Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ-ВЛАКЫН ПАШАШТ

Глава 4

1-22 Петр ден Иоанн Синедрион ончылно. 23-31 Христослан ӱшаныше-влакын кумалмышт. 32-37 Нунын чылажат иктеш лийын.

1Петр ден Иоаннын калыклан ойлымышт годым иерей да саддукей-влак, храм орол вуйлатыше нунын деке лишемыныт.2Нуно сырыше лийыныт, вет Петр ден Иоанн калыкым туныктеныт, Иисусын ылыжмыж нерген каласкалыме дене колымаш гыч ылыжмым увертареныт.3Петр ден Иоанным руалтен кученыт, кас лийынат, эр марте казаматыш петыреныт.4А колыштшо-влак кокла гыч шукынжо нунын ойлымыштлан ӱшаненыт, ӱшаныше пӧръеҥже вич тӱжем нарыш шуын.

5Вес кечынже Иерусалимыште иудей-влакын вуйлатышышт, калык кугурак-влак да закон туныктышо-влак погыненыт.6Тыштак архиерей Анна, тыгак Каиафа, Иоанн, Александр да архиерей тукым гыч молат лийыныт.7Петр ден Иоанным покшеке луктын шогалтеныт да йодыштыныт: «Могай куат дене але кӧн лӱм дене те тидым ыштенда?»8Тунам Петр, Святой Шӱлыш дене темалтын, нунылан ойлен: «Калык вуйлатыше да Израильысе кугурак-влак!9Таче мемнан деч черле еҥлан поро пашам ыштыме да тудын кузе пареммыж нерген вашмутым йодыт гын,10теат палыза, уло Израиль калыкат палыже: ыресеш тендан пудалыме, колымаш гыч Юмын ылыжтыме Назорей Иисус Христосын лӱмжӧ дене тиде айдеме ончылныда таза шога.11Тендан, чоҥышо-влакын, йӧрдымыш лукмо, но пусак негызлан пыштыме кӱ – Тудо. Нигӧ весе утарен огеш керт,12мемнам утарен кертше вес лӱмым тӱняште еҥ-влаклан пуымо огыл».

13Петр ден Иоаннын лӱддымылыкыштым ужмеке, нунын тунемдыме да тыглай еҥ улмыштым умылымеке, йодыштшо-влак ӧрыныт, тыгодымак Иисус дене пырля лиймыштымат пален налыныт.14А воктенышт шогышо паремдыме еҥым ужын, ваштареш нимом каласен кертын огытыл.15Нунылан Синедрион гыч лекташ кӱштеныт да шке коклаштышт тыге мутланеныт:16«Нине еҥ-влак дене мыланна мом ыштыман? Нунын гоч чудо лийын, тиде раш, тудын нерген Иерусалимыште илыше-влак чыланат ынде палат, а ме тыгай чудо лийын огыл манын огына керт.17Тиде Иисусын лӱмжӧ нерген нигӧлан ойлаш огыл манын, нуным лӱдыктен чарена, тунам калык коклаште тидын нерген увер утларак ок шарле».18Апостол-влакым мӧҥгеш ӱжмеке, Иисусын лӱмжӧ нерген нигунам ойлашат, туныкташат ок лий манын, нунылан пеҥгыдын кӱштеныт.19Но Петр ден Иоанн нунылан тыге вашештеныт: «Те шке шоналтыза: Юмо деч утларак тендам колыштына гын, Юмын ончылно тиде чын мо?20Мом ужмына да мом колмына нерген ме ойлыде огына керт».21Каҥашаш погынышо-влак Петр ден Иоанным, тӱрлын лӱдыктен, эрыкыш колтеныт. Нуным орландараш йӧным муын огытыл, вет уло калык окшакын тӧрланымыжлан Юмым моктен,22вет кӧлан тиде паремдыме чудо лийын, тудлан нылле ий утла лийын.

23Эрыкыш лекмеке, Петр ден Иоанн шкеныштын-влак деке толыныт да архиерей ден калык кугурак-влакын мом ойлымыштым каласкаленыт.24А колыштмеке, чыланат Юмо деке мутыштым ик ой дене савыреныт: «Пылпомышым, мландым, теҥызым да, мо тушто уло, чылажымат пӱрышӧ Господь Юмо!25Тый мемнан Давид ачанам, шке тарзетым, Святой Шӱлыш дене тыге ойлыктенат:
”Чын Юмым палыдыме-влак молан толашат,
молан тукым-влак кӱлдымӧ ойым пидыт?
26Тӱнясе кугыжа-влак кынелыныт,
Господь да Тудын Христосшо ваштареш
вуйлатыше-влак пырля погыненыт”.
27Чынжымак, Ирод ден Понтий Пилат, чын Юмым палыдыме-влак да Израильысе тукым-влак дене пырля тиде олаште Тыйын шӱрен палемдыме Святой Иисус Шочшет ваштареш погыненыт.28Мом шке кидет да шонымет дене Тый ончылгоч палемденат, нуно тудым шуктеныт.29А кызыт, Господь, нунын лӱдыктылмыштым ончал да тарзет-влаклан Тыйын шомакетым лӱдде ойлаш вийым пу.30Кидетым шуялте, тек черле-влак паремыт, тек Тыйын Святой Иисус Шочшетын лӱмжӧ дене палдарыше пале да ӧрыктарыше паша-влак ышталтыт».

31Кунам нуно кумалмым чарненыт, погынымо верышт чытырналтын, чылан Святой Шӱлыш дене темалтыныт да Юмын шомакым лӱдде ойлаш тӱҥалыныт.

32Ӱшаныше-влак ик шӱм-чонан лийыныт, шкеныштын погышт гыч нигӧ нимом мыйын манын огытыл, а чыла нунын иктеш улмаш.33Апостол-влак Господь Иисус Христосын ылыж кынелмыж нерген кугу куат дене таныкленыт, да чыланышт пелен Юмын кугу порылыкшо улмаш.34Нунын коклаште иктат укеан лийын огыл, вет кӧн мландыже але пӧртшӧ лийын, ужаленыт, ужалыме оксажым35Апостол-влакын йол воктекышт пыштеныт, да нуныжо, кӧлан мо кӱлын, кажнылан пуэденыт.36Теве Кипреш шочшо Иосий лӱман Левий тукым еҥ улмаш, тудым Апостол-влак Варнава манын лӱмденыт, вес семынже «лыпландарымашын эргыже» лиеш.37Тудын пасужо улмаш. Иосий пасужым ужален, оксажым конден да Апостол-влакын йол воктекышт пыштен.


*а 4:11 Пс 117:22.

*б 4:24 Пӱрышӧ – творец.

*в 4:25-26 Пс 2:1-2.

предыдущая глава Глава 4 следующая глава