Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЫН ВОЗЫМО СВЯТОЙ ЕВАНГЕЛИЙ

Глава 17

1-13 Волгалт вашталтмаш. 14-21 Осал шӱлыш деч йочам паремдымаш. 22-23 Иисус шке колымыж да ылыжмыж нерген угыч ойла. 24-37 Храмлан йозак.

1Куд кече эртымеке, Иисус пеленже Петрым, Иаковым, тудын Иоанн шольыжым налын да нуным кӱкшӧ курыкыш посна намиен.2Тушто шинчаончылнышт волгалт вашталтын: шӱргыжӧ кече гае волгалтын, вургемже волгыдо гае ошо лийын.3Теве нунылан Моисей ден Илия конченыт, нуно Иисус дене мутланеныт.4Тунам Иисуслан Петр каласен: «Господь, тыште улмына моткоч сай. Шонет гын, кум омашым ыштена: иктым Тыланет, иктым Моисейлан, Илиялан иктым».5Тудын ойлымыж годым нуным волгыдо пыл леведын, да пыл гыч йӱк шоктен: «Тиде Мыйын йӧратыме Эргым, Тудын дене Мыйын поро кумылем, Тудым колыштса».6Тыгайым колмеке, тунемше-влак чот лӱдмышт дене мланде ӱмбаке кумык шуҥгалтыныт.7Но Иисус нунын деке миен, кидше дене тӱкалтен да каласен: «Кынелза, ида лӱд».8А шинчам почын ончалмекышт, нуно Иисус деч молым нигӧм ужын огытыл.

9Курык гыч волымышт годым Иисус чарен ойлен: «Айдеме Эрге колымаш гыч ылыж кынелмешке, тыште ужмыдам иктыланат ида ойло».10Тунемшыж-влак Тудын деч йодыныт: «Вара молан закон туныктышо-влак эн ондак Илия толшаш маныт?»11Иисус вашештен: «Чын, Илия ондак толеш да чылажымат тӧрлен ямдыла.12Но тыланда ойлем: Илия толынат, а еҥ-влак тудым пален огытыл, тудын дене мом шоненыт, тудым ыштеныт. Тыгак Айдеме Эргат нунын деч орлыкым ужеш».13Иисус Тынеш Пуртышо Иоанн нерген ойла манын, тунемшыж-влак тунам умыленыт.

14Кунам нуно калык деке толыныт, Иисус деке ик еҥ миен, Тудын ончылан сукен шинчын15да ойлен: «Господь, мыйын эргым чамане. Тудо тылзе кушмо годым пешак орлана, чӱчкыдынак тулыш тӧршта але вӱдыш шуҥгалтеш.16Мый тудым Тыйын тунемшет-влак деке намиенам, но нуно паремден кертын огытыл».17Иисус каласен: «О, ӱшаныдыме да локтылалтше тукым! Мылам тендан дене пырля мыняр лийман? Мылам тендам кунар чытыман? Тудым Мый декем тышке кондыза».18Иисусын кӱштен ойлымекыже, рвезын кӧргыж гыч ия лектын, икшыве тунамак паремын.

19Вара, посна кодмеке, тунемшыж-влак Иисус деке лишемыныт да йодыныт: «Молан ме тудым поктен луктын кертын огынал?»20Иисус нунылан каласен: «Ӱшаныдымыланда кӧра. Тыланда чынак ойлем: тендан ӱшанымашда кеч горчице нӧшмӧ наре лиеш да тиде курыклан ”Тышечын тушко кусно” манын ойледа гын, тудо кусна ыле, тендан ыштен кертдыме нимо ок лий ыле.21Тиде тукымым кумалме да пӱтым кучымо дене веле поктен лукташ лиеш».

22Галилейыште лиймышт годым Иисус нунылан каласен: «Айдеме Эрге айдеме-влакын кидышкышт пуалтеш,23да Тудым пуштыт, но кумшо кечын ылыж кынелеш». Тунемшыж-влак моткочак ойганеныт.

24Кунам нуно Капернаумыш толыныт, Петр деке храмлан кок драхмаш йозакым погышо-влак лишемыныт да каласеныт: «Тендан Туныктышыда йозакым тӱла?»25«Тӱла», – вашештен тудо. Петр пӧртыш пурымеке, Иисус мутым луктын: «Тый кузе шонет, Симон? Тӱнясе кугыжа-влак йозакым але лӱм оксам кӧ деч погат? Шке эргышт деч але ӧрдыж-влак деч?»26Петр Тудлан ойлен: «Ӧрдыж-влак дечын». Иисус каласен: «Тыгеже эрге-влак тӱлымаш деч эрыкан улыт.27Но йозакым погышо-влакым сырыкташ огыл манын, теҥыз деке кае, эҥырым шу, эн ондак логалше колым нал. Умшажым почмекет, тушто ныл драхмаш оксам муат. Тудым нал да шке олмешетат, Мыйын олмешемат тӱлӧ».


*а 17:21 «Тиде тукымым» – тидым «тыгай ия-влакым» манын умылыман.

*б 17:24 Кок драхмаш йозак – иудей пӧръеҥ ий еда кок драхмым храмлан пуышаш улмаш. Ончо Исх 30:13.

*в 17:25 Лӱм окса – подать.

*г 17:27 «Ныл драхмаш окса» – грекла возымаште «статир».

предыдущая глава Глава 17 следующая глава