Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЫН ВОЗЫМО СВЯТОЙ ЕВАНГЕЛИЙ

Глава 25

1-13 Лу ӱдыр нерген туштен каласымаш. 14-30 Кум тарзе нерген туштен каласымаш. 31-46 Калык-влакым судитлымаш.

1Тунам Пылпомыш Кугыжаныш лу ӱдыр гай лиеш. Ӱдыр-влак, лампыштым налын, качым вашлияш лектыныт.2Нунын кокла гыч визытше ушан, визытше шонен моштыдымо лийыныт.3Шонен моштыдымо-влак лампыштым налыныт, но йӱлалташ ӱйым пеленышт налын огытыл,4а ушан-влакышт лампе дене пырля атешышт ӱйжымат налыныт.5Каче кучалтынат, чылан нералтеныт да мален колтеныт.6Но пелйӱдым кычкырыме шергылтын: ”Теве каче толеш, тудым вашлияш лекса!”

7Тунам ӱдыр-влак чылан кынелыныт да лампыштым тӧрлатеныт.8Шонен моштыдымо-шамыч ушан-влаклан каласеныт: ”Мыланна ӱйдам пуыза, мемнан лампына-влак йӧрат”.9А ушанышт вашештеныт: ”Уке, тудо мыланна чылалан ок сите. Лучо ужалыше-влак деке кайыза да шкаланда налза”.10Налаш кайымекышт, каче толын, ямде лийше-влак тудын дене пырля сӱан пайремыш пуреныт, почешышт омсам петыреныт.11Вара моло ӱдыр-влак толыныт да ойленыт: ”Оза, оза! Мыланна поч”.12А тудыжо нунылан вашештен: ”Тыланда чынак ойлем: тендам ом пале”.

13Тыгеже, шекланен шогыза, вет Айдеме Эрге толмо кечымат, шагатымат огыда пале.

14Мо лийшашым тыгеат ончыкташ лиеш: Вес элыш кайымыж деч ончыч айдеме шкеж деке тарзыж-влакым ӱжын да погыжым нунылан ӱшанен коден.15Иктылан вич талант оксам, весылан коктым, кумшылан иктым – кажныштлан вийышт шутымо семын пуэн да тунамак каен.16Вич талантым налшыже тунамак миен да, окса гыч оксам ыштен кучылтын, ешартыш вич талантым ыштен налын.17Тыгак кок талантым налшыжат ешартыш кок талантым ыштен налын.18А ик талантым налшыже каен, лакым кӱнчен да озажын оксажым мландыш тоен.

19Ятыр жап эртымеке, тарзе-влакын озашт пӧртылын да оксам кузе кучылтмыштым терген.20Вич талантым налше тарзе ешартыш вич талантымат конден да ойлен: ”Оза, тый мылам вич талантым пуэнат, а теве ешартыш вич талантым мый нунын дене ыштен налынам”.21Озаже тудлан каласен: ”Сай! Тый поро да ӱшанле тарзе улат. Изиште ӱшанле лийынат, тыйым шукым ончаш шогалтем. Озатын куан пайремышкыже тол”.22Кок талантым налше тарзат толын да ойлен: ”Оза, тый мылам кок талантым пуэнат, а теве вес кок талантым нунын дене ыштен налынам”.23Оза тудланат каласен: ”Сай! Тый поро да ӱшанле тарзе улат. Изиште ӱшанле лийынат, тыйым шукым ончаш шогалтем. Озатын куан пайремышкыже тол”.

24Ик талантым налшат толын да каласен: ”Оза, мый тыйын пеҥгыдын йодшо айдеме улметым паленам: кушто ӱден отыл, тушто тӱредат, кушто урлыкашым шавен отыл, тушто погет.25Мый лӱдынам, сандене каенам да тыйын талант оксатым мландыш тоенам, теве тыйын оксат”.26Оза тудлан вашештен: ”Йӧрдымӧ да йолагай тарзе! Кушто мый ӱден омыл, тушто тӱредмем, кушто урлыкашым шавен омыл, тушто погымем тый паленат,27сандене оксамым торгайыше-влаклан пуаш кӱлеш ыле, пӧртылмекем, шкемыным парыш дене налам ыле.28Тыгеракын, налза тудын деч талантым да лу талантан еҥлан пуыза.29Кӧн уло, тудлан пуалтеш да тудын лыҥ лиеш, а кӧн уке – улыжат налалтеш.30А йӧрдымӧ тарзым пычкемышышке луктын кудалтыза. Тушто шортмаш да пӱйым пурмаш лиеш”». [Тидым каласымеке, Иисус йӱкшым кугемден ойлен: «Кӧн колышташ пылышыже уло, тек колеш».]

31«Чыла святой Суксо-влак дене пырля чапланен толмеке, Айдеме Эрге шке чапшын престолышкыжо шинчеш.32Тудын ончыко калык-влак чылан погынат, да кузе каза деч шорыкым кӱтӱчӧ ойыра, Тудат тугак еҥ-влакым икте-весе деч ойыра.33Шорык-влакым Шкеж деч пурла могырыш шогалта, а каза-влакым – шола могырыш.

34Вара Кугыжа Шкеж деч пурлаште улшыштлан каласа: ”Ачамын суапландарымыже-влак, толза. Тӱням ыштыме годымак тыланда ямдылыме Кугыжанышым те кызыт наследник семын налза.35Вет Мый шужышо лийынам, те Мылам кочкышым пуэнда; йӱмем шуын, те Мыйым йӱктенда; ӧрдыж еҥ лийынам, те Мыйым суртышкыда пуртенда.36Чара лийынам, те Мыйым чиктенда; черле лийынам, те Мый декем коштында; казаматыште лийынам, Мый декем ужаш миенда”.37Тунам чын ыштыше-влак Тудлан вашештат: ”Господь, кунам ме Тыйым шужышым ужынна да пукшен улына? Але кунам ме йӱмет шумым ужынна да Тылат йӱаш пуэнна?38Кунам йот еҥ улметым ужынна да суртышкына пуртенна? Кунам Тыйым чарам ужынна да чиктенна?39Кунам ме Тыйым черлым але казаматыште ужынна да Тый декет миенна?”40А Кугыжа нунылан каласа: ”Тыланда чынак ойлем: мом те нине изирак иза-шольым-влак кокла гыч иктыжлан ыштенда, чылажымат Мыланем ыштенда”.

41Вара шола могырышто улшо-влаклан каласа: ”Каргыме-влак, Мый дечем кораҥза, диавол ден тудын суксыж-влаклан ямдылыме курымашлык тулыш кайыза.42Вет Мый шужышо лийынам, те Мылам кочкаш пуэн огыдал; йӱмем шуын, те Мыйым йӱктен огыдал;43ӧрдыж еҥ лийынам, Мыйым пуртен огыдал; чара лийынам, Мыйым чиктен огыдал; черлат лийынам, казаматыштат лийынам, а те Мый декем коштын огыдал”.44Тунам нунат Тудлан вашештат: ”Господь! Кунам ме Тыйым шужышым але йӱмӧ шушым, але ӧрдыж улшым, але чарам, але черлым, але казаматыште ужынна да Тылат полшен огынал?”45Тудо нунылан вашешта: ”Тыланда чынак ойлем: мом те нине изирак-влак кокла гыч иктыжлан ыштен огыдал, Мылам ыштен огыдал”.46Нинышт, мутым кучен, курымеш орланат, а чын ыштыше-влак курымашлык илышыш каят.»


предыдущая глава Глава 25 следующая глава