Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЫН ВОЗЫМО СВЯТОЙ ЕВАНГЕЛИЙ

Глава 8

1-4 Проказе чераным паремдымаш. 5-13 Шӱдывуйын*a тарзыжым паремдымаш. 14-17 Иисус шуко еҥым паремда. 18-22 Почешем кайыза. 23-27 Иисус тӱтан мардежым чара. 28-34 Иисус иям поктен луктеш.

1Курык гыч Иисусын волымекыже, почешыже шуко еҥ каен.2Теве Иисус деке проказе черан лишемын да ончыланже возын каласен: «Господь, паремдынет гын, мыйым эрныктен кертат».3Иисус кидым шуялтен, тудым тӱкалтен да каласен: «Паремдынем, эрналт». Проказе черже тунамак пытен.4А Иисус тудлан ойлен: «Шеклане, тидын нерген нигӧлан ит ойло, но кай, шкендым иерейлан ончыкто да Моисейын шӱдымӧ надырым пу. Тидын дене тый паремметым ончыктет».

5Кунам Иисус Капернаумыш толын, Тудын деке шӱдывуй миен да полышым йодын:6«Господь, мӧҥгыштем тарзем кия, тудо йыжыҥдыме да моткоч орлана».7Иисус тудлан каласен: «Мый мием да тудым паремдем».8Шӱдывуй вашештен: «Господь, пӧртыш пурыметым мый ом шого. Тарзем паремже манын, мутым гына пелеште.9Мый шкежат кид йымалсе еҥ улам, мыйынат кид йымалнем сарзе-влак улыт. Иктылан ойлем: ”Кае” – тудо кая, весыжлан ”Тышке тол” манам – тудо толеш, тарземлан ойлем: ”Тидым ыште” – тудо ышта».10Тидым колмеке, Иисус ӧрын да почешыже толшо-влаклан каласен: «Тыланда чынак ойлем: тыгай кугу ӱшанымашым Израильыштат вашлийын омыл.11Тыланда ойлем: эрвел ден касвел гыч шукын толыт да Пылпомыш Кугыжаныште Авраам, Исаак да Иаков дене пырля ӱстелтӧреш верланат.12А кӧ шочынак Кугыжанышын эргыже лийын, нуным пычкемышке луктын кудалтат. Тушто шортмаш да пӱйым пурмаш лиеш».13Иисус шӱдывуйлан каласен: «Кае, тек тылат ӱшанымет семынак лиеш». Шӱдывуйын тарзыже тунамак паремын.

14Иисус Петрын пӧртышкыжӧ толын да тудын шокшымужо дене орланен кийыше оньыкуважым ужын.15Иисус тудын кидшым тӱкалтен, да шокшымужо пытен. Оньыкува кынелын да нуным унам ыштен.

16Кас шумеке, Иисус деке ия кучыман шуко еҥым конденыт. Тудо осал шӱлышым шомак дене поктен луктын да чыла черлым паремден.17Тыге Исаия пророк гоч каласыме шомак шукталтын. Исаия ойлен:
«Тудо ӱмбакыже мемнан туешкымынам налын,
чернам нумал наҥгаен».

18Шке йырже шуко калыкым ужын, Иисус вес серыш вончаш каласен.19Тунам закон туныктышо ик еҥ лишемын да Тудлан каласен: «Туныктышо! Кеч-кушко Тый кает, мый почешет мием».20Иисус тудлан ойлен: «Рывыж-влакын илыме рожышт уло, кавасе кайык-влакын – пыжашышт, а Айдеме Эргылан вуйым нигушан эҥерташ».21Тунемшыж кокла гыч весе Тудлан каласен: «Господь, ондак ачамым тояш каяш эрыкым пу».22Но Иисус тудлан ойлен: «Почешем кае, колышо-влакыштым тояш колышо-влакым кодо».

23Иисус пушыш шинчын, тунемшыж-влак Тудын деке ушненыт.24Теҥыз ӱмбалне пеш тале тӱтан тӱҥалын, толкын-влак пуш гоч лупшалтыныт, а Иисус мален.25Тунемшыж-влак Тудын деке лишемыныт, помыжалтареныт да каласеныт: «Господь, мемнам утаре, пытена!»26Иисус нунылан ойлен: «Молан тынар лӱдыда, шагал ӱшаныше-влак?» Вара кынел шогалын, мардежлан чарнаш да теҥызлан шыпланаш кӱштен, да пешак тымык лийын.27Еҥ-влак ӧрын ойленыт: «Кӧ тиде? Мардежат, теҥызат Тудын мутшым колыштыт!»

28Иисус вес серысе Гергеса калыкын илыме кундемышкыже толын. Тудым ия кучыман кок еҥ вашлийын, нуно шӱгарла гыч лектыныт. Пешак ажгыныше лийынытат, тиде корно дене нигӧ коштын кертын огыл.29А теве нуно кычкыреныт: «Иисус, Юмын Эрге, Тыйын мемнан дене мо пашат? Тый мемнам жап шудеак орландараш толынат?»30Умбалне кугу сӧсна кӱтӱ коштын.31Ия-влак Иисус деч йодыныт: «Мемнам поктен луктат гын, сӧсна кӱтӱшкӧ колто».32Тудо нунылан каласен: «Кайыза». Нуно лектыныт да сӧсна кӧргыш пуреныт. Тунам уло кӱтӱ тура сер гыч теҥызыш шуҥгалтын да вӱдыш пурен каен.

33Кӱтӱчӧ-влак куржыныт, да олашке мийымеке, чылажымат увертареныт, ия кучыман-влак дене мо лиймымат каласкаленыт.34Тунам оласе уло калык Иисусым вашлияш лектын, Тудым ужмеке, шке кундемышт гыч каяш йодын.


*а 2.0 Шӱдывуй – книга мучаште мутерым ончо.

*б 8:14 Оньыкува – ватыжын аваже.

*в 8:17 Ис 53:4.

*г 8:20 Айдеме Эрге – книга мучаште мутерым ончо.

предыдущая глава Глава 8 следующая глава