Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 12

1-5 Иаковым пуштмаш да Петрым кучыктымаш. 6-19 Казамат гыч Петрын утлымыжо. 20-25 Иродын колымыжо.

1Тудо жапыште Ирод кугыжа черкыш коштшо-влак кокла гыч икмынярышт ӱмбаке, осалым ышташ манын, кидым нӧлталын.2Тудо Иоаннын Иаков изажым керде дене пуштыктен.3Тыге ыштымаш иудей-влаклан келшымым ужынат, вара Петрымат кучыктен, тидыже Шергинде пайрем годым лийын.4Кучымеке, тудым казаматыш шынден да ныл еҥан ныл сарзе тӱшкалан оролаш коден. Кугече деч вара Петрым Ирод калык ончык лукнеже улмаш.5Тыгеракын, Петрым казаматыште ороленыт, а тиде жапыште черке тудын верч Юмылан чарныде кумалын.

6Петрым Ирод калык ончыко лукнеже улмаш. Тылеч ончычсо йӱдым кок шинчыр дене шинчырлыме Петр кок сарзе коклаште мален. Орол-влак казамат омса воктенат ороленыт.7Кенета Господьын Суксыжо лектын шогалын да пӧлем волгалт каен, Петрым Суксо ӧрдыжшӧ гыч тӱкалтен помыжалтарен да каласен: «Кынел вашкерак». Петрын кидше гыч шинчыр мучыштен.8Суксо тудлан ойлен: «Ӱштал, йолышкет йолчиемым чие». Петр тыгак ыштен. Вара Суксо каласен: «Ӱмбал вургеметым чий да почешем мий».9Петр лектын да почешыже каен, Суксын ыштымыже чын улмо нерген пален огыл, а шинчажлан конча шонен.10Нуно орол-влакым ик вере эртеныт, вара вес вере, олаш лекме кӱртньӧ капка деке миен шуыныт, тудыжо нунылан шкеак почылтын. Нуно лектыныт, ик изуремым эртымеке, Суксо кенета тудым коден каен.11Тунам Петрын шонымыжо рашемынат, каласен: «Ынде мый чынжымак палем: Господь Суксыжым колтен, мыйым Иродын кидше деч да иудей калыкын мый денем мо лийшашым вучымыж деч утарен».

12Тидым умылымеке, Мариян, Марк манме Иоаннын аважын, пӧртшӧ деке толын, тушко кумалаш шукын погыненыт улмаш.13А кунам Петр капкам тӱкалтен, Рода лӱман тарзе ӱдыр ончалаш лектын.14Петрын йӱкшым паленат, куанымыж дене капкам почын огыл, а куржын пурен да Петр капка воктене шога манын увертарен.15А погынышо-влак тудлан каласеныт: «Тый ушым йомдаренат мо?» Но ӱдыр чакнен огыл, а нунышт вашештеныт: «Тиде тудын Суксыжо».16Петр капкам тӱкалымым чарнен огыл, а почмекышт, тудым ужын, чот ӧрыныт.17Шыпланышт манын, Петр кидшым нӧлталын да Господь тудым казамат гыч кузе лукмо нерген нунылан каласкален, вара манын: «Тидын нерген Иаковлан да иза-шольо-влаклан увертарыза». Петр тушеч лектын да вес верыш каен.

18Петр дене мо лиймым пален огытылат, эрдене сарзе-влак чот тургыжланаш тӱҥалыныт.19А Ирод Петрым кычалыктен, тудым муын огытылат, орол-влак деч йодыштын, нуным пушташ кӱштен, а шкеже Иудей гыч Кесарийыш каен да тушто икмыняр жапым эртарен.

20Тир ден Сидонышто илыше-влаклан Ирод шыдешкыше лийын, а нунышт тудын деке икоян толыныт, полатысе тӧрам, Властым, шке могырышкышт савыреныт да тыныслыкым йодыныт. Нуно Иродын вуйлатыме кундемже гыч кочкышым налыныт.21Палемдыме кечын Ирод, кугыжан вургемым чиен, судитлыме верыш шинчын да нунылан ойлаш тӱҥалын,22а калык кычкырен: «Тиде Юмын йӱкшӧ, а айдемын огыл!»23Ирод Юмын чапшым нӧлтен огыл, сандене Господьын Суксыжо тудым тунамак перен, Иродым шукш-влак кочкыныт, тудо колен.

24А Юмын шомакше вияҥын да шарлен.25Варнава ден Савл, полышым пуымо пашам шуктымекышт, пеленышт Марк манме Иоанным налыныт да Иерусалим гыч Антиохийыш пӧртылыныт.


*а 12:1 Тиде Ирод – Ирод Агриппа I.

предыдущая глава Глава 12 следующая глава