Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 11

1-18 Иерусалимыште Петрын умылтарымыже. 19-30 Антиохийысе черке.

1Чын Юмым палыдыме-влакат Юмын шомакым шӱмышкышт пыштеныт манын, Апостол-влак да Иудейысе иза-шольо-влак колыныт.2Петрын Иерусалимыш толмекыже, пӱчман-влак тудым титаклаш тӱҥалыныт:3«Тый пӱчдыман еҥ-влак деке пуренат да нунын дене кочкынат», – маныныт.

4А Петр нунылан радам дене каласкалаш тӱҥалын:5«Мый Иоппий олаште лийынам да кумалынам, тунам мыйым кугу ӧрмаш авалтен да кончымашым ужынам: кӱшыч волышо лопка вынер гайым ныл лукшо дене пылпомыш гыч мый декем волтеныт.6Мый тудым тӱткын онченам да нылйола коштшо мландӱмбалсе чонан-влакым, янлыкым, нушкын коштшо да кавасе кайык-влакым ужынам.7Тыгак мылам ойлышо йӱкымат колынам: ”Кынел, Петр, шӱшкыл да коч”.8А мый манынам: ”Уке, Господь, нимогай шакше але ару огыл мыйын умшашкем нигунамат пурен огыл”.9Пылпомыш гыч йӱк кокымшо гана мылам ойлен: ”Мом Юмо эрыктен, тудым тый ару огыллан ит шотло”.10Чыла тиде кум гана лийын, вара чылажат угыч пылпомышко налалтын.11Тунамак мыйын илыме пӧрт ончылан кум еҥ шогалын. Нуным мый декем Кесарий гыч колтеныт улмаш.12Изишат кокытеланыде нунын дене каяш Шӱлыш мылам каласен. Нине куд иза-шольо мый денем пырля каен, да ме ӱжшӧ еҥын пӧртышкыжӧ пуренна.13Тудо мыланна шке пӧртыштыжӧ Суксым ужмыж нерген каласкален. Суксо тудлан ойлен: ”Иоппийыш Петр манме Симоным ӱжын кондаш еҥ-влакым колто.14Тудо тыйымат, мӧҥгысет-влакымат утарыше шомакым тыланет ойла”.15А ойлаш тӱҥалмекем, тӱҥалтыште мемнан ӱмбаке волымо семынак, нунын ӱмбакат Святой Шӱлыш волен.16Тунам мый Господьын кузе ойлымыжым шарналтышым: ”Иоанн вӱд дене тынеш пуртен, а те Святой Шӱлыш дене тынеш пуртымо лийыда”.17Тугеже, Господь Иисус Христослан ӱшанаш тӱҥалмекына, Юмо мыланна мом пуэн, нуныланат тугайымак пуэн гын, Юмылан чаракым ышташ кӧ мый улам?»

18Тидым колыштмеке, чылан лыпланеныт да Юмым моктен ойленыт: «Тугеже, Шкенжым палыдыме-влакланат Юмо языкыштым касарыкташ да илышым налаш йӧным пуэн».

19Стефаным пуштмо деч вара тӱҥалше поктылмашлан кӧра шаланен кайыше-влак Финикий, Кипр, Антиохий марте шуыныт. Нуно Христос нерген шомакым иудей-влак деч молылан нигӧлан каласкален огытыл.20Туге гынат нунын коклаште икмыняр еҥ Кипр да Кириней гыч лийын, нунышт, Антиохийыш толмеке, Господь Иисус нерген Поро Уверым эллин-влакланат каласкаленыт.21Господьын кидше нунын дене лийын, пешак шукын Господьлан ӱшанаш тӱҥалыныт да Тудын велке савырненыт.

22Тидын нерген уверым Иерусалимысе черке колын, да Варнавам Антиохийыш колтеныт.23Тудо, толмекыже, Юмын порылыкшым ужынат, моткоч куанен да чылаштымат Господь дене уло шӱм-чон дене ушнен шогаш ӱжын.24Тудо Святой Шӱлыш да ӱшанымаш дене тич темше поро пӧръеҥ лийын. Господь деке еҥ-влак шукырак ушненыт.25Вара Варнава Тарсыш Савлым кычалаш каен, тудым муын да Антиохийыш конден.26Нуно тушто идалык мучко черкым погеныт да шуко еҥым туныктеныт. Антиохийыште тунемше-влакым эн ондак христиан манаш тӱҥалыныт.

27Тудо кечылаште Иерусалим гыч Антиохийыш пророк-влак толыныт.28Нунын кокла гыч иктыже, Агав лӱманже, кынел шогалынат, уло тӱня мучко кугу шужымаш лийшаш нерген Шӱлыш кумылаҥдыме дене ончылгоч палдарен. Шужымашыже Клавдий кесарь годым лийын.29Тунам тунемше-влак, кажныже кертмыж семын, Иудейысе иза-шольо-влаклан полышым колташ пунчалыныт.30Нуно тыгак ыштеныт, погымыштым Варнава ден Савл дене пырля пресвитер-влаклан колтеныт.


предыдущая глава Глава 11 следующая глава