Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 26

1-32 Павел Агриппа ончылно ойла

1Павеллан Агриппа каласен: «Тый кызыт шкендым арален ойлен кертат». Тунам Павел кидым нӧлталын да шкенжым арален ойлаш тӱҥалын:

2«Агриппа кугыжа! Иудей-влакын чыла титаклымышт ваштареш таче тыйын ончылнет аралалт кертмемлан шкемым пиаланлан шотлем,3вет тый иудей-влакын илыш-йӱлаштым, ӱчашыме йодышыштым сайын палет. Сандене мыйым чытен колышт манын йодам.4Шке калыкем коклаште да Иерусалимыште рвезем годсекак мыйын кузе илымем чыла иудей-влак тӱҥалтыш гычак палат.5Мый фарисей лийынам да мемнан ӱшанымашнан эн пеҥгыде туныктымыж почеш иленам. Мыйым шукертсек палат; шонат гын, нуно тидым таныклен кертыт.6Ачана-влаклан Юмын сӧрымыжлан мый ӱшанем, сандене кызыт суд ончылно шогем.7Тиде сӧрымашын шукталтмыжлан ӱшаным пыштен, мемнан калыкын латкок тукымжо йӱдшӧ-кечыже Юмылан тыршен служитлат. Тиде ӱшанлан, Агриппа кугыжа, иудей-влак мыйым титаклат.8А мо? Колышым Юмын ылыжтымыжым те ӱшанаш лийдымылан шотледа мо?

9Назорей Иисусын лӱмжӧ ваштареш шуко ыштышаш улам манын, мыят шоненам.10Тидымак мый Иерусалимыште ыштенам: архиерей-влак деч тидлан эрыкым налмеке, шуко святой еҥым казаматыш шынденам, а кунам нуным пуштеденыт, мый тидлан йӱкем пуэнам.11Чыла синагогышто мый нуным чӱчкыдын мут кучаш шогалтенам да святойым ӧкымеш мыскылыкташ тӧченам, пеш кугу шыдем дене вес кундемласе олалаштат поктылынам.

12Тидланак, архиерей-влак деч властьым да правам налын, Дамаскыш каенам.13Агриппа кугыжа, кечывал тура мый пылпомыш гыч йолгышо волгыдым корнышто ужынам. Волгыдыжо кече дечат чот йолген, тудо мыйын да пеленем кайыше-влак йыр волгалтарен.14Ме чылан мланде ӱмбаке йӧрлынна, вара еврей йылме дене ойлымо йӱкым колынам, тудо мылам манын: ”Савл, Савл, молан тый Мыйым поктылат? Куат ваштареш тылат каяш неле”.15Мый йодынам: ”Господь, кӧ Тый улат?” Тудыжо каласен: ”Мый тыйын поктылмо Иисус улам.16Кынел, йол ӱмбак шогал, тый Мыйын служитлышем лият, ужметым да тыланет ончыктышашемым таныклаш тӱҥалат. Тиде пашашке шогалташ Мый тыланет конченам.17Мый тыйым шке калыкетын кидше деч утарем, а кызыт, кунам тыйым чын Юмым палыдыме-влак деке колтем, нунын дечат утарем.18Тый нунын шинчаштым почат, нуным пычкемыш гыч волгыдо деке, сатанан озаланымыж деч Юмо деке савырет. Тунам Мылам ӱшанымышт дене нунын языкыштым Юмо кудалта да святитлыме еҥ-влак коклаште нуно верыштым налыт”.

19Сандене, Агриппа кугыжа, мый пылпомышсо кончымылан ваштареш лийын омыл.20Ондак Дамаскыште да Иерусалимыште илыше-влаклан, вара уло Иудей мланде мучко да чын Юмым палыдыме-влак коклаште, чыланат языкыштым касарыктышт да Юмо деке савырнышт манын, увертарен туныктенам да языкыштым касарыктымылан келшен толшо пашам ышташ ӱжынам.21Тидлан мыйым иудей-влак храмыште руалтен кученыт да пуштнешт ыле.22Но Юмо полшымо дене таче мартеат изиланат, кугуланат таныклен шогем, пророк-влакат, Моисеят мо нерген ончык ужын ойленыт, тудын нергенак мыят ойлем, а нимо весе нерген огыл:23Христос орланен колышаш, колымаш гыч ылыжше кокла гыч икымше лийшаш да мемнан калыкланат, чын Юмым палыдыме-влакланат волгыдым увертарышаш ыле».

24Павелын тыге аралалт ойлымыж годым Фест йӱкым кугемден каласен: «Павел, тый ушым йомдаренат! Кугун тунеммет тыйым ушдымо лиймашке шукта».25«Уке, моткоч пагалыме Фест, – манын тудо, – мыйын ушем каен огыл, чын мут ден ушан ойым ойлем.26Кугыжа нине паша нерген пала, санденак мый тудлан вик ойлем. Нине паша гыч иктаж-мо тудлан палыдыме кодын манын, мый ом ӱшане. Тиде ӧрдыжтӧ лийын огыл.27Агриппа кугыжа, тый пророк-влаклан ӱшанет? Мый палем, ӱшанет».28Агриппа Павеллан каласен: «Христиан лияш тый мыйым изиш веле от ӱшандаре».29Павел ойлен: «Изиш але шуко, но Юмым сӧрвалем: тый веле огыл, а таче мыйым колыштшо-влак чыланат – тиде шинчыр деч посна гына – мыйын гаемак лийышт».

30Павел тидым ойлымеке, кугыжа, вуйлатыше, Вереника да нунын дене пырля шинчыше-влак кынел шогалыныт31да, кайышыла, шке коклаштышт ойленыт: «Тиде еҥ пуштмым але казаматыште кучымым чыныш лукшо нимогай титакым ыштен огыл».32А Агриппа Фестлан каласен: «Кесарь ончылан судитлалташ ок йод гын, тиде еҥым эрыкыш колташ лиеш ыле». Тыге Павелым кесарь деке колташ вуйлатыше шонен пыштен.


предыдущая глава Глава 26 следующая глава