Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 18

1-17 Павел Коринфыште. 18-23 Павелын Антиохийыш пӧртылмыжӧ. 24-28 Ефесыште Аполлос туныктен каласкала.

1Тылеч вара Павел, Афиным коден, Коринфыш каен.2Тушто тудо Понтеш шочшо Акила лӱман иудейым да тудын Прискилла ватыжым вашлийын. Чыла иудейлан Клавдий Римым коден каяш кӱштен, садлан нуно шукерте огыл Италий гыч толыныт улмаш. Павел нунын деке миен.3Тудо нунын гаяк сомылым ыштенат, пырля пашам ышташ кодын. Нунышт вынер омашым ыштыше лийыныт.4Шуматкече еда, синагогышто мутланен, иудей-влакымат, эллин-влакымат ӱшандараш тыршен.

5А Сила ден Тимофейын Македоний гыч толмекышт, Иисусын Христос улмыж нерген иудей-влаклан таныклаш Павелым Шӱлыш кумылаҥден.6Но иудей-влак торешланеныт да мыскыленыт, сандене Павел вургемжым почкалтен да нунылан каласен: «Тендан вӱрда шкендан вуйда ӱмбалне, тыште мыйын титакем уке, ынде чын Юмым палыдыме-влак деке каем».7Тушеч каен да Израильын Юмыжлан кумалше Иуст лӱман еҥ деке миен. Тудыжын пӧртшӧ синагог воктене лийын.8А синагог вуйлатыше Крисп чыла мӧҥгысыжге Господьлан ӱшанаш тӱҥалын. Коринфыште илыше кокла гыч Павелым колыштшо-влак шукышт ӱшаненыт да тынеш пуреныт.

9Йӱдым кончымаште Павеллан Господь каласен: «Ит лӱд, ойло, шып ит лий.10Мый тый денет пырля улам. Тыланет осалым нигӧ ок ыште: тиде олаште Мыйын еҥем шуко уло».11Юмын шомаклан туныктен, Павел тушто ик ий да куд тылзе илен.

12Ахаийыште Галлионын проконсул улмыж годым иудей-влак Павел ваштареш икоян шогалыныт, тудым судитлыме верыш конденыт13да ойленыт: «Тиде еҥ Юмылан закон почеш огыл кумалаш тарата».14А кунам Павел ойлаш тӱҥалнеже улмаш, иудей-влаклан Галлион манын: «Иудей-влак, иктаж-могай титак але осал паша гын, тендам колышташ амал лиеш ыле,15но кунам туныктымо, лӱм-влак да тендан законда нерген ӱчашымаш кая, шке ончыза, мый тыгайым ынем судитле».16Вара нуным судитлыме вер гыч поктен колтен.17Тунам эллин-влак чылан синагог вуйлатыше Сосфеным руалтен кученыт да судитлыме вер ончылан кыреныт, но Галлионым тиде тургыжландарен огыл.

18Эше икмыняр жапым эртарымеке, Павел иза-шольо-влак дене чеверласен да, корабльыш шинчын, Сирийыш каен, тудын дене пырля Прискилла ден Акила лийыныт. Павел Юмылан мутым пуэн улмаш, сандене тудо Кенхрейыште ӱпшым тӱредыктен.19Ефесыш шумеке, тушан Прискилла ден Акилам коден, шкеже синагогыш пурен да иудей-влак дене мутланен.20Кунам тудым тыште кужунрак лияш йодыныт, Павел келшен огыл,21а нунын дене чеверласен да каласен: «Лишемше пайремым мылам Иерусалимыште эртараш кӱлешак, а тендан деке Юмо пӧртылтынеже гын, пӧртылам». Тыге Ефес гыч каен. [Акила ден Прискилла Ефесеш кодыныт.]22Кесарийыш мийымеке, тудо Иерусалимыш миен, черкым саламлен да Антиохийыш каен.23Тушто икмыняр жапым эртарымеке, лектын да радам дене Галатий кундем ден Фригийым эртен, чыла тунемшын чонжым пеҥгыдемден.

24Александриеш шочшо Аполлос лӱман ик иудей Ефесыш толын. Тудо ойлаш пешак уста лийын да Возымашым сайын пален.25Аполлос Господьын корныжлан туныктымо лийын, чон йӱлен ойлен, Господь нерген сайын туныктен, но Иоаннын тынеш пуртымыжым веле пален.26Аполлос синагогышто лӱдде ойлаш тӱҥалын. Акила ден Прискилла, тудым колыштмеке, шке декышт налыныт да Господьын корныж нерген эшеат сайын умылтареныт.27А кунам Аполлос Ахаийыш каяш шонен пыштен, порын вашлияш кумылаҥдаш манын, иза-шольо-влак тусо тунемше-влаклан серышым возеныт. Тушко мийымекыже, Юмын порылыкшылан кӧра ӱшанаш тӱҥалше-влаклан Аполлос кугу пайдам конден.28Тудо иудей-влакын ӱшандарымыштым калык ончылно пеш талын шӧрен ойлен, Иисусын Христос улмыжым, Возымаш гыч шомакым кучылтын, чыныш луктын ончыктен.


*а 18:3 Вынер омаш – палатка.

*б 18:18 Ончо: Числ 6:1-21.

предыдущая глава Глава 18 следующая глава