Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 20

1-6 Павелын Македоний ден Грецийыш миен коштмыжо. 7-12 Колышо Евтихым ылыжтымаш. 13-16 Троада гыч Милитыш миен коштмаш. 17-38 Апостол Павел Ефес оласе пресвитер-влак дене чеверласа.

1Калык пудыранымаш пытымеке, Павел тунемше-влакым ӱжыктен, кумылаҥден ойлен, вара чеверласен да Македонийыш каен.2Тусо верлам эртыме годым ӱшаныше-влаклан кумылаҥдыше мутым шуко ойлен, вара Грецийыш миен.3Тушто кум тылзе лийын, а кунам тудо Сирийыш кайынеже улмаш, шкенжын ваштареш иудей-влакын шолып кутырен келшымыштым пален налын да Македоний гоч пӧртылаш шонен пыштен.4Асий марте тудым Верий гыч Пиррын Сосипатр эргыже, Фессалоника гыч Аристарх ден Секунд, Дервий гыч Гаий, тыгак Тимофей, Асий гыч Тихик ден Трофим ужатеныт.5Нуно, ончык кайымеке, мемнам Троадаште вученыт.6А ме Шергинде кече пайрем деч вара Филипп гыч корабль дене каенна, вич кече гыч нунын деке Троадаш толынна, тушто шым кече лийынна.

7Шуматкече эрлашын, тунемше-влакын киндым тодыл кочкаш погынымекышт, Павел погынышо-влак дене мутланен. Вес кечынже тудо тышеч каяш шонен, сандене пелйӱд марте ойлен.8Мемнан погынымо кӱшыл пӧлемыште шуко лампе лийын.9Окнаште Евтих лӱман самырык пӧръеҥ шинчен. Павел кужу жап ойлен, сандене Евтих чот мален колтен, омо авалтенат, кумшо пачаш гыч камвозын. Кунам тудым нӧлталыныт, колышо улмаш.10Павел тудын деке волен, ӱмбакше возын, тудым ӧндалын да каласен: «Ида тургыжлане, чонжо лектын огыл».11Павел пӧлемыш пӧртылын, киндым тодыл кочкын, пешак кужун, волгыжаш тӱҥалмешке, мутланен, а вара лектын каен.12А Евтихым илышым вӱден конденыт, тидыже чылам чот куандарен.

13Ме ончыко тарванышна, корабльыш шична да Ассыш кайышна, тушто ме Павелым пырля налшаш улына ыле. Шкеже йолын каяш шоненат, мыланна тыге кӱштен каласен ыле.14Ме тудын дене Ассыште вашлийна, вара корабльыш шындышна да Митилиныш толна.15Тушечын кайышна да вес кечынже Хиос воктеке миен лекна, а эрлашынже Самосыш шуна, Трогиллийыште лиймеке, вес кечынже Милитыш мийышна.16Асийыште жапым йомдараш огыл манын, Павел Ефесым эртен каяш шонен пыштен. Йӧн лиеш гын, Павел Витлыгече пайремлан Иерусалимыш миен шуаш вашкен.

17Ефесысе пресвитер-влакым ӱжаш манын, Павел Милит гыч еҥ-влакым колтен18да, кунам пресвитер-влак толыныт, каласен:

«Асий кундемыш толмекем, тендан коклаштыда лиймем годым мый икымше кече гычак кузе иленам, те паледа.19Иудей-влак шолып кутырен келшымышт дене мыйым шуко нелылыкыш пуртеныт, но мый Господьын ӱҥышын илыше, шинчавӱд йӧре пашам ыштыше тарзыже лийынам.20Тыланда мо гына пайдале лийын, тудын нерген ойлымо деч кораҥын омыл, а тендам чыла калык ончылнат, пӧртыштыдат туныктенам.21Иудей-влакымат, эллин-влакымат мый, языкыштым касарыктен, Юмо деке савырнаш да мемнан Господьна Иисус Христослан ӱшанаш тыршен ӱжынам.22А кызыт Шӱлыш мыйым кепшылтен, да Иерусалимыш каем. Мый денем тушто мо лиеш – ом пале.23Но мыйым эрыкым йомдарымаш да нелылык вуча манын, Святой Шӱлыш чыла олаште палдара.24Туге гынат мый шке илышем шкаланем шергаканлан ом шотло. Эн ондак шке пашам – Господь Иисусын мылам ӱшанен пуымо служитлыме пашам – куанен вораҥдарынем: Юмын порылыкшо нерген Поро Уверым каласкалымым шуктынем.

25Мый тендан дене лийынам да Юмын Кугыжаныш нерген каласкаленам, а тендан кокла гыч мыйым тылеч вара иктат угыч ок уж манын, мый кызыт палем.26Сандене мый тыланда таче увертарем: тендан кокла гыч иктаж-кӧжӧ йомын пыта гын, мый титакан омыл,27мый тендам Юмын уло эрыкше дене палдарыме деч чакнен омыл.28Шкендан верч тыршыза, Шӱлышын тыланда вуйлаташ пуымо кӱтӱ верчат тыршыза, Господь Юмын шке Вӱржӧ дене налме Черкыжым кӱтыза.29Мый палем: кайымекем тендан коклашке кӱтӱм чаманыдыме осал пире-влак пурат.30Тунемше-влакым почешышт наҥгаяш манын, шкендан кокла гычат чыным пужен ойлышо-влак лектыт.31Сандене шекланен шогыза, шарныза: кум ий йӱдшӧ-кечыже шинчавӱд йӧре мый чарныде тендан кокла гыч кажныдам туныктенам.32Иза-шольо-влак, ынде мый тендам Юмылан да Тудын порылык шомакшылан ӱшанен пуэм. Тендам пеҥгыдемдаш Тудын куатше уло да святитлыме чыла еҥже-влак коклаште наследствым тыландат пуэн кертеш.33Мый нигӧн шийжымат, шӧртньыжымат, вургемжымат ынем нал ыле.34Шкеат паледа, мыланем да пеленем лийше-влаклан мо кӱлын гын, теве тиде кидем дене пашам ыштен налынам.35Тыге пашам ыштен, черле-влаклан полшаш да Господь Иисусын ”Пуымыж годым айдеме налмыж годсо деч пиаланрак” манме шомакшым шарнаш кӱлмым мый чыла годымат тыланда ончыктенам».

36Тыге каласымеке, Павел сукен шинчын да нунын дене пырля кумалын.37Тунам чыланат чот шортыныт, Павелым ӧндалыныт да шупшалыныт.38Тудым кызыт пытартыш гана ужыт манын каласымыжлан эн чот ойгыреныт. Вара корабль марте ужатеныт.


*а 20:27 Эрык – воля, желание.

предыдущая глава Глава 20 следующая глава