Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЫН ВОЗЫМО СВЯТОЙ ЕВАНГЕЛИЙ

Глава 5

1-20 Осал шӱлышаным паремдымаш. 21-43 Ӱдырым ылыжтымаш да вӱр йогымо черан ӱдырамашым паремдымаш.

1Нуно теҥызын вес серышкыже, Гадара кундемыш, миеныт.2Иисусын пуш гыч волымекыже, осал шӱлыш кучыман пӧръеҥ Тудын ваштареш шӱгарла гыч тунамак лектын.

3Тиде еҥ шӱгар-влакыште илен. Тудым нигӧ шинчырленат кертын огыл.4Кунар гана тудым кидге-йолге шинчырленыт гынат, тудо эреак шинчырым кӱрыштын, кӱртньӧ кепшылым шалатылын. Нигӧ тудым лыпландарен кертын огыл.5Йӱдшӧ-кечыже тудо шӱгарлаште да курыклаште лийын, кычкырен да шкенжым кӱэш кырен.

6Иисусым тора гыч ужынат, куржын миен, Тудын ончылан вуйым савен сукен7да виян кычкыралын: «Иисус, Кӱшнысӧ Юмын Эргыже, Тыйын мый денем мо пашат? Юмын ончылно сӧрвален йодам, мыйым ит орландаре!»8Вет Иисус каласен: «Осал шӱлыш, тиде айдеме кӧргӧ гыч лек!»9Вара йодын: «Тыйын лӱмет кузе?» Тудо вашештен: «Легион мыйын лӱмем. Ме шукын улына».10Тиде кундем гыч нуным поктен колташ огыл манын, тудо Иисусым чот сӧрвален.

11Тушто, курык воктене, кугу сӧсна кӱтӱ коштын.12Осал шӱлыш-влак Иисус деч йодыныт: «Мемнам сӧсна кӱтӱшкӧ колто, нунын кӧргыш пураш эрыкым пу».13Иисус нунылан тунамак эрыкым пуэн. Осал шӱлыш-влак лектыныт да сӧсна кӧргыш пуреныт. Уло кӱтӱ, кок тӱжем наре сӧсна, тура сер гыч теҥызыш керылтын да пурен каен.14Кӱтӱчӧ-влак куржыныт да тидын нерген олаште, яллаште каласкаленыт. Мо лиймым ончаш еҥ-влак миеныт.15Иисус деке мийымекышт, ия легион кучем гыч лекше еҥым ужыныт, тудо вургеман да яндар уш-акылан шинчен. Нуно моткоч лӱдыныт.16Ужшо-влак тиде еҥ да сӧсна-влак дене мо лийме нерген нунылан каласкаленыт.17Еҥ-влак Иисусым шке кундемышт гыч каяш сӧрвалаш тӱҥалыныт.

18Кунам Иисус пушыш шинчын, ия кучем гыч лекше еҥ Тудын пелен лияш йодын.19Иисус келшен огыл, каласен: «Мӧҥгышкет кае, да мом тыланет Господь ыштен, кузе тыйым чаманен, мӧҥгысет-влаклан ойло».20Тиде еҥ каен да тудын дене Иисус мом ыштыме нерген Декаполис кундемыште каласкалаш тӱҥалын. Тудын ойлымыжо чыламат ӧрыктарен.

21Иисус, пушыш шинчын, мӧҥгеш вес могырыш вончымеке, йырже шуко калык погынен. Тудо теҥыз серыште лийын.22Теве тушко синагогын Иаир лӱман ик вуйлатышыже миен. Иисусым ужмеке, Тудын йол воктекыже кумык возын23да чот сӧрвален: «Мыйын ӱдырем колаш кия. Утаралтше, илыше кодшо манын, тудын деке миен, кидетым ӱмбакыже пыште!»24Иисус тудын дене пырля каен.

Иисус почеш моткоч шуко калык тарванен. Чылан Тудым шыгыремденыт.25Калык тӱшкаште латкок ий вӱр йогымо чер дене орланыше ӱдырамаш лийын.26Тудо шуко эмлызе дене йӧсым чытен эмлалтын, тидлан чыла погыжым пытарен, да нимогай пайдам налын огыл, утларак веле начарештын.27Тудо Иисус нерген колын, калык кокла гыч Тудын деке шеҥгечше миен, вургемжым тӱкалтен.28«Тудын вургемышкыже тӱкнем веле гынат, утаралтам», – шонен ӱдырамаш.29Тунамак вӱр йогымыжо чарнен. Капыштыже чер пытымым тудо шижын.30Иисус кӧргыж гыч вий лекмым вигак шижын. Тудо калык коклаште савырнен да йодын: «Кӧ Мыйын вургемышкем тӱкныш?»31Тунемшыж-влак Тудлан каласеныт: «Тыйым тынар калык шыгыремда, а Тый кӧ тӱкнымӧ нерген йодат?»32Тидым ыштышым ужаш манын, Иисус йыр ончалын.33Лӱдмыжлан кӧра чытырыше ӱдырамаш, шкеж дене мо лиймым пален, Тудын деке миен, кумык возын да чыла чыным ойлен.34Иисус тудлан каласен: «Ӱдырем, тыйым ӱшанымашет утарен! Тыныслык дене кай да таза лий».

35Иисус але ойленат пытарен огыл, синагог вуйлатышын пӧртшӧ гыч уверым конденыт: «Тыйын ӱдырет колен, мом эше Туныктышым азапландарет?»36Иисус нине мутым колын да Иаирлан каласен: «Ит лӱд, ӱшане гына!»37Шкеж дене пырля Петрым, Иаковым да тудын Иоанн шольыжым гына налын. Молылан иктыланат почеш мияш кӱштен огыл.38Синагог вуйлатышын пӧртышкыжӧ миен шумеке, йӱк-йӱаным колын, мӱгырен шортшо-влакым ужын.39Иисус пӧртыш пурен да каласен: «Те молан йӱкланеда да шортыда? Ӱдыр колен огыл, тудо мала».40Тудым воштылыныт. Но Иисус чылаштымат поктен луктын. А Шкеже ӱдырын ачажым, аважым да пеленже лийше-влакым налын, ӱдыр кийыме пӧлемыш пурен.41Йочан кидшым кучен, Иисус тудлан каласен: «Талифа куми!» Тидыже «Ӱдыр, тылат ойлем: кынел» манме лиеш.42Ӱдыр тунамак кынелын да кошташ тӱҥалын. Тудлан латкок ий наре лийын. Чылан моткочак ӧрыныт.43Мо лийме нерген нигӧлан каласкалаш огыл манын, Иисус чоткыдын кӱштен. А ӱдырлан кочкаш пуаш шӱден.


*а 5:20 Декаполис ’Лу ола’ манме лиеш.

предыдущая глава Глава 5 следующая глава