Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 19

1-10 Павел Ефес олаште. 11-20 Скеван эргыж-влак. 21-40 Ефесыште пуламыр.

1Аполлосын Коринфыште лиймыж годым Павел курыкысо кундемлам эртен да Ефесыш толын, тушто икмыняр тунемшым вашлийын да2нунын деч йодын: «Ӱшанаш тӱҥалмекыда, те Святой Шӱлышым налында мо?» А нунышт тудлан вашештеныт: «Святой Шӱлыш улмо нерген ме колынат огынал».3Павел йодын: «Тендан могай тынеш пуртымаш лийын?» Нуно ойленыт: «Тиде Иоаннын тынеш пуртымыжо лийын».4Павел каласен: «Языкым касарыктыме тынеш пуртымаш дене Иоанн тынеш пуртен. Но тудо шкеж деч вара Толшылан, Христос Иисуслан, ӱшанышаш улыда манын, калыклан ойлен».5Тидым колмеке, нуно Господь Иисусын лӱмжӧ дене тынеш пуреныт.6А кунам нунын ӱмбак Павел кидым пыштен, Святой Шӱлыш ӱмбакышт волен, да нуно йот йылме-влак дене ойлаш да пророкла каласкалаш тӱҥалыныт.7Нуно чылаже латкок пӧръеҥ наре лийыныт.

8Павел синагогыш миен, Юмын Кугыжаныш нерген кум тылзе лӱдде каласкален, мутланен да ӱшандарен.9Но кунам икмынярышт шӱмыштым пешкыдемденыт да ӱшанен огытыл, калык ончылно Господьын корныж нерген осалын ойленыт, тунам тудо нунын деч кораҥын, тунемше-влакым нунын деч ойырен да кече еда Тираннын школыштыжо туныктен мутланен.10Тыге кок ий шуйнен, сандене Асий кундемыште илыше-влак чыланат – иудейжат, эллинжат – Господь Иисусын шомакшым колыныт.

11Юмо ӧрыктарыше пашам Павелын кидше дене шуко ыштен.12Пӱжвӱд ӱштмӧ шовычшымат, ӱшталме вургемжымат тудын могыржо гыч черле-влак ӱмбаке пыштеныт, да нуно паремыныт, кӧргышт гыч осал шӱлыш-влак лектыныт.

13Осал шӱлышым поктен лукташ манын, тӱрлӧ вере юлен коштшо южо иудеят Господь Иисусын лӱмжым кучылташ тӱҥалын. Нуно тыге ойленыт: «Павелын увертарен ойлымо Иисусын лӱмжӧ дене тыланда кӱштена».14Скева лӱман иудей архиерейын шым эргыжат тыге ышташ тӱҥалын.15Но осал шӱлыш нунылан тыге вашештен: «Иисусым палем, Павелжат палыме. А те кӧ улыда?»16Тылеч вара осал шӱлышан еҥ нунын ӱмбаке кугу куат дене кержалтын да чыланыштымат сеҥен. А нунышт, чараматын да сусырген пытыше, тудо пӧрт гыч куржын лектыныт.

17Тыге лиймым Ефесыште илыше чыла иудей ден эллин пален налын. Нуно чылан чот лӱдыныт. Господь Иисусын лӱмжым чапландареныт.18Ӱшанаш тӱҥалше-влак кокла гыч шукынжо толыныт, осал пашашт нерген почын ойленыт.19А юзыланыше кокла гыч ятырынже, тунемме книгаштым поген, уло калык ончылно йӱлалтеныт. Нунын чыла акыштым ушен шотлымеке, витле тӱжем ший окса наре лектын.20Тыге Господьын шомакше вияҥын да куатшым ончыктен шоген.

21Чыла тиде лийме деч вара Павел шӱм-чон шӱлышыж дене Македоний ден Ахаийым эрташ да Иерусалимыш каяш шонен пыштен да каласен: «Тушто лиймеке, мый Римымат ужшаш улам».22Македонийыш тудо кок полышкалышыжым, Тимофей ден Ерастым, колтен, а шкеже икмыняр жаплан Асиеш кодын.

23Тиде жапыште Господьын корныжо верч изи огыл пудыранымаш лектын.24Олаште Артемидан изи храмже-влакым ший дене ыштыше Димитрий лӱман шийӱзгар мастар илен. Тудо кидпашаче-влаклан шагал огыл парышым конден.25Кызыт тудо нуным да тыгаяк пашам ыштыше молымат поген да каласен: «Йолташ-влак, те паледа: мемнан улан лиймына тиде пашаш негызлалтеш.26Те ужыда да колыда, кузе саде Павел Ефесыште веле огыл, а чумыр Асий мучко гаяк шагал огыл калыкым чын корно гыч кораҥден, вет тудо ”айдеме кид дене ыштыме юмо-влак – юмо огытыл” манын ӱшандара.27Тидыже мемнан пашанан чапшым волтымо дене веле огыл лӱдыкшым ышта, а кугу Артемида юмын храмжат нимолан шотлалташ ок тӱҥал, чыла Асийыште да пӱтынь тӱняште пагалыме Артемидан лӱмнерже вола».

28Тыгайым колмеке, нуно чот ажгыненыт да кычкыраш тӱҥалыныт: «Ефесысе Артемида – моткоч кугу!»29Уло ола чот пудыранен. Еҥ-влак Павел дене пырля коштшо, Македоний гыч улшо Гаий ден Аристархым руалтен кученыт да ик еҥ семын чылан театрыш писын каеныт.30Павел калык тӱшкашке лекнеже улмаш, но тунемше-влак тудым колтен огытыл.31Асийысе вуйлатыше-влак кокла гычат икмыняр йолташыже, театрыш ынже мий манын, тудлан шижтараш колтеныт.32Тиде жапыште иктышт иктым кычкыреныт, весышт – весым, погынымаш шотдымо лийын, да погынышо-влак кокла гыч утларакышт молан толмыштымат пален огытыл.33Иудей-влак Александрым ончыко шӱкеныт, тудлан калык тӱшка гыч каҥашым пуэныт. Александр кидшым нӧлталын, калыклан шкенжым арален ойлынеже улмаш.34Но тудын иудей улмыжым пален налмеке, чыланат ик йӱк дене кычкыраш тӱҥалыныт: «Ефесысе Артемида – моткоч кугу!» Тыге кок шагат наре кычкыреныт.

35Пытартышлан оласе возгалыше калыкым лыпландарен кертын да каласен: «Ефесысе еҥ-влак! Ефес ола кугу Артемида юмын храмжым да Диопетым арален ончышо семын чыла еҥлан палыме огыл мо?36Тидын шотышто ӱчашымаш уке гын, чылаланда лыпланыман да нимомат шоналтыде ыштыман огыл.37Нине пӧръеҥ-влак храмым агыше але тендан юмыдам мыскылыше огытыл гынат, те нуным тышке конденда.38Димитрий да тудын дене пырля лийше кидпашаче-влакын иктаж-кӧн ӱмбаке вуйшиймашышт уло гын, тидлан суд погынымаш уло, тыгак проконсул-влак улыт, тек нунын ончылно икте-весе ӱмбаке вуйшиймашым пуат.39А иктаж-могай вес йодмашда уло гын, закон почеш эртарыме погынымаште пунчалме лиеш.40Таче мо лиймылан кӧра мемнам тумам нӧлталмылан титаклыме лӱдыкшӧ уло, а тыгай шотдымо погынымашым ме нимо денат чыныш луктын огына керт». Тыге ойлен, калыкым шалатен колтен.


а* 19:21 «Шӱм-чон шӱлышыж дене» – тидым «Шӱлышын таратымыж дене» манынат кусараш лиеш.

предыдущая глава Глава 19 следующая глава