Выбрать язык
Книги Ветхого Завета
Книги Нового Завета
с русским текстом1Anheli ozutti minule elaijanvien joven, kudai matkuau Jumalan da Vuonan prestolaspäi puhtahannu gu hrustali.2Linnan pihan keskel, joven yhtel dai toizel puolel kazvau elaijanpuu. Tämä puu andau sualehen kaksitostu kerdua vuvves, kerran kuus, i sen lehtis muailman rahvahat suajah tervehytty.3Nimidä kirottuu enämbiä ei rodei. Linnas on Jumalan da Vuonan prestol, i kaikin palvotah Jumalua.4Hyö nähtäh Hänen rožat, i Hänen nimi on heil očas.5Yödy sie enämbiä ei rodei, i heile ei pie ni lampan, ni päiväzen valgiedu, valgien heile andau Ižändy Jumal. I hyö ruvetah pidämäh suarinvaldua ainos dai ilmazen ijän.
6Anheli sanoi minule: «Nämä sanat ollah uskottavat da tovet. Ižändy Jumal, kudai andau oman Hengen Hänen iänenkandajile, työndi oman anhelin ozuttamah omile käskyläzile, midä pidäy terväh roijakseh.»
7- Minä tulen terväh! Ozakas on se, kudai ottau vardeh tämän kniigan ennustussanat.
8Minä, Iivan, kuulin da näin tämän kaiken. Sen kuultuu da nähtyy minä painuin muah, gu kumarduakseh jalgah sille anhelile, kudai ozutti sen minule.9No anheli sanoi minule: «Älä, kačo, rua sidä! Minä olen Jumalan käskyläine, juuri moine kui sinä dai sinun vellet, Jumalan iänenkandajat, i kaikin net, kudamat otetah vardeh tämän kniigan sanat. Kumardai Jumalale!»
10Sit häi sanoi minule: «Älä salbua pečatil tämän kniigan sanoi; aigu on lähäl.»11Viäry anna iellehgi luadiu viärytty, pagan luajikkah ielleh paganua, oigei iellehgi luajikkah oigiedu, a pyhä olgah ielleh pyhänny.
12«Minä tulen terväh! Minä tuon tulles palkan jogahizele, maksan kaikile heijän ruadoloi myö.13Minä olen Al'fa da Omega, enzimäine da jälgimäine, algu dai loppu.»
14Ozakkahat ollah net, kudamat pestäh omat sovat: heil on valdu syvvä elaijanpuus da mennä veriälöin kauti linnah.15Linnan ulgopuolele jiäjäh koirat da tiedovoiččijat, karguajat, tappajat, valehjumalile kumardelijat da kaikin, ket suvaijah kielastustu da kielastellah.
16«Minä, Iisus, työnnin oman anhelin sanelemah teile kaikes täs uskojien kanzukunnis. Minä olen Davidan juuri dai veza, minä olen valgei huondestiähti.»
17Hengi da andilas sanotah: «Tule!» I ken kuullou tämän, sanokkah: «Tule!» Anna tulou se, kedä juotattau! Ken tahtonou, se otakkah ilmai elaijanvetty.18Jogahizele, ken kuulou tämän kniigan ennustussanat, minä lujah sanon: Gu ken ližännöy niilöih midätahto, sille Jumal ližiäy net pahuot, kudamih niškoi on kirjutettu täs kniigas.19A gu ken ottanou midä iäre tämän ennustuskniigan sanois, sil Jumal ottau hänen vuitin elaijanpuuh da pyhäh linnah, kudamih niškoi täs kniigas on kirjutettu.
20Häi, tämän tovestai, sanou: «Tozi on, minä tulen terväh!» Amin', tule, Ižändy Iisus!
21Ižändän Iisusan armo olgah kaikkienke!
Глава 22