Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 25

1-12 Павел кесарь ончылан судитлымым йодеш. 13-27 Павел – Агриппа кугыжа ончылно.

1Вуйлатыме кундемышкыже толмеке, Фест кум кече гыч Кесарий гыч Иерусалимыш каен.2-3Тунам архиерей-влак да иудей кокла гыч кугурак еҥ-влак тудлан Павел ӱмбак вуйым шийыныт, Павелым Иерусалимыш пӧртылтымӧ дене мыланна поро кумылетым ончыкто манын, сӧрвален йодыныт. Вет нуно Павелым шолып ваҥынешт да корнышто пуштнешт улмаш.4Павелым Кесарийыште оролымаште кучат, шкежат вашке тушко каем, манын Фест.5«Тыгеже, – каласен тудо, – тендан вуйлатыше-влак кокла гыч икмыняр еҥ тек мыйын пеленем кая да, тиде еҥын иктаж-могай титакше уло гын, тек тудым титакла.»

6Иерусалимыште кандаш але лу кече деч шуко огыл лиймеке, Фест Кесарийыш пӧртылын, а вес кечынже судитлыме верыш шинчын да Павелым кондаш кӱштен.7Павел толмеке, Иерусалим гыч толшо иудей-влак тудын йыр погынен шогалыныт, шуко неле титаклымашым ӱмбакше конденыт, но титаклымышт чын манын, ончыктен кертын огытыл.8Павел шкенжым арален ойлен: «Мый иудей закон ваштарешат, храм ваштарешат, кесарь ваштарешат нимогай титакым ыштен омыл».9Фест, иудей-влаклан йӧраш шонен, Павеллан вашештен: «Иерусалимыш кайынет? Тыйым титаклымым тушто мыйын вуйлатыме почеш ончена ыле».10Но Павел каласен: «Мый кесарьын судшо ончылно шогем, тудын ончылнак судитлалтшаш улам. Мый иудей-влак ваштареш нимогай титакым ыштен омыл, тидым тыят сайын палет.11Мый титакан улам да титакемже мыйым пуштмым чыныш лукшо гын, колымаш деч кораҥаш ом тӧчӧ, а мыйын ваштареш титаклымышт чын огыл гын, нигӧ мыйым нунын кидыш пуэн ок керт. Кесарь ончылно судитлалташ йодам».12Вара Фест каҥашым пуышыж-влак дене мутланен да вашештен: «Тый кесарьын судшым йодынат, кесарь декак кает».

13Икмыняр кече эртымеке, Кесарийыш Фестым саламлаш Агриппа кугыжа ден Вереника толыныт.14Нунын тушто шуко кечым эртарымекышт, Павел нерген пашам кугыжалан Фест тыге умылтарен: «Тыште казаматеш Феликсын кодымо еҥ уло.15Иерусалимыште лиймем годым иудей архиерей ден калык кугурак-влак тудын ӱмбаке вуйым шияш толыныт да титаканыш лукташ йодыныт.16Титаклыше-влакым шинчаваш ужаш да титаклыме ваштареш шкенжым арален ойлаш эрыкым пуыде, кеч-могай еҥымат пушташ рим йӱла почеш огыт пу манын, мый нунылан вашештенам.17Тыгеракын, нунын тышке толмекышт, вес кечынак, шуйкалыде, судитлыме верыш шинчынам да тиде еҥым ончыкем кондаш кӱштенам.18Титаклыше-влак тудым авырен шогалыныт, но мыйын вучымем гай ик титаклымашымат конден огытыл.19Нуно шке ӱшанымашышт да колышо ала-могай Иисус нерген ӱчашеныт. Тудын нерген Павел, ила манын, пеҥгыдын ойлен.20Тыгай ӱчашымаште кузе лияш, пален омыл, сандене мый йодынам: ”Иерусалимыш каен, тушто суд ончылан шогалнет мо?”21Но Август пунчалым лукмо марте Павел шкенжым оролымаште кодаш йодын, сандене, кесарь деке колтымешке, мый тудым оролымаште кучаш кӱштенам».22А Агриппа Фестлан каласен: «Тиде еҥым мыят колыштнем ыле». Тудыжо эрлак колышт кертат манын вашештен.

23Вес кечын Агриппа ден Вереника кугу пайремыш толмо гай толыныт, сарзе вуйлатыше да оласе эн пагалыме еҥ-влак дене пырля суд погынымо пӧлемыш пуреныт, да Фест кӱштымеке, Павелым конденыт.24Вара Фест каласен: «Агриппа кугыжа да мемнан дене пырля тиде пӧлемыш чыла погынышо-влак! Теве тиде еҥлан кӧра иудей-влак Иерусалимыштат, тыштат мылам вуйым шийыныт да тудо илышаш огыл манын кычкыреныт.25Но тудо пуштмым чыныш лукшым нимомат ыштен огыл манын, мый ужынам, а Август ончылно судитлалташ тудо шкеак йодын, сандене мый тудым тушко колташ шонен пыштенам.26Но кесарьлан возаш мыйын нимо раш уке. Сандене, тиде йодыштмо деч вара мыйын мом возаш лийже манын, тудым тендан ончыко, поснак тыйын ончыко, Агриппа кугыжа, конденам.27Мыйын шонымаште, кучен петырыме еҥым мо шотышто титаклымым ончыктыде, тудым кесарь деке колташ шот огыл».


*а 25:21 Август – тыште: лӱм огыл, а Рим императорым пагален лӱмдымаш. Тыгак – 25:25.

предыдущая глава Глава 25 следующая глава