Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 22

22-29 Павел полк вуйлатыше ончылно. 30–23:11 Павел Синедрион ончылно.

1«Иза-шольо да ача-влак! Ынде тендан ончылно шкемым арален ойлымем колыштса».2Еврей йылме дене каласкалаш тӱҥалмым колмеке, калык утыр шыпланен. Павел ойлен:3«Мый иудей улам, Киликийысе Тарсыште шочынам, но тиде олаште ончен куштеныт, Гамалиилын тунемшыже лийынам, мыйым ачана-влакын законыштлан сайын туныктеныт. Таче те могай улыда, мыят тугаяк лийынам, мыят Юмын верч чот шогенам.4Мый Господьын корныж дене коштшо-влакым колымашке шуктен поктылынам, пӧръеҥымат, ӱдырамашымат кучен, казаматышке шындылыктенам.5Тидын нерген архиерей да калык кугурак-влак чылан таныклен ойлен кертыт. Мый Дамаскыште илыше иудей иза-шольына-влаклан серыш-шамычымат нунын дечак налынам, тусо-влакымат руалташ да, пидын, Иерусалимыш мут кучаш кондаш манын, тушко каенам.

6Кайымем годым, кечывал тура, кунам Дамаск деке лишемынам, кенета мыйын йырем пылпомыш гыч кӱдыратле волгыдо йолгалтын.7Мый мланде ӱмбаке йӧрлынам да ”Савл, Савл, молан тый Мыйым поктылат?” манын ойлымо йӱкым колынам.8Мый вашештенам: ”Господь, кӧ Тый улат?” Тудо мыланем каласен: ”Мый тыйын поктылмо Назорей Иисус улам”.9Мый денем пырля лийше-влакат волгыдым ужыныт да чот лӱдыныт, но мылам Ойлышын йӱкшым колын огытыл.10Тунам мый йодынам: ”Господь, мылам мом ыштыман?” А Господь каласен: ”Кынел да Дамаскыш кае, мом тый ыштышаш улат, чыла тушто каласат”.11Йымыктарыше волгыдо шинчамым сокырым ыштен, сандене пырля лийше-влак мыйым Дамаскыш кид гыч вӱден намиеныт.

12Тушто Ананий лӱман еҥ лийын, тудо Юмын законым ӱшанлын шуктышо айдеме улмаш, Дамаскыште илыше иудей-влак тудым кӱкшын акленыт.13Мый декем толын, воктекем шогалын да каласен: ”Савл иза, шинчат почылтшо”. Тунамак мый тудым ужынам.14А тудо мылам ойлен: ”Шке эрыкшым пален налаш, Чын Ыштышым ужаш, Тудын ойлымо йӱкшым колаш ачана-влакын Юмышт тыйым ондакак ойырен налын.15Тый Тудын таныкше лият, мом ужмет да колмет нерген уло калыклан каласкалаш тӱҥалат.16Тыгеже мом юватылат? Кынел, тынеш пуро, Господь [Иисусын] лӱмжым ӱжын, языкет деч мушкылт”.

17Иерусалимыш пӧртылмекем, храмыште кумалмем годым мыйым кугу ӧрмаш авалтен,18да Господьым ужынам. Тудо мылам ойлен: ”Вашке тарване, Иерусалим гыч писынрак лектын кай, тыште Мыйын нерген таныклен ойлыметым шотыш огыт нал”.19А мый ойленам: ”Господь, Тылат ӱшаныше-влакым казаматыш шындымем да синагоглаште кырыктымем нуно палат.20Стефанын, Тыйын таныкетын, вӱржым йоктарыме годым мый туштак шогенам, тудым пуштмым сайлан шотленам да пуштшо-влакын вургемыштым ороленам”.21А Тудо мылам каласен: ”Кае, Мый тыйым торашке, чын Юмым палыдыме-влак деке, колтем”».

22Тиде шомак марте иудей-влак Павелым колыштыныт, а вара кычкыраш тӱҥалыныт: «Тыгайым мландӱмбачын пытаре! Тудо илышаш огыл!»23Нунын кычкырымышт, вургемыштым кушкедмышт да пуракым южыш кышкымышт годым24полк вуйлатыше Павелым крепостьыш пурташ кӱштен, могай амал дене нуно тудлан кычкырымыштым палаш манын, тудым сола дене кырен йодышташ шӱден.25А кунам тудым кыраш ӱштӧ дене шуялтарен пидыныт, Павел тушто шогышо шӱдывуй деч йодын: «Але тыланда Рим гражданым суд деч поснат кыраш лиеш?»26Тидым колмеке, полк вуйлатыше деке шӱдывуй миен да ойлен: «Мом тый ыштынет, ончо! Тиде еҥ Римын гражданже».27Тунам вуйлатыше Павел деке миен да йодын: «Мылам каласе, тый Римын гражданже улат мо?» Павел ойлен: «Туге».28Полк вуйлатыше вашештен: «Мый тиде гражданствым кугу окса дене налынам». А Павел манын: «А мый шочынак Римын гражданже улам».29Тудым кырен йодышташ ямдылалтше еҥ-влак тунамак кораҥыныт, а вуйлатыше, Павелын Рим граждан улмыжым пален налмекыже, тудым пидын пышташ кӱштымыжлан лӱдын.

30Иудей-влак Павелым молан титаклат манын, чыным палаш шонен, вес кечынже вуйлатыше тудын кепшылжым мучыштарен, архиерей-влаклан да уло Синедрионлан погынаш кӱштен. Вара Павелым конден, нунын ончылан шогалтен.


*а 22:14 Эрык – воля, желание.

предыдущая глава Глава 22 следующая глава