Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ТӰҤАЛТЫШ

Моисейын икымше книгаже

Глава 49

1 Иаков эргыже-влакым шкеж деке ӱжеш да кажныжым суапландара. 29 Махпелаште улшо шӱгарыште шкенжым тояш шӱда да илыш дене чеверласа.

1Иаков эргыже-влакым ӱжын да каласен: «Пырля погыныза, тендан дене ончыкшым мо лийшашым увертарем.

2Иаковын эргыже-влак, иквереш чумыргыза,
колыштса, Израиль ачадан ойлымыжым колыштса.

3Рувим, эн ончыч шочшо эргым!
Тый – мыйын пеҥгыдылыкем, виемын икымше саскаже,
куатын эн кугу кӱкшытшӧ, чылашт деч кӱшнӧ тый улат.
4Но тый вӱдтолкын семын лӱшкенат –
сандене кӱшнӧ шогаш от тӱҥал:
тый ачатын малыме верышкыже кӱзенат,
малыме верем амыртен, тушко кӱзенат.

5Симеон ден Левий, иза-шольо,
нунын кердышт – чаманыдымашын саркуралже.
6Мыйын чонем нунын ойышт дене ынже келше,
мыйын шӱмем нунын погынышкышт ынже ушно.
Вет нуно кугун сырымышт дене еҥым пуштыныт,
кумыл шупшмо почеш ӱшкыж йол шӧным пӱчкеденыт.
7Лийже каргыме шыдышт – чаманыдыме тудо,
да нунын ажгынымышт – шучко тудо.
Иаков тукым коклаште нуным шеледем,
Израиль калык коклашке шалатен колтем.

8Иуда! Тыйым иза-шольыч-влак моктат.
Кидет тыйын – тушман шӱйлодышто,
ачатын эргыж-влак тылат вуйыштым сават.
9Иуда – самырык лев.
Сонар гыч мом кучен кондымет деч,
эргым, тые кынелат.
Лев семын, ава лев семын тудо возын да кия.
Кӧ тудым кынелташ тоштеш?
10Кугыжан тоя Иуда деч ок кораҥ,
да законым пуэн шогышо еҥ тудын тукымыштыжо эре лиеш.
Жап шумеке, тудын тукымжо гыч Кугыжа лектеш,
да калык-влак Тудым колыштын илаш тӱҥалыт.
11Ишакшым тудо виноград вондыш йолышта,
эн сай виноград вондыш йолышта ава ишакын самырык чомажым.
Виноград аракаш мушкеш шке вургемжым,
виноград вӱреш мушкеш шке чиемжым.
12Шинчаже йылгыжеш йошкар аракам йӱмыж деч,
пӱйжӧ ошо – шӧрым йӱмыж деч.

13Завулон тӱҥалеш илаш теҥыз серыште,
корабль шогалме вер воктене,
мланде чекше тудын Сидон марте шуэш.

14Иссахар – вольык пече-влак коклаште кийыше пеҥгыде ишак.
15Тудо ужын: вер-шӧр сай, тиде мланде пеш сӧрал,
да пӱгыртен нумалтышлан вачыжым,
йозакым тӱлаш манын, пашам ышташ пижын.

16Дан, Израильын ик тукымжо,
шке калыкшым вуйлаташ тӱҥалеш.
17Дан – корнышто кийыше кишке гай,
йолгорнышто кийыше шем кишке гай:
имне йолым чӱҥгалеш – имнешкыже комдык йӧрлеш.

18Тыйын полышетым мый вучем, Господь!

19Гад – агыше-влак тудым шыгыремдылаш тӱҥалыт,
но тудо, почешышт куржын, нуным шке поктен колта.

20Асир – кинде лектышыже лиеш чапле,
кугыжалык кочкышым тудо кондедаш тӱҥалеш.

21Неффалим – кӱкшӧ теревинф пушеҥге,
тудын укшыжо одарле да сӧрал.

22Иосиф – саскам пуышо самырык пушеҥге,
памашшинча воктене кушшо саскан пушеҥге,
тудын укшыжо кӱ песте ӱмбалне шарлен возын.
23Пикшызе-влак тудым витареныт да ӱмбакше лӱйкаленыт,
тудын дене кучедал иленыт.
24Но Иаковын куатле Юмыжын кидшылан кӧра
Иосифын пикш-йоҥежше да кид чогашылже пеҥгыде,
вет Израильын Кӱтӱчыжӧ да кӱ курыкшо Юмо улеш.
25Ачатын Юмыжо тылат полшыжо,
Чылакертше тыйым суапландарыже,
тыланет кӱшыч кавасе суапым,
мланде келгытыште улшо суапым,
чызе ден авагудылан суапым пуыжо.
26Ачатын суапландарымашыже ожнысо курык-влакын,
курым дене шогышо чоҥга-влакын суапышт дечат кугурак лийже.
Тек тиде суапландарымаш Иосифын вуй ӱмбалныже,
чыла иза-шольо кокла гыч ойырен налмын ӱмбалныже, лиеш.

27Вениамин – сут пире,
мом кучымыжым тудо эрдене кочкеш,
а кастене моло дене пайла».

28Теве Израильын чыла латкок тукымжо да мом нунылан ачашт суапландарен каласен. Тудо кажныжлан посна суапландарымаш мут-влакым ойлен.

29-30Тудо эргыже-влаклан кӱштен каласен: «Мый шке ача-кочам-влак деке каем. Мыйым нунын пелен хеттей Ефронын нурыштыжо улшо курыкпомышеш – Ханаан мландеш, Мамре воктене, Махпела нурышто улшо курыкпомышеш, – тойыза. Тойымо верым ышташ манын, Авраам тудым хеттей Ефрон деч нуржыге налын.31Тушто Авраам ден тудын Сарра ватыжым, Исаак ден Ревекка ватыжым тойымо, да мый тушан Лиям тоенам.32Тиде нур да тушто улшо курыкпомыш хеттей-влак деч оксала налме улыт».

33Иаков сугыньжым эргыже-влаклан ойлен пытарен, йолжым вакшышышкыже нӧлтал пыштен да колен – шке ача-кочаж-влак деке каен.


*а 49:4 Ончо 35:22.

*б 49:21 Тиде верым вес семынат кусараш лиеш: «Неффалим – чатка капан пӱчӧ, сӧрал мут-влакым тудо ойласа».


предыдущая глава Глава 49 следующая глава