тендан кокла гыч кӧ Юмым чын пагалем манын шотла да йылмыжым ок кучо, а шке шӱмжым ондала гын, тудын Юмым пагалымыже арам веле.27Юмым арун да яндарын пагалымаш Юмо да Ача ончылно теве мо лиеш: тиде тулык йочалан да тулык ӱдырамашлан орлыкышт годым полшымаш да тӱнясе шакшыланыме деч шкем аралымаш.


*а 1:1 «Куаныза» – грек йылмыште тидыже саламлыме мут.

*б 1:17 Волгыдо-влак – очыни, тиде кече, тылзе да шӱдыр-влакым ончыкта.

предыдущая глава Глава 1 следующая глава