Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 13

1-3 Варнава ден Савлын пашашт. 4-12 Апостол-влак Кипрыште Юмын Увержым каласкалат. 13-52 Писидийысе Антиохийыште.

1Антиохийысе черкыште икмыняр пророк ден туныктышо лийын: Варнава, Нигер манме Симеон, Кириней гыч Луций, тетрарх Ирод дене пырля кушшо Манаил да Савл.2Господьлан служитлымышт да пӱтым кучымышт годым Святой Шӱлыш каласен: «Мый Варнава ден Савлым посна пашалан ӱжынам, тиде пашам шукташ нуным Мыланем ойырен шогалтыза».3Тунам нуно пӱтым кученыт, кумалыныт, Варнава ден Павел ӱмбаке кидым пыштеныт да нуным колтеныт.

4Святой Шӱлышын колтымо Варнава ден Павел Селевкийыш толыныт, тушечын, корабльыш шинчын, Кипрыш каеныт.5А Саламинышке шумекышт, иудей-влакын синагогыштышт Юмын шомакым увертарен туныктеныт. Иоанн пырля лийын да нунылан полшен.

6Нуно Паф марте островым пӱтынек эртеныт. Тушто Вариисус лӱман иудейым вашлийыныт. Тудыжо юзо да шояк пророк лийын,7Сергий-Павел проконсул дене улмаш. Сергий-Павел ушан пӧръеҥ лийын. Юмын шомакым колыштмыжо шуын да Варнава ден Савлым шкеж деке ӱжын.8Но Елима юзо – лӱмжӧ тидымак ончыкта – нунын ваштареш лийын, проконсулым ӱшанымаш деч кораҥдаш тыршен.9Тунам Савл, тудым тыгак Павел маныныт, Святой Шӱлыш дене темалтын, юзын ӱмбаке туран ончалын10да каласен: «О, диаволын эргыже! Тый тӱрлӧ ондалчык да тӱрлӧ осал паша дене тич темынат. Тый чыла чынын тушманже улат! Господьын вияш корныжым кадыртылмым от чарне мо?11А теве Господьын кидше тыйын ваштареш виктаралтын, тый сокыр лият да палемдыме жап марте кечым от уж». Тунамак юзым пич пычкемыш авалтен да тудо, тышке-тушко савырнен, вӱден наҥгайышым кычалын.12Мо лиймым ужын, Господьын туныктымыжлан проконсул чот ӧрын да Господьлан ӱшанен.

13Павел да тудын дене пырля коштшо-влак Паф гыч корабльыш шинчын каеныт да Памфилийысе Пергийыш толыныт. Тушто Иоанн нунын деч ойырлен да Иерусалимыш пӧртылын.14А нунышт Пергий гыч умбаке каеныт да Писидийысе Антиохийыш толыныт, шуматкечын синагогыш пуреныт да шинчыныт.15Законым да пророк-влакын возымыштым лудмо деч вара синагог вуйлатыше-влак нунылан каласаш колтеныт: «Иза-шольо-влак, калыкым кумылаҥден каласаш мутда уло гын, ойлыза».16Павел кынелын, кидым нӧлталын да каласен:

«Израильын пагалыме еҥже-влак да Юмылан лӱдын кумалше-влак, колыштса:17Израиль калыкын Юмыжо мемнан ачана-влакым ойырен налын да Египетыште йот еҥ семын лиймышт годым тиде калыкым кугемден. Шкенжын виян кидше дене тудым Египет гыч луктын18да нылле ий наре ир мландыште нуным пукшен ашнен,19Ханаан мландыште шым калыкым пытарен да нунын мландыштым шке калыкшылан шеледен пуэн.20Тылеч вара пророк Самуилын жапше марте ныл шӱдӧ витле ий наре нунылан судья-влакым пуэн.21Вара нуно кугыжам йодыныт, да Юмо нунылан Кисын Саул эргыжым, Вениамин тукым гыч пӧръеҥым, пуэн. Тудо нылле ий кугыжаланен.22Вара Юмо тудым кораҥден да кугыжаштлан Давидым шогалтен, тудын нерген таныклен каласен:
”Мый шӱмемлан келшыше пӧръеҥым,
Иессейын Давид эргыжым, муынам,
тудо Мыйын чыла шонымем шукта”.
23Тудын тукымжо гыч Юмо, сӧрымыж семынак, Израильлан Утарыше Иисусым пуэн.24Иисус толмо деч ончыч Иоанн уло Израиль калыклан, языкыштым касарыктен, Юмо деке савырнаш да тынеш пураш кӱлмӧ нерген увертарен.25Шке пашажым мучашке шуктымыж годым Иоанн каласен: ”Кӧлан мыйым шотледа, мый тудо омыл, но теве почешем Весе толеш, мый Тудын йолчием кылжым рудашат ом йӧрӧ”.

26Иза-шольо-влак, Авраам тукымын эргышт да тендан коклаште Юмылан лӱдын кумалше-влак! Тиде утарымаш нерген шомакым тыланда колтымо.27Иерусалимыште илыше-влак да нунын вуйлатышышт Иисусын кӧ улмыжым пален огытыл, Тудым титаканыш лукмышт дене пророк-влакын шуматкече еда лудмо шомакыштым шуктеныт.28Пуштмым чыныш лукташ нимогай амалым муын огытыл гынат, Иисусым пушташ Пилат деч йодыныт.29Тудын нерген мом возымым чыла шуктымеке, пу меҥге гыч волтеныт да шӱгарыш пыштеныт.30Но Юмо Тудым колымаш гыч ылыжтен.31Иисус Шкеж дене пырля Галилей гыч Иерусалимыш толшо-влаклан ятыр кече шуко гана кончен. А ынде нуно мемнан калык ончылно Тудын таныкше улыт.

3233Ме кызыт тыланда Поро Уверым каласена: Юмо мемнан ачана-влаклан мом сӧрен, тудым нунын йочаштлан, мыланна, шуктен. Кокымшо псаломышто возымо семын, Иисусым ылыжтен. Тушто ойлалтеш:
”Тый Мыйын Эргым улат,
Мый таче Тыйым шочыктенам”.
34Юмо Иисусым колымаш гыч ылыжтен гын, Тудо ынде шӱйын кийымашке ок пӧртыл. Тидын нергенак Юмо тыге каласен:
”Мый Давидлан сӧрымӧ
чын да вашталтдыме суапым тыланда пуэм”.
35Вес вереат ойлен:
”Шке Святоетлан шӱйын кияш от пу”.
36Шке жапыштыже Юмын эрыкшылан служитлымеке, Давид колен. Тудым ача-кочаже воктен тоеныт, да тудын капше шӱйын.37А Кӧм Юмо ылыжтен, Тудын капше шӱймашым ужын огыл.38Тугеже, иза-шольо-влак, пален лийза: Иисуслан кӧра тыланда языкдам касарымаш увертаралтеш.39Кушто те Моисейын законжо гоч чыныш лектын кертын огыдал, тушто уло ӱшаныше-влак Иисус гоч чыныш лектыт.40Шекланыза, тендан дене пророк-влакын ойлымышт семын ынже лий. Нуно ойленыт:41
”Ончалза, игылтше-влак, ӧрза да йомза:
Мый тендан кечылаште ӧрыктарыше пашам ыштем,
иктаж-кӧ тыланда тидым каласкала гынат,
огыда ӱшане ыле”».

42Кунам Павел ден Варнава иудей-влакын синагогышт гыч лектыныт, чын Юмым палыдыме-влак вес шуматкечынат тидын нергенак каласкалаш йодыныт.43Погынымаш гыч шаланен кайымеке, чын Юмым ончыч палыдыме еҥ-влак да иудей-влак кокла гыч ятырышт Павел ден Варнава почеш каеныт, а Павел ден Варнава нунын дене мутланеныт да Юмын порылыкшым кучен илаш сӧрваленыт.

44Юмын шомакшым колышташ вес шуматкечын пӱтынь ола гаяк погынен.45Тынар калыкым ужмеке, иудей-влак чот кӧраненыт, Павелын ойлымыж ваштареш шогеныт да осалын вурсеныт.46Тунам Павел ден Варнава лӱдде каласеныт: «Юмын шомакшым эн ондак тыланда каласкалаш кӱлеш ыле, но те тудын деч кораҥыда, шкендам курымашлык илышлан йӧрдымым ыштеда, сандене ме чын Юмым палыдыме-влаклан ойлаш тӱҥалына.47Господь мыланна тыге кӱштен:
”Мый Тыйым чын Юмым палыдыме-влакын волгыдыштлан шогалтенам,
тӱня тӱр марте Тый утарымаш лият”».

48Тидым колмеке, чын Юмым палыдыме-влак куаненыт да Господьын шомакшым моктеныт, курымашлык илышлан палемдыме-влак чылан ӱшаненыт.49Господьын шомакше уло кундем мучко шарлен.50Но иудей-влак Юмылан кумалше да чот пагалыме ӱдырамаш-влакым, тыгак оласе кугурак-влакым таратеныт. Нунышт Павел ден Варнавам поктылаш калыкым кынелтеныт да кундемышт гыч поктен колтеныт.51Йолышт гыч пуракым нунын ваштареш почкалтен, Павел ден Варнава Иконийыш каеныт.52А тунемше-влак куан да Святой Шӱлыш дене темыныт.


*а 13:22 Пс 88:21, 1 Цар 13:14.

*б 13:32-33 Пс 2:7.

*в 13:34 Ис 55:3.

*г 13:35 Пс 15:10.

*д 13:36 Эрык – воля, желание.

*е 13:41 Авв 1:5.

*ж 13:47 Ис 49:6.

предыдущая глава Глава 13 следующая глава