Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 5

1-11 Ананий ден Сапфира. 12-16 Ӧрыктарыше пале ден чудо-влак. 17-42 Апостол-влакым поктылмаш.

1Ананий лӱман ик пӧръеҥ ден Сапфира ватыже погыштым ужаленыт.2Налме оксаж гыч Ананий икмыняр ужашыжым шкаланже шылтен коден, тидым ватыжат пален. Молыжым конден да Апостол-влакын йол воктекышт пыштен.3Но Петр каласен: «Ананий, молан тый сатаналан шӱметым авалташ эрыкым пуэнат? Молан тый Святой Шӱлышлан шойышташ шоненат да мландылан налме окса гыч ужашыжым шкаланет шылтен коденат?4Але мландетше ужалыме деч ончыч тыйын лийын огыл? Але тудым ужалымылан налме оксат тыйын лийын огыл? Кузе тый тыгайым ышташ шонен пыштенат? Тый айдемылан огыл, а Юмылан шойыштынат».5Тыгай шомакым колмеке, Ананий йӧрлын да чонжо лектын. Тидым колыштшо-влакым чыланыштымат кугу лӱдмаш авалтен.6А самырык еҥ-влак тудым леведыныт, нумал луктыныт да тоеныт.

7Иктаж кум шагат эртымеке, тушко ватыжат пурен, мо лиймым тудо пален огыл.8А Петр тудын деч йодын: «Каласе мылам, тынареш мо те мландыдам ужаленда?» Сапфира вашештен: «Туге, тынареш».9Но Петр тудлан каласен: «Молан те Господьын Шӱлышым тергаш мутланен келшенда? Теве тыйын мариетым тойышо-влакын йол йӱкышт омса деке лишемеш, нуно тыйымат нумал луктыт».10Сапфира тунамак тудын йолжо воктеке камвозын, да чонжо лектын. Самырыкрак пӧръеҥ-влак пуреныт, Сапфирам колышым ужыныт да марийже воктеке луктын тоеныт.11Черкым да тидын нерген колшо-влакым чыланыштымат кугу лӱдмаш авалтен.

12Апостол-влакын кидышт дене калыкыште палдарыше пале да ӧрыктарыше паша шуко ышталтын. Ӱшаныше-влак Соломонын леведышан кудывечыштыже ик ой дене пырля лийыныт.13Ӧрдыж еҥ кокла гыч нунын деке ушнаш иктат тоштын огыл, туге гынат калык нуным кӱкшын аклен.14Утларак да утларак пӧръеҥ ден ӱдырамаш-влак Господьлан ӱшанаш тӱҥалыныт, да ӱшаныше-влак ешаралтыныт.15Тыгеракын, эртен кайыше Петрын кеч ӱмылжӧ логалже манын, черле-влакым уремышке луктыныт, вакшышыш да кроватьыш пыштеныт.16Тыгак воктенысе олала гыч шукын Иерусалимыш погыненыт, черлым да осал шӱлыш кучыман-влакым кондеденыт. Нунышт чылан паремыныт.

17А архиерей да тудын дене пырля улшо-влак – нуныжо саддукей тӱшка гыч лийыныт – чот кӧраненыт,18Апостол-влакым кученыт да калык казаматыш петыреныт.19Но Господьын Суксыжо йӱдым казамат омсам почын, нуным луктын да каласен:20«Кайыза да храмыште шогалза, тиде илыш-шот нерген калыклан чыла каласкалыза».21Тиде мутым колыштын, нуно эрдене эрак храмыш пуреныт да калыкым туныкташ тӱҥалыныт. Тыгодымак архиерей да тудын дене пырля улшо-влак, толмекышт, Синедрионым да Израиль эрге-влакын чыла кугуракыштым ӱжыныт да Апостол-влакым кондаш шке тарзыштым казаматыш колтеныт.22А нунышт, тушко мийымеке, Апостол-влакым казаматыште муын огытыл да, пӧртылмекышт, увертареныт:23«Казаматым чоткыдын тӱкылен шындыме ыле, орол-влак омса ончылно шогеныт, но кунам ме омсам почна, тушто нигӧм ыжна му».24Тыгай мутым колмекышт, иерей, архиерей-влак да храм орол вуйлатыше, мо тиде тыгай манын, чот ӧрыныт.25Ала-кӧ толын да нунылан каласен: «Казаматыш петырыме пӧръеҥ-влакда храмыште шогат да калыкым туныктат».26Тунам орол вуйлатыше шкенжын еҥже-влак дене пырля Апостолмытым кондаш каен. Ӱмбакына кӱм кышкен, калык мемнам пуштеш манын лӱдыныт, сандене Апостол-влакым вийым кучылтде конденыт.

27Апостол-влакым кондымеке, Синедрион ончылан шогалтеныт, да архиерей йодышташ тӱҥалын:28«Тиде Айдемын лӱмжӧ нерген туныкташ ме тыланда пеҥгыдын чарен огынал мо? Теве те Иерусалимым шкендан туныктымаш дене теменда, да Тудын вӱржым мемнан ӱмбаке пыштынеда».29А Петр да моло Апостол вашештеныт: «Юмым айдеме деч утларак колыштман.30Пу меҥгеш тендан пудален пуштмо Иисусым мемнан ачана-влакын Юмышт ылыжтен.31Израиль калыкым Шке велкыже савыраш да тудын языкшым кудалташ манын, Юмо Иисусым Вуйлатышылан да Утарышылан шогалтен да пурла кидше дене нӧлталын.32Чыла тидын шотышто ме Тудын таныклышыже улына, мутшым колыштшо-влаклан Юмын пуымо Святой Шӱлышат тидымак таныкла».

33Тидым колын, Синедрионысо-влак пеш чот шыдешкеныт да Апостол-влакым пуштнешт улмаш.34Тунам Синедрионын ик еҥже, Гамалиил лӱман фарисей, чумыр калык коклаште пагалыме закон туныктышо, кынел шогалын да Апостол-влакым икмыняр жаплан лукташ кӱштен.35А вара каласен: «Израильын пагалыме еҥже-влак, те нине еҥ-шамыч дене мом ыштынеда, шке коклаштыда шоналтыза.36Тиддеч ончыч, шукерте огыл, шкенжым ала-могай кугуэш ончыктен, Февда толын лектын. Тудын деке ныл шӱдӧ наре еҥ ушнен. Но Февдам пуштыныт, а тудын велке шогышо-влак чыланат шаланен каеныт, да нимо кодын огыл.37Тудын деч вара, калыкым шотлен возымо годым, Галилей Иуда лектын да шке почешыже шуко еҥым таратен наҥгаен, но тудынат ӱмыржӧ лугыч лийын, да тудын велке шогышо-влак шаланен пытеныт.38Кызыт, мыйын шонымаште, тыге ыштыман: нине еҥ-влак деч кораҥза, нуным колтыза. Нунын ышташ шонымо пашашт айдеме деч гын, тудо сӱмырла,39а Юмо деч гын, те тудым сӱмырен огыда керт. Юмо ваштареш шогышо лияш огыл манын шекланыза».

Чылан тудын дене келшеныт.40Апостол-влакым ӱжыктеныт, нуным кырыктеныт, Иисусын лӱмжӧ нерген ойлаш чареныт да колтеныт.41Господь Иисусын лӱмжӧ верч намыслалташ йӧрышӧ лиймыштлан куанен, нуно Синедрион гыч каеныт,42кече еда храмыште да пӧртлаште чарныде туныктеныт да Иисус Христос нерген Поро Уверым шареныт.


*а 5:31 «Пурла кидше дене»: грек шомакым «Пурла могырышкыжо» манынат кусараш лиеш.

предыдущая глава Глава 5 следующая глава