Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЫН ВОЗЫМО СВЯТОЙ ЕВАНГЕЛИЙ

Глава 22

1-14 Сӱан нерген туштен каласымаш. 15-22 Кесарьлан йозак. 23-33 Ылыжме нерген йодыш. 34-40 Эн кугу кӱштымаш. 41-46 Христос кӧн Эргыже?

1Иисус умбакыже туштен каласкален:2«Пылпомыш Кугыжанышым шкенжын эргыжлан сӱан пайремым ыштыше кугыжа дене таҥастараш лиеш.3Сӱаныш ӱжмӧ-влакым погаш тудо шке тарзыж-влакым колтен, а уна-влакын толмышт шуын огыл.4Тудо адак вес тарзыж-влакым колтен, колтымыж годым кӱштен: ”Ӱжмӧ-влаклан каласыза: теве пайрем кочкышым ямдылен шуктымо, ӱшкыжымат, ӧрдыктарыме презымат шӱшкылмӧ, чыла ямде, сӱан пайремышке толза”.5Но ӱжмӧ-влак тидым шотыш налын огытыл. Иктышт шке пасушкыжо, а весышт торгаяш каеныт,6молышт кугыжан тарзыж-влакым кученыт, торжан койыныт да пуштыныт.7Тидын нерген колмеке, кугыжа моткоч шыдешкен, шке сарзыж-влакым колтен да пуштшо-влакым пытарен, нунын олаштым йӱлалтен.

8Вара тарзыж-влаклан каласен: ”Сӱан пайрем ямде, но ӱжмӧ-влак йӧрдымӧ лийыныт.9Ынде корнывожлаш кайыза да кӧм муыда, чылаштымат сӱанышке ӱжса”.10Тарзе-влак уремышке лектыныт, кӧм гына муыныт, чылаштымат конденыт: осалжымат, порыжымат. Тыгеракын пайрем ӱстелтӧрыш калык тич темын.

11Уна-влакым ончаш пурымеке, кугыжа сӱан вургемым чийыдыме еҥым ужын12да тудлан манын: ”Йолташ, кузе тый тышке сӱан вургем деч посна пуренат?” Тудыжо нимом пелештен огыл.13Тунам кугыжа тарзе-влаклан каласен: ”Кидшым-йолжым пидын, тудым налза да пычкемышыш луктын кудалтыза. Тушто шортмаш да пӱйым пурмаш лиеш.14Вет ӱжмӧ – шуко, ойырен налме – шагал”».

15Тунам фарисей-влак каеныт да Иисусым кузе-гынат мутешыже кучаш манын каҥашеныт.16Нуно Тудын деке шкеныштын тунемшыштым да Ирод велке шогышо-влакым колтеныт. «Туныктышо! – ойленыт нуно. – Ме Тыйын чын улметым да Юмын корныжлан чын почеш туныктыметым палена. Тый еҥлан йӧраш тӧчымӧ нерген от шоно, Тыланет чылан иктӧр улыт.17Тыгеже мыланна каласе: Тый кузе шонет, кесарьлан йозакым тӱлаш лиеш але уке?»18Но, нунын чояланымыштым пален, Иисус каласен: «Сайла кояш тӧчышӧ-влак, молан те Мыйым тергеда?19Йозак тӱлымӧ оксадам Мыланем ончыктыза». Нуно Тудлан динарийым конденыт.20Иисус йодын: «Кӧм тышан сӱретлыме? Кӧн тыште лӱмжӧ сералтын?»21Тудлан каласеныт: «Кесарьын». Тунам нунылан ойлен: «Тыгеже кесарьлан кесарьыным, а Юмылан Юмыным пуыза».22Тидым колын, нуно ӧрыныт да Иисусым коден каеныт.

23Колышо ылыж огеш кынел манын шотлышо саддукей-влак тудо кечын миеныт да Иисус деч йодыныт:24«Туныктышо, Моисей каласен: ”Кӧ йочаж лийде кола гын, тудын ватыжым изаже але шольыжо марлан налшаш да тудын тукымжым шуйышаш”.25Мемнан дене шым изак-шоляк лийын: икымшыже ӱдырым налын да колен, йочаже лийын огылат, ватыже шольыжлан кодын.26Кокымшо денат, кумшо денат, чыла шымытышт денат тыгак лийын.27Чылашт деч вара ӱдырамашат колен.28Тыгеже, ылыжмеке, ӱдырамаш шымыт гыч кудыжын ватыже лиеш? Вет тудо чылаштынат ватышт лийын».

29Иисус нунылан вашештен: «Те Возымашымат, Юмын куатшымат огыда пале, сандене йомын коштыда.30Ылыж кынелмеке, ӱдырымат огыт нал, марланат огыт лек, пылпомышто Юмын Суксыж-влак гай лийыт.31-32Колымаш гыч ылыж кынелмаш нерген Юмын тыланда каласымыжым, ”Мый Авраамын Юмыжо, Исаакын Юмыжо, Иаковын Юмыжо улам” манмым, лудын огыдал мо? Юмо колышо-влакын Юмышт огыл, а илыше-влакын Юмышт!»33Калык, тидым колмеке, Иисусын туныктымыжлан ӧрын шоген.

34Саддукей-влакын ойлымыштлан Иисус мучашым пыштен манмым колын, фарисей-влак пырля погыненыт.35Нунын кокла гыч иктыже, закон туныктышо, Иисусым тергаш манын йодын:36«Туныктышо, законышто могай кӱштымаш эн кугу?»37Иисус тудлан каласен: «”Господь Юметым уло шӱмет, уло чонет, уло умылымашет дене йӧрате”.38Тиде икымше да эн кугу кӱштымаш.39Кокымшыжат тыгаяк кугу: ”Лишылетымат шкендым йӧратыме семынак йӧрате”.40Мемнан пӱтынь законна ден пророк-влакын туныктымышт нине кок кӱштымашеш негызлалтыт».

41Фарисей-влакын пырля лиймышт годым Иисус нунын деч йодын:42«Христос нерген те мом шонеда? Тудо кӧн Эргыже?» Тудлан ойленыт: «Давидын».43Нунылан Иисус каласен: «А Шӱлыш кумылаҥдыме годым Давид Тудым молан вара Господь манеш? Давидше ойлен:44
”Господь мыйын Господемлан каласен:
Тыйын тушманет-влакым йол йымакет пыштымешкем,
пурла велыштем шинче”.
45Тугеже, Давид Тудым Господь манеш гын, кузе Тудо Эргыже лийын кертеш?»46Иисуслан нигӧат ик мутымат вашештен кертын огыл, тиде кече деч вара Тудын деч нигӧ нимом йодаш тоштын огыл.


*а 22:24 Втор 25:5.

*б 22:32 Исх 3:6.

*в 22:37 Втор 6:5.

*г 22:39 Лев 19:18.

*д 22:44 Пс 109:1.

предыдущая глава Глава 22 следующая глава