Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАН ВОЗЫМО СВЯТОЙ ЕВАНГЕЛИЙ

Глава 6

1-5 Тунемше-влак шуматкечын шурно парчам кӱрыт. 6-11 Кошкышо кидан еҥ. 12-16 Латкок Апостол. 17-19 Иисус черле-влакым паремда. 20-26 Чын пиал да ойго нерген. 27-36 Тушмандам йӧратыза. 37-42 Ида судитле. 43-45 Пушеҥге ден саска. 46-49 Кок негыз.

1Кугечын кокымшо кечыж деч вара икымше шуматкечын Иисус шурно пасу гоч эртен. Тунемшыж-влак шурно парчам кӱрыныт да, кидеш туржын, кочкыныт.2Южо фарисейже каласен: «Шуматкечын мом ышташ ок лий, тугайым те молан ыштеда?»3Иисус нунылан каласен: «Шкежат, пеленже лийше-влакат шужымеке, Давид мом ыштыме нерген те лудын огыдал мо?4Надыр киндым иерей деч молылан нигӧлан кочкаш ок лий гынат, тудо Юмын пӧртыш пурен, тиде киндым налын да кочкын, пырля лийше-влакланат пуэн».5Вара нунылан каласен: «Айдеме Эрге шуматкечыланат оза».

6Вес шуматкечынат Иисус синагогыш пурен да туныктен. Тушто ик еҥ лийын, тудын пурла кидше кошкышо улмаш.7Закон туныктышо ден фарисей-влак Иисусым титаклаш амалым кычалыныт, шуматкечынат паремда мо манын эскереныт.8Но Иисус, нунын шонымыштым пален, кошкышо кидан еҥлан каласен: «Кынел да ончык лек». Тудо кынелын да ончыко лектын.9Тунам Иисус нунылан каласен: «Мый тендан деч йодам: шуматкечын мом ышташ лиеш? Порым але осалым? Чоным утараш але пытараш?» Нуно шып шогеныт.10Иисус йырым-йыр чыланышт ӱмбаке ончалын да тудо еҥлан каласен: «Кидетым шуялте». Тудо тыгак ыштен, кидше весыж гаяк таза лийын.11Нуно чот ажгыненыт да Иисус дене мом ышташ манын, шке коклаштышт мутланеныт.

12Тиде кечылаште Иисус курыкыш кумалаш кӱзен да тиде йӱдым Юмылан кумалын эртарен.13А кунам волгыжын, шке тунемшыж-влакым ӱжын да нунын кокла гыч латкокытым ойырен налын. Нуныштым Апостол манын лӱмден:14Симоным – тудымак Петр манын лӱмден – тудын Андрей шольыжым, Иаковым, Иоанным, Филиппым, Варфоломейым,15Матфейым, Фомам, Алфейын Иаков эргыжым, Зилот манме Симоным,16Иаковын Иуда эргыжым да Искариот манме Иудам. Тудыжо вара Иисусым ужалыше лийын.

17Нунын дене пырля волымеке, Иисус тӧр верыш шогалын. Шуко тунемшыже да уло Иудей гыч, Иерусалим гыч, теҥыз воктенысе Сидон ден Тир верла гыч шуко калык Тудын дене пырля лийын.18Нуно Иисусым колышташ да черыштым паремдыкташ толыныт. Осал шӱлыш орландарыме-влакат паремдыме лийыныт.19Иисус деч вий лектын шоген да чылам паремден, сандене уло калык Тудын деке тӱкнаш тӧчен.

20Тунемшыж-влак ӱмбаке ончен, Иисус ойлаш тӱҥалын:
«Те, шкендам Юмын ончылно изилан ужшо-влак, поро пиалан улыда:
Юмын Кугыжаныш – тендан.
21Те, кызыт шужышо-влак, поро пиалан улыда:
темше лийыда.
Те, кызыт шортшо-влак, поро пиалан улыда:
те куанен воштылаш тӱҥалыда.
22Кунам Айдеме Эрге верч еҥ-влак тендам ужмышудымо лийыт, шкешт деч кораҥдат, вурсат да лӱмдамат осаллан шотлат – те поро пиалан улыда.23Тудо кечын куаныза, йывыртыза: пылпомышто тыланда кугу суап лиеш. Нунын ачашт-влак пророк-влак денат тыгак ыштеныт.24
Поян-влак, а тыланда ойго:
те шке йывыртымашдам налында.
25Кӧ кызыт темше, ойго тыланда:
те шужымашым ужаш тӱҥалыда.
Кӧ кызыт воштылеш, ойго тыланда:
те ойгыраш да шорташ тӱҥалыда!
26Кунам тендам чыла еҥ мокта – ойго тыланда: нунын ачашт-влак шояк пророк-влакым тыгак моктеныт.

27Но тыланда, кӧ Мыйым колыштеш, ойлем: тушмандам йӧратыза. Тендам ужмышудымо-влаклан порым ыштыза,28тендам каргышылан порым тыланыза, тендам вурсышо верч кумалза.29Кӧ тыйым ик могыр шӱргет гыч сова, вес могыржымат тудлан савырал, да кӧ ӱмбал вургеметым шупшын налеш, тудлан тувыретымат налашыже ит торешлане.30Кӧ тый дечет йодеш, чылалан пу, а кӧ тыйыным налеш, мӧҥгеш ит йод.

31Еҥ-влакым шкаланда мом ыштыктынеда, шкеат нунылан тидымак ыштыза.32Те шкендам йӧратыше-влакым йӧратеда гын, тидланже тыланда могай суап? Вет языкан-влакат, кӧ нуным йӧрата, тудымак йӧратат.33Кӧ тыланда порым ышта, теат нунылан порым ыштеда гын, тидланже тыланда могай суап? Языкан-влакат тыгак ыштат.34Кӧ деч мӧҥгеш налын кертмылан ӱшанеда, тудлан веле кӱсын пуэда гын, тидланже тыланда могай суап? Тунарак мӧҥгеш налаш манын, языкан-влакат языканлан кӱсын пуат.

35А те шке тушмандам йӧратыза, порым ыштыза, мӧҥгеш налаш шоныде, кӱсын пуыза. Тунам тыланда кугу суап лиеш, да те Кӱшнысӧ Юмын шочшыжо лийыда. Тудо таум ыштыдыме ден осал-влак деке поро.36Тугеже, шке Ачада гаяк чаманыше лийза.

37Еҥым ида судитле, тунам теат огыда судитлалт. Нигӧм титаканыш ида лук, тунам теат титаканыш огыда лукталт. Еҥын титакшым кудалтыза, да тенданат титакда кудалтыме лиеш.38Пуыза, да тыландат пуалтеш. Тичмаш виса дене висен, темден да кӧвален тыланда пыштен пуалтеш. Могай виса дене те виседа, тыландат тугай денак висалтеш».

39Иисус нунылан тыге туштен ойлен: «Сокыр еҥ сокырым вӱдышӧ лийын кертеш мо? Нуно коктынат вынемыш огыт камвоч?40Тунемшыже туныктышыж деч кугу огеш лий, а тунем пытарымекыже, кажныже туныктышыж гай лиеш.41Молан тый лишылетын шинчаштыже шӱкым ужат, а шкендыныште пырням от шиж?42Але кузе лишылетлан ”Йолташ, пу-ян, мый тыйын шинчат гыч шӱкым луктам” каласен кертат, кунам шке шинчаштет пырням от уж? Сайла кояш тӧчышӧ! Ондак шке шинчат гыч пырням лук, вара веле лишылетын шинчаж гычын шӱкым кузе лукташ – ужат.

43Уда саскам пуышо сай пушеҥге уке, сай саскам пуышо уда пушеҥгат уке.44Кеч-могай пушеҥгым саскаж дене палат. Иман вондер гыч смоква саскам огыт пого, а шуркалыше вондер гыч виноградым пӱчкын огыт нал.45Поро айдеме шӱмжын поро поянлыкше гыч порылыкым луктеш, осал еҥ шӱмжын осалже гыч осалым луктеш. Вет айдемын шӱмжӧ мо дене темын, тудымак йылмыже ойла.

46Мыйым молан ”Господь, Господь!” манын ӱжыда? А мом кӱштем, тудым огыда ыште.47Мый декем толшо, шомакем колыштшо да шуктышо айдеме кӧ гай? Мый тидым тыланда каласем.48Тудо – пӧртым чоҥышыла келге вынемым кӱнчышӧ да кӱ ӱмбалан негызым пыштыше еҥ гай. Вӱд ташлыме годым тиде пӧрт ӱмбаке эҥер шуҥгалтын, но тудым тарватен кертын огыл, вет пӧртын негызше кӱ ӱмбалан пыштыме.49А Мыйын шомакем колыштшо, но тудым шуктыдымо еҥ – мланде ӱмбалан негыз деч посна пӧртым чоҥышо айдеме гай. Пӧрт ӱмбаке эҥер шуҥгалтын, да тудо тунамак сӱмырлен. Шаланымыже шучко лийын».


предыдущая глава Глава 6 следующая глава