Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЫН ВОЗЫМО СВЯТОЙ ЕВАНГЕЛИЙ

Глава 10

1-15 Иисус латкок Апостолжым калык коклаш колта. 16-25 Ончыкылык поктылмаш. 26-31 Кӧ деч лӱдаш? 32-33 Христосым палыме нерген почын ойлымаш. 34-39 Керде, а тыныслык огыл. 40-42 – 11:1 Суапым налмаш.

1Шкенжын латкок тунемшыжым ӱжынат, Иисус нунылан осал шӱлышым поктен лукташ, чыла тӱрлӧ черым да туешкымым паремдаш властьым пуэн.2Латкок Апостолын лӱмышт тыгай: нунын кокла гыч икымшыже Петр манын лӱмдымӧ Симон, тудын Андрей шольыжо, Зеведейын Иаков эргыже, тудын Иоанн шольыжо,3тыгак Филипп да Варфоломей, Фома да йозак погышо Матфей, Алфейын Иаков эргыже да Фаддей манме Леввей,4Кананит Симон да Иисусым ужалыше Искариот манме Иуда.

5Иисус нине латкокытым калык коклаш колтен, нунылан тыгай каҥашым пуэн: «Чын Юмым палыдыме-влак деке ида кай, самарий калыкын олашкыже ида пуро.6Лучо Израиль калыкысе йомшо шорык-влак деке кайыза.7Коштмыда годым увертарыза: ”Пылпомыш Кугыжаныш ынде лишемын!”8Черлым паремдыза, колышым ылыжтыза, проказе чераным эрныктыза, иям поктен лукса. Яра налында, ярак пуыза.9Корнышко шӧртньӧ, ший, вӱргене оксамат калташ ида пыште,10пеленда сумкамат, вес вургемымат, йолчиемымат, пондымат ида нал. Вет пашаеҥ кочкышыжым сулен налеш.

11Кеч-могай олаш але ялыш пурымеке, тушто келшен толшо еҥым кычал муза, вес вере кайымешкыда тудын денак кодса.12Пӧртыш пурымыда годым ”суртыштыда тыныслык лийже” манын саламлыза.13Нуно келшен толшо улыт гын, тендан тыланыме тыныслыкда тушан кодеш. Келшен толшо огытыл гын, тыланымыда тек тендан декак пӧртылеш.14А кушто тендам огыт пурто да шомакдам огыт колышт гын, тудо пӧрт але тудо ола гыч лекса, йол гычда пуракым почкалтыза.15Тыланда чынак каласем: суд кечын Содом ден Гоморра мландылан тиде ола деч куштылгырак лиеш.

16Мый шорык-влакым пире коклашке колтымо семын тендам колтем, сандене кишке гай ушан, кӧгӧрчен гай титакдыме лийза.

17Еҥ деч шекланыза, вет нуно тендам судитлаш пуат, синагоглаштышт кыраш тӱҥалыт.18Мыланем кӧра тендам вуйлатыше ден кугыжа-влак ончыко кучен намият, тидыже нунылан да чын Юмым палыдыме-влаклан Мыйын нерген таныклымаш лиеш.19Кунам тендам кучыктат, кузе але мом ойлымо нерген ида тургыжлане: мом ойлышаш, тыланда тудо жапыште пуалтеш,20вет те огыл ойлаш тӱҥалыда, а кӧргыштыда улшо Ачадан Шӱлышыжӧ.

21Изаже шольыжым, ачаже эргыжым пушташ пуа, а йоча-влак ача-авашт ваштареш кынелыт да нуным пуштыт.22Мыйын лӱмемлан кӧра чылан тендам ужмышудымо лийыт. А кӧ мучаш марте чытен лектеш, тудо утаралтеш.23Тендам ик олаште поктылаш тӱҥалмеке, весышке куржса. Тыланда чынак ойлем: Айдеме Эрге толмешке, Израильысе ола-влакым эртен огыда шукто.

24Тунемшыже туныктышыж деч кугу огыл, тарзат озаж деч кугу огыл:25тунемше шке туныктышыж гай, а тарзе шке озаж гай лиеш гын, сита. Сурт озам веельзевул манын лӱмдат гын, мӧҥгысыжӧ-влакым тыгак лӱмдаш огыт тӱҥал мо?

26Тыгеракын, еҥ-влак деч ида лӱд: нимо шылтен аралыме почылтде ок код, нимогай шолып чараш лекде ок код.27Мом Мый тыланда пычкемыште ойлем, волгыдышто каласкалыза. Мо нерген пылышыш шыпак ойлымым колыда, леведыш ӱмбач увертарыза.28Капым пуштшо, но чоным пуштын кертдыме-влак деч ида лӱд. Чонымат, капымат тамыкыште пытарен Кертше деч лӱдса.

29Тыгыде ик оксалан огыл мо кок пӧрткайыкым ужалат? Тендан Ачадан эрыкше деч посна нунын кокла гыч иктыжат мланде ӱмбаке садак ок камвоч.30А тендан вуйысо ӱп пырчыдамат чыла шотлымо.31Тугеже, ида лӱд, те шуко пӧрткайык дечат шерге улыда.

32Кӧ еҥ ончылно Мыйым палымыж нерген почын ойла, тудым палымем нерген Мыят Пылпомышсо Ачам ончылно почын ойлем.33А кӧ еҥ ончылно Мый дечем кораҥеш, Мыят Пылпомышсо Ачам ончылно тудын деч кораҥам.

34Мый мланде ӱмбаке тыныслыкым кондаш толынам манын ида шоно. Тыныслыкым огыл, кердым кондаш толынам:35эрге ден ачам, ӱдыр ден авам, шешке ден авалийшым икте-весе ваштареш шогалташ толынам.36Айдемылан мӧҥгысыжӧ-влак тушманыш савырнат.

37Кӧ шке ачажым але аважым Мыйым йӧратыме деч чот йӧрата, Мыланем йӧрышӧ огыл, але кӧ эргыжым але ӱдыржым Мыйым йӧратыме деч чот йӧрата, Мыланем йӧрышӧ огыл.38Тыгак кӧ шке ыресшым ок нал да почешем ок кай, тудо Мыланем йӧрышӧ огыл.39Шке чонжым аралаш тӧчышӧ чонжым йомдара, а Мыйын верч чонжым йомдарыше – муэш.

40Тендам порын вашлийше Мыйымат порын вашлиеш, а Мыйым порын вашлийше Мыйым Колтышымат порын вашлиеш.41Иктаж-кӧ пророк гын, да тидлан кӧра тудым ала-кӧ порын вашлиеш гын, пророкын гаяк суапым налеш. Иктаж-кӧ чын ыштыше гын, да тидлан кӧра тудым ала-кӧ порын вашлиеш гын, чын ыштышын гаяк суапым налеш.42Тыланда чынак ойлем: кӧ нине изирак-влак кокла гыч иктыжлан, тудо Мыйын тунемшем улмылан веле, корка йӱштӧ вӱдым йӱаш пуа гынат, суапым налде ок код».


*а 10:29 Эрык – воля, желание.

*б 10:35-36 Мих 7:6.

предыдущая глава Глава 10 следующая глава