Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 27

1-12 Павел Римыш кая. 13-38 Тӱтан. 39-44 Корабль шаланымаш.

1Мыланна Италийыш теҥыз корно дене каяш пунчалым лукмеке, Павелым да кучен петырыме моло икмыняр еҥым Август кесарьын полкысо Юлий лӱман шӱдывуйлан эскераш пуэныт.2Ме адрамитысе корабльыш шична, корабль Асийын сер воктенысе верлам эртышаш ыле, да ме теҥызыш лекна. Мемнан дене пырля Фессалоника гыч македон Аристарх лийын.3Вес кечын Сидоныш толна. Павел деке Юлий поро кумылан лийын, тудлан йолташыж-влак деке каяш да нунын полшымышт дене пайдаланаш эрыкым пуэн.4Тушечын теҥызыш лекмекына, ваштареш пуышо мардеж деч аралалташ манын, Кипр велке кайышна,5Киликий ден Памфилий тураште теҥызым эртышна да Ликийысе Мирыш толын лекна.6Шӱдывуй тушто Италийыш кайыше александрийысе корабльым муын да тушко мемнам шынден.7Шуко кече эркын ийын, Книд марте пыкше миен шуна. Чараклыше мардежлан кӧра, Салмоным эртен, мардеж деч аралыше Крит деке мийышна.8Сер воктечын пеш нелын ончык каен, Ласей ола воктене верланыше Сай Пристань манме верыш толна.

9Корнышто жап шуко эртенат, корабль дене ийын каяш лӱдыкшӧ лийын, пӱтым кучымо пагытат ынде эртен. Сандене Павел шижтарен:10«Йолташ-шамыч, мый ужам: мемнан корнына корабль ден сату-влаклан веле огыл, но мемнан илышланат эҥгекым да лӱдыкшым конден кертеш».11Но шӱдывуйжо корабль виктарыше ден корабль озалан Павелын ойлымыж деч утларак ӱшанен.12Тиде порт телым эртараш келшыше лийын огыл, сандене нунын кокла гыч шукышт умбаке каяш, Финикыш миен шуаш тӧчаш да телым тушто эртараш кӱлеш шоненыт. Финик – кас-кечывалвелыш да кас-йӱдвелыш почылтшо Критысе порт лийын.

13Кечывалвел лыжга мардеж пуаш тӱҥалынат, шонымына шуэш манын ӱшаненыт, парусым нӧлталыныт да Крит воктене ийын каеныт.14Но икмыняр жап гыч остров вес могырым «Эвроклидон» манме тӱтан мардеж тарванен.15Мардеж корабльым пуэн наҥгаен, мардеж ваштареш тудо ийын кертын огыл, ме виктараш тӧчымым чарненна, да мемнам мардеж лупшен коштыктен.16Ме Клавда манме изи островын ӱшык могырышкыжо логалынна да пушым пыкше веле утарен кертынна.17Пушым корабльыш кӱзыктеныт. Корабль ынже шалане манын, тудым вӱраҥ кандыра дене пеҥгыдемденыт. Сирт ошманерышке логалме деч лӱдын, парусым волтеныт, да тугак ийын коштынна.18Мемнам тӱтан мардеж чот кышкылтынат, эрлашым сатум вӱдыш кышкаш тӱҥалын улыт.19А кумшо кечын шке кидна денак корабльысе ӱзгар-влакым кышкен пытаренна.20Ятыр кече шӱдырат, кечат койын огыл, пеш тале тӱтан мардеж шучкыланен, сандене пытартышлан мемнан утаралт кодмылан чыла ӱшан йомын.

21Иктат шукертсек кочкын огыл. Тунам Павел нунын покшеке лектын шогалын да каласен: «Пӧръеҥ-влак! Мыйым колышташ кӱлеш ыле да Крит гыч кайыме ок кӱл ыле, тунам тыгай нелылыкыш да эҥгекыш огына шу ыле.22А ынде тендам чулым лияш ӱжам, тендан кокла гыч иктат чонжым ок йомдаре, корабль гына шалана.23Эртыше йӱдым мый декем Юмын Суксыжо толын. Мый Суксым колтышо Юмын еҥже да служитлышыже улам.24Суксо ойлен: ”Павел, ит лӱд! Тый кесарь ончылно шогышаш улат, да тый денет пырля корабльыште лийше-влакым чылаштымат Юмо тылат пӧлеклен”.25Садлан, пӧръеҥ-влак, чулым лийза. Кузе мыланем каласыме, тугак лиеш манын, мый Юмылан ӱшанем.26Мемнам иктаж-могай островыш мардеж луктын кудалтышаш».

27А латнылымше йӱдым, мемнам Адриатик теҥыз мучко тӱтан мардеж коштыктымо годым, пелйӱд жапыште, ала-могай мланде деке лишеммым корабльыште ыштыше-влак шижыныт.28А келгытым висымеке, коло важык улмым пален налыныт, вара изи кумдыкым эртымеке, угыч висеныт да латвич важык улмым паленыт.29Кӱан верыш логалме деч лӱдынытат, вӱдыш корабльын шеҥгел ужашыж гыч ныл якырым кудалтеныт да, чот тургыжланен, волгыжмым вученыт.30Нуно корабль гыч куржнешт улмаш да, пуйто корабль нер гыч якырым колташ манын, теҥызыш пушым волтеныт.31Павел сарзе-влаклан да шӱдывуйлан каласен: «Нине еҥ-влак кораблеш огыт код гын, те утлен огыда керт».32Тунам сарзе-влак пушым кылдыме кандырам руэныт да пушым теҥызыш колтеныт.

33Волгыжмо деч ончыч Павел чылаштым кочкаш ӱжын ойлен: «Таче латнылымше кече те чот тургыжланен вучеда да нимом огыда коч.34Сандене кочса манын йодам, тидыже тыланда илышдам арален кодашлан кӱлеш. Тендан вуйда гыч ик ӱп пырчат ок камвоч».35Тидым каласымеке, киндым налын, чылан ончылно Юмылан таум ыштен, тодылын да кочкаш тӱҥалын.36Тунам чылан кумылаҥыныт да шкештат кочкыныт.37Ме корабльыште чылаже кок шӱдӧ шымле куд еҥ лийынна.38Кочмеке, корабльым куштылемдаш манын, шыдаҥым теҥызыш кышкеныт.

39У кече тӱҥалмеке, мландым пален кертын огытыл, а тайылан иксам ужыныт да лиеш гын, корабльым тушко лишемдаш шоненыт.40Якырым нӧлталмеке, нуно теҥызыш лектыныт, кӱсмен кандырам мучыштареныт, ончыл парусым мардеж почеш нӧлталыныт да сер велке ийыныт.41Ошманерыш логалыныт, да корабль таляка вереш шинчын, нерже пижын да тарванен кертын огыл, а шеҥгелжым виян толкын шалаташ тӱҥалын.42Кучен петырыме кокла гыч, ийын лектын, нигӧ ынже курж манын, сарзе-влак чыланыштым пуштнешт улмаш.43Но Павелым шӱдывуй утарен кодынеже улмаш, сандене шонымыштым ышташ чарен, а ийын моштышо-влаклан эн ондак вӱдыш тӧршташ да серыш лекташ кӱштен,44молышт оҥа да корабль деч кодшо ужашла дене сер марте лекшаш улыт улмаш. Тыге чылан серыш утаралт лектыныт.


*а 27:14 Эвроклидон – эрвел-йӱдвел.

*б 27:39 Икса – залив.

*в 27:40 Кӱсмен – пуш корным виктарыше кольмо, руль.

предыдущая глава Глава 27 следующая глава