Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 16

1-5 Павел ден Сила деке Тимофей ушна. 6-10 Павеллан Македоний гыч еҥ конча. 11-15 Филиппыште Лидиян Христос деке савырнымыже. 16-40 Филиппыште Павел ден Силам кучен петырымаш.

1Дервий ден Листраш Павел миен шуын. А тушто Тимофей лӱман ик тунемше лийын. Тудын аваже Христослан ӱшаныше иудей улмаш, но ачаже – эллин.2Тимофей нерген Листрасе да Иконийысе иза-шольо-влак порын гына ойленыт.3Тудым Павел пырля налаш шонен. Тимофейын ачаже эллин улмым чылан паленыт, сандене тиде верлаште илыше иудей-влаклан кӧра тудын дене пӱчмӧ йӱлам эртарен.

4Ола гыч олашке эртымышт годым нуно Апостол ден Иерусалимысе пресвитер-влакын лукмо пунчалышт нерген ӱшаныше-влаклан каласкаленыт да тудым шуктен шогаш кӱштеныт.5Тыге черке-влак ӱшанымаште пеҥгыдемыныт, да еҥышт кече еда ешаралтыныт.

6Фригий ден Галатий мландым эртен кайымекышт, Святой Шӱлыш Асий кундемыште Христос нерген шомакым ойлаш пуэн огыл.7Мисий марте миен шумеке, нуно Вифинийыш каяш шоненыт, но Шӱлыш тидым ышташ пуэн огыл.8Мисийым эртымеке, нуно Троада олашке шуыныт.

9Тыште йӱдым Павел кончымашым ужын. Тудын ончылныжо македоний еҥ шоген да йодын: «Македонийышке тол, мыланна полшо».10Павел кончымашым ужмеке, ме тунамак Македонийыш каяш ямдылалташ тӱҥална. Тушто илыше-влаклан Поро Уверым каласкалаш Господь мемнам ӱжеш манын, ме умылышна.

11Тыге ме, корабльыш шинчын, Троада гыч кайышна, вигак Самофракийыш миен лекна, а вес кечынже – Неапольыш,12тушечын Филиппыш мийышна. Тиде – Македонийын икымше ужашысе ола, Римын колонийже. Тиде олаште ме икмыняр кечым эртарышна.13Шуматкечын ола гыч эҥер деке лекна, тушто кумалмаш лиеш манын шонышна. Ме шична да тышке погынышо ӱдырамаш-влаклан ойлышна.14Тушто Фиатира ола гыч улшо, Израильын Юмыжлан кумалше Лидия лӱман ӱдырамаш ыле, тудо шемалге-йошкар куэмым ужален илен. Лидия Павелым колыштын, да ойлымыжым шӱмышкыжӧ пышташ Господь тудын чонжым почын.15Лидиян да мӧҥгысыж-влакын тынеш пурымекышт, тудо мемнам шкеж деке ӱжын: «Те мыйым Господьлан поро чон дене ӱшанышылан шотледа гын, мыйын суртышкем илаш пурыза». Мемнам тыгак ыштыктен.

16Икана кумалме верыш кайымына годым шинчанужшо шӱлышан ик тарзе ӱдырым корнышто вашлийна, ончык ужын моштымыж дене тудо озаж-влаклан кугу парышым конден.17Ӱдыр Павел почеш да мемнан почеш кычкырен коштын: «Нине еҥ-влак Кӱшнысӧ Юмын тарзыже улыт, нуно мыланна утаралтме корным увертарат!»18Шуко кече тудо тыге ыштен. Пытартышлан Павел шыдешкен савырнен да шӱлышлан каласен: «Тудын кӧргыж гыч лекташ Иисус Христосын лӱмжӧ дене тылат кӱштем». Шӱлыш тунамак лектын.

19Тунам ӱдырын озаже-влак, парыш лекме ӱшанышт пытымым ужмеке, Павел ден Силам руалтен кученыт да вуйлатыше-влак деке, калык погынымо верыш, конденыт.20Оласе тӧра-влак деке кондымеке, каласеныт: «Нине еҥ-влак иудей улыт, нуно оласе калыкым пудыратылыт21да тугай йӱлам туныктат, кудым мыланна, Рим калыклан, налашат, шукташат ок лий».22Калыкат Павел ден Сила ваштареш кынелын, а тӧра-влак нунын ӱмбачышт вургемыштым кушкед шуаш да тоя дене кыраш кӱштеныт.23Нуным чот кыреныт, казаматышке шуэныт да ороллан чот эскераш шӱденыт.24Тыгай кӱштымым колмеке, казамат орол, йолышкышт калыпым чиктен, нуным эн кӧргӧ верышке петырен.

25Пелйӱд жапыштырак Павел ден Сила кумалыныт да Юмым моктен муреныт, а казаматышке петырыме-влак нуным колыштыныт.26Кенета моткоч чот мланде чытырналтын, казаматын негызшат тарванен, тунамак чыла омса почылтын, чыланыштынат шинчырышт мучыштен.27Казаматын оролжо помыжалтын, почылтшо омса-влакым ужын да петырыме-влак куржын пытеныт шонен, садлан кердыжым луктын, шкенжым шке пуштнеже улмаш.28Но Павел виян кычкыралын: «Шкаланет осалым ит ыште! Ме чыланат тыштак улына».

29Орол тулым чӱкташ йодын, казаматыш куржын пурен да Павел ден Сила ончылан чытырен кумык возын.30Вара нуным тӱжвак луктын да йодын: «Мыйын озам-влак! Утаралташ ынде мылам мом ыштыман?»31Нуныжо вашештеныт: «Господь Иисус Христослан ӱшане, тунам тый шкежат, мӧҥгысет-влакат утаралтыт».32Павел ден Сила ороллан да тудын мӧҥгыштыжӧ улшо-влаклан чылаштлан Господьын шомакшым ойленыт.33Йӱдым, тудо шагатыштак, орол нуным пеленже наҥгаен, сусырыштым мушкын. Жапым шуйкалыде, шкежат, мӧҥгысыж-влакат тынеш пуреныт.34Вара орол нуным шке пӧртышкыжӧ конден, сийлаш тӱҥалын да Юмылан ӱшанаш тӱҥалмыжлан уло мӧҥгысыж дене пырля куанен.

35Волгыжмеке, оласе тӧра-влак, нуным эрыкыш лукташ кӱлеш манын каласаш, казамат орол деке шке пашаеҥыштым колтеныт.36Тидын нерген казамат орол Павеллан увертарен: «Оласе тӧра-влак тендам эрыкыш лукташ кӱштен колтеныт, сандене ынде лекса да тыныслык дене кайыза».37Но Павел нунылан каласен: «Мемнам, Рим кугыжанышын гражданже-влакым, суд деч посна уло калык ончылно кырен, казаматыш шуэныт. А ынде шолып луктын колтынешт? Уке, тек нуно толыт да шкештак мемнам луктыт».38Пашаеҥ-влак тиде ойым оласе тӧра-влаклан ойленыт. Петырыме-влакын Рим кугыжанышын гражданже улмыштым пален налмеке, оласе тӧра-шамыч моткоч лӱдыныт,39нунын деке миен, кутырен сӧрасаш тӧченыт, нуным петырыма гыч луктыныт да ола гыч каяш йодыныт.

40Казамат гыч лекмеке, Павел ден Сила Лидия деке миеныт, тушто иза-шольо-влакым ужыныт да нуным кумылаҥденыт, вара тушеч каеныт.


*а 16:24 Калып – колода.

предыдущая глава Глава 16 следующая глава