Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЫН ВОЗЫМО СВЯТОЙ ЕВАНГЕЛИЙ

Глава 13

1-23 Ӱдышӧ нерген туштен каласымаш. 24-30 Шӱкшудо нерген туштен каласымаш. 31-35 Горчице нӧшмӧ да ру нерген туштен каласымаш. 36-43 Шӱкшудо нерген туштен каласымым умылтарымаш. 44-50 Тойымо поянлык, ракывотшер пырче да вапш нерген туштен каласымаш. 51-52 У да тошто поянлык. 53-58 Иисус Назаретыште.

1Тиде кечынак Иисус пӧрт гыч лектын да теҥыз воктеке миен шинчын.2Тудын деке шуко калык погыненат, Иисус пушыш шинчын, а уло калык серыште шоген.3Туштен каласыме гоч Тудо нунылан шукым ойлен.

«Теве ӱдышӧ ӱдаш лектын, – ойлен.4– Ӱдымыж годым южо пырчыже корно воктеке возын. Кайык-влак чоҥештен толыныт да нуным чӱҥген пытареныт.5Весышт кӱан да шагал рокан верыш возыныт, да рок келге огыл улмылан кӧра нуно пеш вашке шытен лектыныт.6Кече лекмеке, озым лывыжген, вожшо укелан кӧра кошкен.7Южо пырчыже шӱкшудо коклаш возын. Шӱкшудо кушкын, озымым тӱрыс пызырен.8А южо пырче сай мландыш возын да лектышым пуэн: иктыже шӱдӧ пачаш, весыже кудло, южышт кумло пачаш.9Кӧн колышташ пылышыже уло, тек колеш».

10Тунемшыж-влак Иисус деке миеныт да йодыныт: «Молан нунылан туштен ойлет?»11Иисус вашештен: «Пылпомыш Кугыжанышын тайне-влакшым умылаш тыланда ӱшанен пуымо, а нунылан тиде пуалтын огыл.12Вет кӧн уло, тудлан пуалтеш да тудын лыҥ лиеш, а кӧн уке, тудын мо улыжат налалтеш.13Нуно ончат гынат, огыт уж, колыштыт гынат, огыт кол, огыт умыло, садлан нунылан туштен каласкалем.14Исаиян пророкла ойлымыжо нунылан шукталтеш, тудо ойлен:
”Пылыш дене колыштыда, но огыда умыло,
шинча дене ончеда, но огыда уж.
15Тиде калыкын шӱмжӧ пешкыдемын,
пылышышт дене пыкше колыт,
шинчаштым куменыт.
Сандене нуно
шинчашт дене огыт уж,
пылышышт дене огыт кол,
шӱмышт дене огыт умыло,
Мыланем нуным паремдаш манын,
Мый декем огыт савырне.
16А тендан шинчада ужын кертмыж дене, пылышда колын кертмыж дене пиалан улыт.17Тыланда чынак ойлем: шуко пророк ден чын ыштыше тендан ужмыдам ужнешт ыле, но ужын огытыл, тендан колмыдам колнешт ыле, но колын огытыл.

18Тыгеракын, ӱдышӧ нерген туштен каласымем мом ончыкта – колыштса:19Пылпомыш Кугыжаныш нерген шомакым колмеке, айдеме тудым ок умыло гын, осал толешат, шӱмешыже ӱдымым налын кая. Корно воктен ӱдымӧ пырче теве кӧм ончыкта.20Кӱан рокеш ӱдымӧ пырчыже шомакым колшо да куанымыж дене вигак шӱмышкыжӧ пыштыше айдемым ончыкта.21Вожшо укеат, тыгай айдеме шуко жап огеш чыте. Шомаклан кӧра нелылык але поктылмаш толмеке, тудо вигак ӧрдыжкӧ кораҥеш.22Шӱкшудо коклаш ӱдымӧ пырчыже – тиде Юмын шомакым колшо айдеме, но тиде илыш верч тургыжланымаш да поянлыкым йӧратымаш саде шомакым пызыралыт, да тудо саскадыме лиеш.23Сай мландыш ӱдымӧ пырче шомакым колыштшо да умылышо еҥ лиеш. Тыгай-влак саскам пуат: иктыже шӱдӧ пачаш, весыже кудло, южышт кумло пачаш».

24Вес гана калыклан Иисус тыге туштен каласен: «Пылпомыш Кугыжанышым шке пасуэшыже сай урлыкашым ӱдышӧ еҥ дене таҥастараш лиеш.25Еҥ-влак малыме годым тудын тушманже толын да шыдаҥ коклашке шӱкшудым ӱден коден.26Кунам озым лектын, парчам колтен, тунам шӱкшудат кояш тӱҥалын.27Тарзе-влак оза деке толыныт да каласеныт: ”Оза, тый пасуэшет сай урлыкашым ӱден отыл мо? Шӱкшудо тушто кушеч лектын?”28”Тидым тушман ыштен”, – вашештен оза. А тарзыж-влак тудлан ойленыт: ”Ала ме, тушко миен, сомылен кышкена?”29Но тудо каласен: ”Уке, шӱкшудым сомылымыда годым пырля шыдаҥымат кӱрын кертыда.30Тӱредаш тӱҥалмешке тидыжымат, тудыжымат пырля кушкаш кодыза. Тунам тӱредше-влаклан кӱштем: ’Эн ондак шӱкшудым поген налза да, йӱлалташ манын, кылташ пидса, а шыдаҥым клатышкем оптыза’”.»

31Адак нунылан туштен каласкален: «Пылпомыш Кугыжаныш – айдемын шке пасуэшыже ӱдымӧ горчицын нӧшмыж гай.32Тудо чыла моло нӧшмӧ деч изи гынат, кушкын шумекыже, пакчасе кушкыл коклаште эн кугу лиеш, пушеҥге гайыш савырна, сандене кавасе кайык-влак чоҥештен толыт да укш коклаштыже илаш тӱҥалыт».

33Адак нунылан туштен каласкален: «Пылпомыш Кугыжаныш – ру гай. Ӱдырамаш тудым кум виса ложаш дене варен, тыгеракын, уло руаш шуын».

34Иисус чыла тидым калыклан туштен ойлен, туштен каласыде, нунылан нимом ойлен огыл.35Тыге пророк гоч ойлымо шомак шукталтын:
«Туштен ойлаш йылмем рудем,
тӱням ыштыме годсек шылтымым почын каласем».

36Вара Иисус калыкым колтен да пӧртыш пурен. Тунемшыж-влак Тудын кӱдыкӧ миеныт да каласеныт: «Пасусо шӱкшудо нерген туштен каласыметым мыланна умылтаре».

37Иисус нунылан вашештен: «Сай урлыкаш пырчым ӱдышыжӧ – тиде Айдеме Эрге,38пасу – тӱня лиеш, а сай урлыкаш пырчыже – тиде Кугыжанышын эргыже-влак, шӱкшудо – осалын тарзыж-влак.39Шӱкшудым ӱдышӧ тушманже диавол лиеш, тӱредмаш – тиде кызытсе курымын мучашыже, тӱредше-влак – Суксо улыт.40Кузе шӱкшудым погат да тулеш йӱлалтат, кызытсе курым мучаш годымат тугак лиеш:41Айдеме Эрге шке Суксыж-влакым колта, а нунышт Тудын Кугыжанышыж гыч закондымылыкым ыштыше да алгаштарыше-влакым чыланыштым погат,42нуным тулан коҥгаш кудалтат. Тушто шортмаш да пӱйым пурмаш лиеш.43Тунам чын ыштыше-влак Ачаштын Кугыжаныште кече семын волгалтыт. Кӧн колышташ пылышыже уло, тек колеш.

44Пылпомыш Кугыжанышым пасуэш тойымо поянлык денат таҥастараш лиеш. Айдеме тойымо поянлыкым муэш да уэш шылта, вара куанымыж дене кая да, чыла погыжым ужален, тиде пасум налеш.

45Пылпомыш Кугыжаныш адакше йытыра ракывотшер пырче-влакым кычалше сатучо гай.46Пешак шергакан ик ракывотшер пырчым кычал мумеке, каен да, уло погыжым ужален, тудым налын.

47Адакшым Пылпомыш Кугыжаныш – теҥызыш кышкыме вапш гай. Тудо чыла тӱрлӧ колым поген.48Вапш тичак кол логалмеке, тудым серышке шӱдырен луктыныт. Колызо-влак шинчыныт: сай колжым атыш ойырен оптеныт, а йӧрдымыжым луктын кудалтеныт.49Кызытсе курым пытыме годымат тыгак лиеш: Суксо-влак толыт, осал-влакым чын ыштыше кокла гыч ойырат50да тулан коҥгаш кудалтат. Тушто шортмаш да пӱйым пурмаш лиеш».

51Иисус нунын деч йодын: «Те чыла тидым умылышда?» Тунемшыж-влак Иисуслан ойленыт: «Туге, Господь».52Иисус нунылан каласен: «Тыгеракын, Пылпомыш Кугыжанышын тунемшыже улшо закон туныктышо кажныжат клатше гыч у да тошто поянлыкым лукшо сурт оза гай лиеш».

53Нине туштен каласкалымым ойлен пытарымеке, Иисус тушечын каен.54Тудо кушмо кундемышкыже миен, тысе синагогышто туныктен. Еҥ-влак ӧрын-лӱдын ойленыт: «Кушечын тиде Айдемын тыгай уш-акылже да чудым ыштыше вийже?55Але Тудо плотникын эргыже огыл? Аваже Мария лӱман огыл мо? Але Иаков, Иосий, Симон да Иуда Тудын изашт огытыл?56Тудын акаже-влак мемнан коклаште чылан огытыл мо? Кушечын Тудын чыла тыгайже?»57Нуно Тудлан ӱшанен огытыл. Иисус нунылан каласен: «Шке олаштыже да мӧҥгысыжӧ-влак коклаште веле пророк чапдыме лиеш».58Ӱшанышт укелан кӧра тушто чудым шуко ончыктен огыл.


*а 13:14-15 Ис 6:9-10.

*б 13:35 Пс 77:2.

предыдущая глава Глава 13 следующая глава