Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 28

1-10 Мальтыште. 11-16 Павел Римыш толеш. 17-31 Павел Римыште Иисус нерген ойла.

1Утлен кодмеке, островын Мальта лӱман улмыжым ме, [Павел дене пырля лийше-влак,] пален нална.2Островышто илыше-влак мыланна кугу порылыкым ончыктеныт. Йӱр тӱҥалмылан да йӱштылан кӧра нуно тулым олтеныт да мемнам тушко ӱжыныт.3Павел укш оргажым поген, тулыш оптымыж годым, аяр кишке, шокшым шижын, тушеч лектын да тудын кидешыже кечалтын.4Островышто илыше-влак, Павелын кидыштыже кишке кечымым ужмеке, икте-весыштлан ойленыт: «Тиде айдеме, очыни, еҥым пуштшо. Теҥыз гыч тудо утлен гынат, Судитлыше тудлан илаш пӱрен огыл».5Но Павел кишкым тулыш рӱзалтен шуэн, кишке деч тудлан нимогай эҥгек лийын огыл.6Павел пуалаш тӱҥалеш але кенета колышо йӧрлеш манын, еҥ-влак шоненыт, кужу жап тидым вученыт, да тудын дене нимогай эҥгек лийдымым ужмеке, шонымыштым вашталтеныт да тудым юмо маныныт.

7Тиде вер деч тораште огыл остров вуйлатыше Публийын суртпечыже да пасужо-влак лийыныт. Тудо мемнам шкеж деке пуртен да кум кече поро кумылын унам ыштен.8Публийын ачаже шокшымужо да дизентерий дене черле киен. Павел тудын деке пурен, Юмылан кумалын да ӱмбакыже кидшым пыштен паремден.9Тыге лийме деч вара островышто илыше моло черле-влакат Павел деке толыныт да паремдыме лийыныт.10Нуно мыланна кугу пагалымашым ончыктеныт. Кунам каяш тарваненна, мыланна мо кӱлеш, чыла пуэныт.

11Кум тылзе гыч ме тышеч островышто телым эртарыше Диоскурманме александрийысе корабль дене теҥызыш лекна.12Сиракузыш миен шумеке, тушто кум кече лийна.13Тушечын Ригийыш миен лекна, ик кече гыч кечывалвел мардеж пуаш тӱҥалынат, кокымшо кечын Путеолыш толна.14Тушто иза-шольо-влакым вашлийна, нуно мемнам шым кечылан шкенышт дене кодаш йодыныт. Тыге Римыш корнынам шуенна.15Тусо иза-шольо-влак, мемнан толмо нерген колмеке, Аппий форум ден Кум таверне дек шумеш вашлияш лектыныт. Павел, нуным ужмеке, Юмылан таум ыштен, да кумылжо нӧлталтын.16Римышке миен шумекына, шӱдывуй кучен петырыме-влакым воеводылан пуэн коден, а Павеллан тудым оролышо сарзе дене посна илаш эрыкым пуэныт.

17Кум кече гыч Павел кугурак иудей-влакым ӱжын, погынымекышт, нунылан ойлен: «Иза-шольо-влак, шке калыкна ваштареш але ачана-влакын йӱлашт ваштареш нимом ыштен омыл гынат, мыйым Иерусалимыште руалтен кученыт да римлян-влакын кидышкышт пуэныт.18Нуно мыйым йодыштыныт, да пушташ йӧрышӧ нимогай титакем укеат, мыйым колтынешт ыле.19А иудей-влак тидын ваштареш лийыныт, сандене мылам кесарь ончылно судитлымым йодаш логалын. Туге гынат шке калыкем ӱмбаке нимогай титаклымашем уке.20Чыла тидлан кӧра мый тендам ӱжынам да, тендам ужын, мутланынем ыле. Израиль калыкын ӱшанен вучымыжлан кӧра мыйым тиде кепшыл дене шинчырлыме».21Нуно тудлан ойленыт: «Иудей гыч ме тыйын нерген нимогай серышым налын огынал, тушеч ик иза-шольынат тыйын нерген нимом удам увертараш але ойлаш толын огыл.22Но кузе шонымет нерген шке дечет колышташ кӱлешлан шотлена. Чыла вере еҥ-влак тендан туныктымашда ваштареш ойлат манын, ме палена».

23Нуно Павел дене вашлийме кече нерген мутланен келшеныт да палемдыме кечын эшеат шукын тудын илыме верыш толыныт. Павел, эрдене эрак тӱҥалын, кас марте нунылан Юмын Кугыжаныш нерген умылтарен да таныклен, Моисейын законешыже да пророк-влакын возымашешышт эҥертен, Иисус нерген нуным ӱшандараш тыршен.24Иктышт тудын ойлымыжым чынлан шотленыт, весышт ӱшанен огытыл.25Коклаштышт келшыдымаш лектынат, нуно каяш тарваненыт, тунам Павел тиде шомакым гына ойлен: «Пророк Исаия гоч мемнан ачана-влаклан Святой Шӱлыш чыным каласен:26
”Тиде калык деке кай да каласе:
пылыш дене колыштыда, но огыда умыло,
шинча дене ончеда, но огыда уж.
27Тиде калыкын шӱмжӧ пешкыдемын,
пылышышт пыкше колеш,
шинчаштым куменыт.
Сандене шинчашт дене огыт уж,
пылышышт дене огыт кол,
шӱмышт дене огыт умыло,
Мыланем нуным паремдаш манын,
Мый декем огыт савырне”.
28Тыгеракын, пален лийза: Юмын утарымашыжым чын Юмым палыдыме-влаклан колтымо, нуно тудын нерген колышташ тӱҥалыт!»29Павелын тидым ойлымекыже, шке коклаштышт чот ӱчашен, иудей-влак каеныт.

30Тыге Павел кок ий шке кӱшешыже илен да шкеж деке толшо-влакым чыланыштым пагален вашлийын,31Юмын Кугыжаныш нерген уверым шарен да Господь Иисус Христос нерген лӱдде да чарак деч посна туныктен.


*а 28:11 Диоскур – Йыгыр Юмо. Шояк юмо Зевсын эргыж-влак, корабль нерыште нунын сӱретышт лийын.

*б 28:26-27 Ис 6:9-10.

предыдущая глава Глава 28 следующая глава