Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 23

12-22 Павел ваштареш шолып мутланен келшымаш. 23-35 Павелым Кесарийыш кондат.

1Павел Синедрион ӱмбаке тӱткын ончен да каласен: «Иза-шольо-влак! Мый тачысе кече марте Юмын ончылно яндар чонан иленам».2А архиерей Ананий Павел воктене шогышо-влаклан тудым умшаж гыч пераш кӱштен.3Тунам Павел тудлан каласен: «Тый, ошемдыме пырдыж! Тыйым Юмо пера. Тый тыште шинчет да мыйым закон почеш судитлынет, шкеже мыйым пераш кӱштымет дене законым пудыртет».4Воктене шогышо-влак каласеныт: «Юмын архиерейжым вурсет?»5Павел вашештен: «Иза-шольо-влак, мый тудын архиерей улмыжым пален омыл. Возымо вет: ”Шке калыкетын вуйлатышыж нерген осал мутым ит ойло”».

6Синедрионышто ик ужашыже саддукей, а вес ужашыже фарисей-влак улмым паленат, Павел чот ойлаш тӱҥалын: «Иза-шольо-влак! Мый фарисей улам, фарисейын эргыже, колышо-влакын ылыж кынелмыштым ӱшанен вучымылан мыйым титаклат».7Тудын тыге манмекыже, фарисей ден саддукей-влак коклаште ӱчашымаш тӱҥалын да погынымаш шелалтын.8Вет саддукей-влакын ойлымышт почеш нимогай ылыжмат, Суксат, шӱлышат уке, а фарисей-влак чыла тидлан ӱшанат.9Чылан чот кычкыраш тӱҥалыныт, фарисей-влак кокласе закон туныктышо-влак кынел шогалыныт да ӱчашен ойленыт: «Мемнан шонымаште, тиде еҥ нимогай осалым ыштен огыл. Тудлан шӱлыш але Суксо ала чынак ойлен? Айста Юмын ваштареш огына лий».10Ӱчашымаш талышныме дене Павелым кӱрышт кышкен кертыт манын, полк вуйлатыше лӱдын да сарзе-влаклан тудым калык кокла гыч руалтен налаш да крепостьыш наҥгаяш кӱштен.

11А вес йӱдым Господь Павеллан кончен да каласен: «Пеҥгыдын шого, Павел. Кузе тый Мыйын нерген Иерусалимыште таныкленат, Римыштат тугак таныклышаш улат».

12Эрдене икмыняр иудей ойым пидын, Павелым пуштмешке, огына коч да огына йӱ манын товатлен.13Шолып ойым пидше еҥ нылле утла лийын.14Нуно архиерей ден калык кугурак-влак деке миеныт да ойленыт: «Павелым пуштмешкына ме нимомат умшаш огына пыште манын, мутым пуэн товатлышна.15Пуйто пашажым тӱткынрак тергаш манын, Павелым эрла тендан деке кондаш вуйлатыше деч Синедрион дене пырля кызытак йодса, а тышке конден шуктымо деч ончычак ме тудым пушташ ямде лийына».

16Павелын акажын эргыже шолып ойым пидме нерген колын, крепостьыш толын да Павеллан увертарен.17А Павел шӱдывуй кокла гыч иктыжым ӱжын да каласен: «Тиде рвезым вуйлатыше деке наҥгае, тудлан ала-мом увертарышашыже уло».18Тудыжо рвезым пеленже налын, вуйлатыше деке намиен да ойлен: «Кучен петырыме Павел мыйым ӱжын да тиде рвезым тый декет кондаш йодын. Тыланет ала-мом ойлышашыже уло».19Рвезым полк вуйлатыше, кидше гыч кучен, ӧрдыжкӧ кораҥден да йодын: «Мом мылам каласышашет уло?»20Рвезе вашештен: «Павел нерген пуйто утларак сайын палаш манын, иудей-влак эрла тудым Синедрионыш кондаш тый дечет йодаш мутланен келшеныт.21Тый нунылан ит ӱшане. Нунын кокла гыч нылле утла еҥ тудым шолып ваҥен шогат. Павелым пуштмешкына огына коч да огына йӱ манын, нуно товатлен ойленыт. Кызыт нуно, тидын дене келшыметым вучен, ямде шогат».22Тунам вуйлатыше: «Тидым мылам увертарымет нерген нигӧланат ит ойло», – манын да рвезым колтен.

23Вара вуйлатыше кок шӱдывуйым ӱжын да каласен: «Кесарийыш каяш кумшо шагат йӱдлан кок шӱдӧ йолешке сарзым, тыгак шымле имнешкым да умдым нумалше кок шӱдӧ еҥым ямдылыза.24Осел-влакымат ямдылыза. Тек Павелым кушкыжыктен шындат да лӱдыкшӧ деч посна вуйлатыше Феликс деке наҥгаят».25Вара тудо тыгай серышым возен:26«Клавдий-Лисий чот пагалыме вуйлатыше Феликслан: куане.27Тиде еҥым иудей-влак кученыт да пуштнешт ыле. Мый сарзе-влак дене миенам да, Рим граждан улмыжым пален налмеке, тудым утаренам.28Вара, тудым мо шотышто титаклымым палаш шонен, нунын Синедрионышкышт намиенам.29Тудым иудей закон дене кылдалтше тӱрлӧ ончалтыш шотышто титаклымым, тудым пуштмым чыныш лукшо але казаматыш шындаш ситыше нимогай титаклымаш укем мый ужынам,30а иудей-влакын тудын ваштареш шолып ойым пидмышт нерген увер кунам мый декем шуын, тудым тунамак тый декет колтенам, титаклыше-влаклан вуйшиймашыштым тыйын ончылно ойлаш кӱштенам. Таза лий».

31Сарзе-влак, кӱштымым шуктен, Павелым пырля налыныт да йӱдым Антипатридаш наҥгаеныт,32а эрлашыжым имнешке-влакым Павел дене колтеныт, молышт крепостьыш пӧртылыныт.33А имнешке-влак, Кесарийыш мийымеке, серышым вуйлатышылан пуэныт, Павелымат конден шогалтеныт.34Вуйлатыше серышым лудын да Павелын могай кундем гыч улмыж нерген йодын. Киликий гыч улмыжым пален налмеке,35каласен: «Кунам титаклыше-влакетат толыт, тунам тыйын пашатым ончен лектам». Вара Иродын кӱполатыштыже Павелым оролымаште кучаш кӱштен.


*а 23:5 Исх 22:28

*б 23:23 Кумшо шагат йӱд – мемнан жап дене индеш шагат кастене.

предыдущая глава Глава 23 следующая глава