Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЫН ВОЗЫМО СВЯТОЙ ЕВАНГЕЛИЙ

Глава 19

1-12 Вате-марий ойырлымо нерген. 13-15 Иисус йоча-влакым благословитла. 16-30 Поян ден Иисус.

1Нине шомакым ойлен пытарымеке, Иисус Галилей гыч лектын да Иудей кундемын Иордан эҥер вес могырысо ужашышкыже толын.2Тудын почеш шуко калык миен, да Иисус нуным тушто паремден.

3Тудын деке фарисей-влак лишемыныт да терген ойленыт: «Айдемылан кеч-могай амал денат шке ватыжым ойырен колташ лиеш мо?»4Тудо нунылан вашештен: «Пӱрышӧ тӱҥалтыштак нуным пӧръеҥ ден ӱдырамашым ыштен. Тыге возымым лудын огыдал мо?»5Вара каласен: «Сандене пӧръеҥ ачаж ден аважым кода, шке ватыж дене ушна, да нуно коктын ик кап да чон лийыт.6Тыгеракын, нуно ынде кокыт огыл, а икте улыт. Мом Юмо ушен, айдеме ынже ойыро».7Нуно Тудлан ойленыт: «Кузе вара ойырымо нерген кагазым пуаш да вате деч ойырлаш лийме нерген Моисей законым коден?»8Иисус нунылан ойлен: «Тендан пешкыде шӱмланда кӧра Моисей тыланда ватым ойырен колташ эрыкым пуэн, а тӱҥалтыште тыге лийын огыл.9Мый тыланда ойлем: кӧ яжарланыме титак деч посна шке ватыжым ойырен колта да весым марлан налеш, тудо яжарлана. Ойырен колтымым марлан налшат яжарлана».10Тунемшыж-влак Иисуслан ойленыт: «Айдеме ватыж дене шкенжым тыге кучышаш гын, ӱдырым налманат огыл».11Тудыжо нунылан каласен: «Тыгай ойым чылан огыл илышыш пуртен кертыт. Кӧлан тыге пӱралтын, тудо веле кертеш.12Южышт кап шот дене ӱдырым налын кертдымак шочыныт, весыштым ӱдыр налаш йӧрдымым еҥ-влак ыштеныт, а кумшышт Юмын Кугыжанышлан кӧра шкеныштым мужыраҥ кертдымым ыштеныт. Кӧ тыгай ойым илышыш пуртен кертеш гын, пуртыжо».

13Йоча-влак ӱмбаке кидым пыштыже да нунын верч кумалже манын, Иисус деке икшыве-влакым конденыт. Тунемшыж-влак нуным чареныт.14Но Иисус каласен: «Йоча-влакым пуртыза, Мый декем толаш нунылан ида чаре, вет Пылпомыш Кугыжаныш – нунын гай еҥ-влакын».15Вара йоча-влак ӱмбаке кидым пыштенат, тушечын каен.

16Теве икте толын да Иисуслан каласен: «Поро Туныктышо! Курымашлык илышым налаш манын, мый могай поро пашам ыштышаш улам?»17Иисус тудлан ойлен: «Молан тый Мыйым поро манат? Юмо деч моло нигӧ поро огыл. Тый илышыш пурынет гын, кӱштымым шукто».18«Могайым?» – йодын. Иисус каласен: «”Ит пушт”, ”Ит яжарлане”, ”Ит шолышт”, ”Шойыштын, еҥ ӱмбаке таныклен ит ойло”,19”Ача-аватым пагале”, ”Лишылетымат шкендым йӧратыме семынак йӧрате”».20Самырык еҥ вашештен: «Чыла тидым мый самырык годсекак шуктен шогем. Эше мо мыланем огеш сите?»21Иисус каласен: «Тичмашлыкыш шунет гын, мий, мо тыйын уло, чыла ужале да оксажым йорло-влаклан пуэде. Тунам пылпомышто тыйын поянлыкет лиеш. Вара Мый декем тол да почешем кае».22Тыгай шомакым колмеке, еҥ ойганен кораҥын. Тудо моткоч поян улмаш.

23А Иисус тунемшыж-влаклан каласен: «Тыланда чынак ойлем: поян еҥлан Пылпомыш Кугыжанышке пураш неле.24Адак тыланда ойлем: верблюдлан имышу вошт лекташ куштылго огыл, а поянлан Юмын Кугыжанышыш пураш эшеат нелырак».25Тунемшыж-влак, тидым колмеке, чот ӧрын каласеныт: «Тугеже кӧ утаралт кертеш?»26А Иисус нунын ӱмбаке ончалын да ойлен: «Айдеме тидым ыштен ок керт, но Юмо чылажымат кертеш».

27Тунам Петр вашештен: «Теве ме чыла коденна да Тыйын почешет каенна. Тидлан мыланна мо лиеш?»28А Иисус нунылан каласен: «Тыланда чынак ойлем: кунам у саман тӱҥалеш да Айдеме Эрге чапланыше престолышкыжо шинчеш, тунам теат, почешем кайыше-влак, Израильын латкок тукымжым судитлаш латкок престолыш шинчыда.29Кӧ пӧртым, иза-шольым, ака-шӱжарым, ача-авам але ватым, але икшыве-влакым, але мландым Мыйын лӱмем верч кода, шӱдӧ пачаш шуко налеш, да тудлан курымашлык илыш пуалтеш.30А ончылсо-влак шукынжо шеҥгелне да шеҥгелсе-влак шукынжо ончылно лийыт.


*а 19:4 Пӱрышӧ – Творец, тӱням Ыштыше.

*б 19:4-5 Быт 1:27, 2:24.

*в 19:7 Втор 24:1.

*г 19:18-19 Исх 20:12-16, Лев 19:18.

предыдущая глава Глава 19 следующая глава