Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАН ВОЗЫМО СВЯТОЙ ЕВАНГЕЛИЙ

Глава 21

1-4 Тулык ӱдырамашын надырже. 5-6 Храмым шалатыме нерген ончык ужын каласымаш. 7-19 Эҥгекын тӱҥалмыже. 20-24 Иерусалимым шалатыме нерген ончык ужын каласымаш. 25-28 Айдеме Эргын толмыжо. 29-38 Смоква пушеҥгын туныктымыжо. Ида мале.

1Ончалынат, Иисус надыр оксам оптымо верыш поян-влакын надырым пыштымыштым ужын.2Кок лепта оксам пыштыше йорло тулык ӱдырамашымат ужын3да каласен: «Тыланда чынак ойлем: тиде йорло тулык ӱдырамаш чыла деч шуко пыштен.4Чылан нуно утен кодшышт деч Юмылан надырым ойыреныт, а тудо шкенжын йорлылыкшо деч илышлан кӱлешыжым чыла пыштен».

5Могай мотор кӱ да шергакан пӧлек дене сӧрастарыме манын, южышт храм нерген ойленыт. Тунам Иисус каласен:6«Мом те кызыт ужыда, тудо шалатыме лиеш. Жап шуэш, тыште кӱ ӱмбалан кӱ ок код».

7Иисус деч йодыныт: «Туныктышо, а тидыже кунам лиеш? Тиде вашке лийшашым могай палдарыше пале шижтара?»8Иисус вашештен: «Тендам ынышт ондале манын шекланыза. Мыйын лӱмем дене шукын толыт да ойлаш тӱҥалыт: ”Тиде Мый улам”, ”Жап лишемын!” Нунын почеш ида кай.9Кунам сар ден пуламыр нерген колыда, ида лӱд. Ондак тыге лийшаш, но иканаште мучаш ок лий».

10Вара нунылан Иисус каласен: «Калык ваштареш калык кынелеш, кугыжаныш ваштареш – кугыжаныш.11Тӱрлӧ вере моткоч кугу мланде чытырналтмаш лиеда, шужымаш да мор шарла, лӱдыктышӧ да ӧрыктарыше кугу палдарыше пале-влак пылпомыш гыч лийыт.

12Но чыла тиде лиймешке, тендан ӱмбаке кидым нӧлталаш да поктылаш тӱҥалыт. Мыйын лӱмемлан кӧра тендам синагоглаште судитлаш да казаматыш шындаш кондат, кугыжа да вуйлатыше-влак ончыко намият.13Тунам те Мыйын нерген таныкледа.14Шкендам арален ойлымо нерген ончылгоч ида азаплане манын, шӱмышкыда пыштыза.15Мый тыланда тугай ушым да шомакым пуэм, ваштареш шогышо ик еҥат мутдам ӱчашен сеҥен але шомакланда тореш ойлен ок керт.16Тендам ача-авадат, иза-шольыдат, родо-тукымда да йолташда-влакат ужалат. Тендан кокла гыч южыштым пуштыт,17да Мыйын лӱмем верчын тендам чыланат ужмышудымо лийыт.18Но тендан вуй гычда ик ӱп пырчат ок йом.19Чытымыда дене шке чондам утарыза.

20Кунам Иерусалимым сарзе-влак йыр авырен налмым ужыда, палыза: тудын пытыме жапше толын шуын.21Иудейыште улшо-влак тунам тек курыкыш куржыт. А кӧ олаште – тек тудым коден кая, а кӧ воктенже, тек тушко ок пуро.22Тидыже ӱчым шуктымо кече-влак улыт: Возымаште мом каласыме, тунам чыла шукталтеш.23Ойго лиеш тудо кечылаште мӱшкыран ӱдырамаш ден чызым пукшышо ава-влаклан! Тиде мландыште кугу нелылык лиеш, тиде калык ӱмбаке шыде возеш:24шукышт пӱсӧ керде йымалан колат, весыштым чыла калык коклашке пленыш наҥгаят. Чын Юмым палыдыме-влак, нунын жапышт мучашыш шумешке, Иерусалимым тошкаш тӱҥалыт.

25Кечыште, тылзыште да шӱдырлаште палдарыше пале-влак лийыт. Теҥыз лӱшка, пудырана, да мланде ӱмбалсе калык-влакым кугу тургыжланымаш, йӧсылык авалта.26Тӱняшке шучкылык лишеммым ужын, еҥ-влак лӱдын вучымышт дене колышаш гай лийыт, вет кавасе вий-влак вер гыч тарванат.27Тунам еҥ-влак Айдеме Эргын кугу куат да чап дене пыл ӱмбалне толмыжым ужыт.28Кунам тиде шукталташ тӱҥалеш, кынелза да вуйдам нӧлталза: тендам эрыкыш лукмо жап лишемеш».

29Иисус нунылан туштен каласен: «Ончалза смоквам да моло пушеҥгым.30Кунам нунын лышташышт лекмым ужыда, те паледа: вашке кеҥеж толеш.31Тыштат тыгак: кунам ойлымемын шукталтмыжым ужыда, Юмын Кугыжаныш лишне улмым палыза.32Тыланда чынак ойлем: чыла тиде лиймешке, тиде тукым ок пыте.33Кава ден мланде пытат, но Мыйын шомакем огеш пыте.

34-35Тыгеже, шекланыза, руштмо, чот йӱмӧ, тысе илыш верч тургыжланыме дене шӱмда ынже нелем, уке гын, тиде кече тендам вапшла вучыдымын леведеш, вет тиде кече тӱня кумдыкысо чыла илыше ӱмбаке толеш.36Чыла тиде лийшашым чытен лекташ да Айдеме Эрге ончыко шогалаш йӧрышӧ лияш манын, эре шекланен шогыза да кумалза».

37Кече еда Иисус храмыште туныктен, а йӱдым, ола гыч лектын, Елеон манме курыкышто эртарен.38А эрдене эрак уло калык Тудым колышташ храмыш погынен.


*а 21:27 Дан 7:13.

предыдущая глава Глава 21 следующая глава