Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 14

1-7 Иконийыште. 8-20 Листраште. 21-28 Сирийысе Антиохийыш пӧртылмаш.

1Иконийыште Павел ден Варнава адак иудей-влакын синагогышкышт пуреныт да туге туныктен каласкаленыт, моткоч шуко иудей ден эллин ӱшанаш тӱҥалын.2Но ӱшаныдыме иудей-шамыч иза-шольо-влак ваштареш чын Юмым палыдыме-влакым таратеныт да сырыктеныт.3Павел ден Варнава тыште ятыр жап лийыныт, Господь нерген лӱдде ойленыт. Тудыжо нунын кидышт дене палдарыше палым да ӧрыктарыше пашам ыштен да тидын дене Шкенжын порылык шомакшым таныклен.

4Тыгеракын, оласе калык шелалтын, иктышт иудей-влак могырышто лийыныт, весышт – Апостол-влак могырышто.5Вара чын Юмым палыдыме-влак да иудей-влак вуйлатышышт дене пырля Павел ден Варнавалан зияным ышташ да, ӱмбакышт кӱм кышкен, нуным пушташ шоненыт.6Апостол-влак тидын нерген пален налыныт, Ликаоний кундемысе Листра ден Дервий олалашке да нунын воктенсе верлашке куржыныт.7Туштат Поро Уверым каласкаленыт.

8Листраште йыжыҥдыме йолан ик пӧръеҥ илен. Тудо шочынак окшак улмаш, эре шинчен веле, нигунам коштын огыл.9Тудо Павелын ойлымыжым колыштын. Павел тудын ӱмбаке ончалын да, паремаш ӱшанымыжым ужын,10йӱкым кугемден каласен: «Иисус Христос Господьын лӱмжӧ дене тыланет ойлем: йолет ӱмбак вийнен шогал». Окшак еҥ тунамак тӧрштен кынелын да кошташ тӱҥалын.

11Павелын мом ыштымыжым ужмеке, еҥ-влак, йӱкым кугемден, ликаон йылме дене ойлаш тӱҥалыныт: «Мемнан деке айдеме сын дене юмо-влак воленыт!»12Варнавам нуно Зевс манын лӱмденыт, а вӱден ойлымыжлан Павелым Ермий маныныт.13Ола ончылно Зевсын храмже шоген, да Зевслан кумалше карт капка ончык ӱшкыж ден аршаш-влакым конден, калык дене пырля надырым пуынеже улмаш.14Но Апостол-влак, Варнава ден Павел, тидын нерген колмеке, ӱмбал вургемыштым кушкедыныт, калык тӱшкаш куржын пуреныт да кычкыреныт:15«Пӧръеҥ-влак, молан тыге ыштеда? Меат тендан гаяк айдеме гына улына. Ме тыланда Поро Уверым ойлена, чыла кӱлдымаш деч кораҥын, илыше Юмо деке савырнаш йодына. Тудо пылпомышым, мландым, теҥызым да тушто чыла мо улшым пӱрен.16Эртыше жапыште калык-влаклан шке корнышт дене каяш чарен огыл.17Тыгодымак порым ыштымыж дене Шкенжым эреак палдарен шоген: мыланна пылпомыш гыч йӱрым колтен, саска лектышым жапыштыже пуэн, мемнам теммеш пукшен, чоннам куандарен».18Тыге ойлен, нунын лӱмеш надырым ынышт кондо манын чарен да кажным мӧҥгышкыжӧ каяш пыкше ӱшандарен кертыныт.

Павел ден Варнаван тушан кодын туныктымышт годым19Антиохий да Иконий гыч икмыняр иудей толын, а [Апостол-влакын] лӱдде ойлымышт годым калыкым нунын деч кораҥаш ӱшандарен да каласен: «Нине еҥ-влак нимо чыным огыт ойло, чыла шойыштыт». Толшо-влак калыкым пудыратеныт. Павел ӱмбаке кӱм кышкеныт, вара, колышылан шотлен, ола гыч шӱдырен луктыныт.20Но кунам тунемше-влак йырже погыненыт, Павел кынелын да олашке пӧртылын, а вес кечынже Варнава дене пырля Дервийыш каен.

21Тиде олаште Поро Уверым каласкалымеке да ятыр еҥым тунемшым ыштымеке, нуно мӧҥгеш Листраш, Иконийыш да Антиохийыш пӧртылыныт,22тунемше-влакын шӱм-чоныштым пеҥгыдемденыт, Христослан ӱшанымаште чоткыдо лияш кумылаҥденыт. Нуно ойленыт: «Мыланна Юмын Кугыжанышыш шуко нелылык гоч пураш логалеш».23Павел ден Варнава кажне черкылан пресвитер-влакым шогалтеныт, кумалме да пӱтым кучымо деч вара нуным ӱшаныме Господьыштлан ончаш коденыт.

24Вара Павел ден Варнава, Писидий гоч эртен, Памфилийыш толыныт.25Пергийыште Господьын шомакшым каласкалымеке, Атталийыш каеныт,26а тушечын, корабльыш шинчын, Антиохийыш миеныт. Кызыт мучашыш шуктымо пашам ышташ нуным тыштак Господьын порылыкшылан ӱшанен пуэныт улмаш.27Толмекышт, нуно черке погынымашым чумыреныт, Юмо нунын дене мом ыштымым, чын Юмым палыдыме-влаклан ӱшанымаш омсам почмым увертареныт.28Туштыжо тунемше-влак дене шагал огыл жап лийыныт.


*а 14:12 Зевс – грек-влакын тӱҥ шояк юмышт. Ермий (Гермес, Меркурий) – грек-влакын шояк юмышт кокла гыч иктыже, шояк юмо-влакын уверкондышышт.

*б 14:15 Пӱрен – сотворил.

предыдущая глава Глава 14 следующая глава