Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 10

1-8 Петрым Корнилий шкеж деке ӱжеш. 9-33 Петрлан кончымаш. 34-43 Корнилийын пӧртыштыжӧ Петрын ойлымыжо. 44-48 Корнилий да моло йот тукым ӱмбаке Святой Шӱлыш вола.

1Кесарийыште Корнилий лӱман ик пӧръеҥ лийын, тудо италий манме полкысо шӱдывуй улмаш.2Тудо чыла мӧҥгысыж дене пырля Юмылан лӱдын кумалше да Тудым уло чон дене пагалыше лийын, калык кокласе йорло-влаклан эре полшен шоген да чарныде Юмылан кумалын.3Икана Корнилий индешымше шагат годым кончымаште Юмын Суксыжым раш ужын. Суксо тудын деке пурен да каласен: «Корнилий!»4Суксо ӱмбаке ончен, Корнилий лӱдын каласен: «Мо, Господь?» Суксо тудлан вашештен: «Юмо тыйын кумалметым да йорло-влаклан поро пашам ыштыметым шотыш налын.5А ынде Симон лӱман айдемым ӱжын кондаш Иоппий олашке еҥ-влакым колто. Тудым Петр манынат лӱмдат.6Тудо коваштым ийлыше Симон дене уна лийын ила, пӧртшӧ теҥыз воктене шинча. Тыйым да чыла мӧҥгысетым утарыше шомакым Петр тыланет ойла».7Суксо тудлан тыге каласен кайымеке, Корнилий кок тарзыжым да пеленже улшо кокла гыч Юмым уло чон дене пагалыше ик сарзыжым ӱжын.8Мо лиймым каласкалымеке, нуным Иоппийышке колтен.

9Вес кечын, колтымо еҥ-влак корнышто лийме да ола деке лишемме годым, Петр куд шагатыштырак пӧрт леведыш ӱмбаке кумалаш кӱзен.10Вара тудо шужымым шижын, кочмыжо шуын. Кочкаш ямдылыме годым тудым кугу ӧрмаш авалтен,11тудо почылтшо пылпомышым да шкеж деке кӱшыч волышо лопка вынер гайым ужын, тудыжым кылдыме ныл лукшо дене мланде ӱмбаке волтеныт.12Тушто мландӱмбалсе ныл йолан тӱрлӧ янлык ден вольык, нушкын коштшо, кавасе кайык-влак лийыныт.13Вара йӱк тудлан каласен: «Кынел, Петр, шӱшкыл да коч».14Но Петр вашештен: «Уке, Господь, мый нигунам нимогай шакшым але ару огылым кочкын омыл».15Тунам тудлан йӱк кокымшо гана каласен: «Мом Юмо эрыктен, тудым ару огыллан ит шотло».16Тыге кум гана лийын, вара лопка вынер вигак пылпомышко налалтын.

17Тиде кончымаш мом ончыкта манын, Петрын ӧрын шогымыж годым Корнилийын колтымо еҥже-влак, Симонын пӧртшӧ кушто улмо нерген йодыштын, пален налмеке, капка воктек толын шогалыныт18да йӱкым кугемден йодыныт: «Петр манме Симон тыште уна лийын ила мо?»19Петр эше кончымаш нерген шонкален, а Шӱлыш тудлан каласен: «Теве кум еҥ тыйым кычалеш.20Нуным Мый колтенам, сандене кынел, воло да изишат ит кокытелане, нунын дене пырля кай».21Шкеж деке Корнилий деч колтымо пӧръеҥ-влак деке Петр волен да каласен: «Мый кычалме еҥда улам. Те могай амал дене толында?»22Нунышт ойленыт: «Мемнам шӱдывуй Корнилий колтен. Тудо чын ыштыше, Юмылан лӱдын кумалше айдеме, чыла иудей калыкат тудын нерген порын ойла. Тыйым шке пӧртышкыжӧ ӱжын кондаш да ойлыметым колышташ Корнилийлан святой Суксо кӱштен».23Вара Петр нуным ӱжын пуртен да унам ыштен.

А вес кечын нунын дене пырля каен, пеленже Иоппийысе иза-шольо-влак кокла гыч южышт каеныт.24Вес кечын нуно Кесарийыш толын шуыныт. Корнилий родо-тукымжым да лишыл йолташыж-влакым ӱжын улмаш, нуным вучен.25Петрын пурымыж годым Корнилий тудым вашлийын да, йолжо деке кумык возын, вуйым савен.26А Петр тудым кынелтен да каласен: «Кынел, мый шкежат айдеме веле улам».27Вара, тудын дене мутланен, пӧртыш пурен, шуко погынышым ужын28да нунылан каласен: «Иудейлан йот тукым еҥ дене кылым кучаш але тудын деке пураш чарыме нерген те паледа, но ик еҥымат шакшылан але ару огыллан шотлаш ок лий манын, Юмо мылам ончыктен.29Сандене, мыйым ӱжмеке, торешланыде толынам, тыгеже йодам: могай амал дене те мыйым ӱжында?»

30Корнилий каласен: «Кум кече ончыч тиде шагат марте мый пӱтым кученам да индешымше шагатыште шке мӧҥгыштем кумалынам. Кенета мыйын ончылнем йолгыжшо вургеман айдеме кончен31да каласен: ”Корнилий, тыйын кумалметым колмо, да йорло-влаклан поро пашам ыштыметым Юмо ушышкыжо пыштен.32Тугеже Иоппийыш шке еҥет-влакым колто да Петр манме Симоным ӱжын кондо, тудо коваште ийлыше Симонын пӧртыштыжӧ теҥыз воктене уна лийын ила, Петр тый декет толеш да чыла ойла”.33Мый тунамак тый декет еҥем-влакым колтенам, толметше пешак сай. Тылат Юмо мом каласаш кӱштымым колышташ ме ынде чылан Юмо ончылно улына».

34Тунам Петр ойлаш тӱҥалын: «Юмын чыла еҥым ик семын ончымыжым кызыт чынак умылышым.35Тудлан лӱдын кумалше да чын почеш ыштыше еҥ, кеч-могай калык гыч лийже, Юмылан келша.36Израиль эрге-влаклан Тудо шке шомакшым колтен, Иисус Христос гоч тыныслык нерген Поро Уверым пуэн. Иисус Христосшо – чыла айдемын Господьшо.37Иоаннын увертарен ойлымо тынеш пуртымаш деч вара, Галилей гыч тӱҥалын, уло Иудей мучко мо лиймым те паледа:38Юмо Назарет Иисусым Святой Шӱлыш да вий-куат дене шӱрен палемден. Иисус пелен Юмо лийын, сандене Тудо порым ыштен да диаволын кид йымалныже лийше-влакым чыланыштымат паремден коштын.39Иудей-влакын элыштышт да Иерусалимыште Иисус мом ыштен, чылажланат ме танык улына. Тудым пу меҥгеш пудален пуштыныт,40а кумшо кечын Юмо Тудым ылыжтен да Тудлан кончаш йӧным ыштен.41Но Иисус уло калыкланна огыл, а мыланна, Юмын ончылгоч ойырен налме танык-влаклан гына, кончен. Колымаш гыч ылыж кынелмекыже, ме Тудын дене пырля кочкын да йӱын улына.42Колышымат, илышымат судитлаш Юмо Тудым шогалтен манын, калыклан увертараш да таныклаш Иисус мыланна кӱштен.43Чыла пророк-влак таныклат: Иисуслан ӱшаныше кажне еҥын языкшым Тудын лӱм дене Юмо кудалта».

44Петрын тидым каласкалымыж годым тудым колыштшо-влакын чыланыштын ӱмбакышт Святой Шӱлыш волен.4546Нунын палыдыме тӱрлӧ йылме дене ойлымыштым да Юмым чапландарымыштым колын, Святой Шӱлышын пӧлекшым чын Юмым палыдыме калык гыч улшо еҥ-влак ӱмбакат волтымылан Петр дене пырля толшо, Христослан ӱшаныше пӱчман-влак чылан ӧрыныт. Тунам Петр каласен:47«Мемнан семынак Святой Шӱлышым налше нине еҥ-влакым вӱд дене тынеш пурташ иктаж-кӧ чарен кертеш мо?»48Вара нунылан Иисус Христос лӱмеш тынеш пураш кӱштен. А нунышт Петрым икмыняр кече шкешт дене лияш йодыныт.


*а 10:3 Индешымше шагат – кызытсе жап дене 15 шагат.

*б 10:9 Пӧрт леведыш тусо верлаште кӱвар гай тӧр лийын, чӱчкыдынак еҥ-влак тушто лийыныт.

*в 10:14 Иудей-влак могай янлык да вольык шылым кочкын кертыныт да могай шылже ару огыл улмым Моисейын законжо раш палемден. Мутлан, нушкын коштшо-влакын шылыштым кочкаш ок лий улмаш (Лев 11).

*г 10:44-46 Ончо тыгак Ап. паш 2:2-4.

предыдущая глава Глава 10 следующая глава