Выбрать язык
Книги Ветхого Завета
Книги Нового Завета
с русским текстом1Sit minä näin, kui taivahaspäi heittyy anheli, kudamal käis on pohjattoman havvan avain da suuri čieppi.2Häi tabai lendäimavon, sen ilmanigäzen mavon, kudai on pahalaine da sattan, da pani sen čieppih tuhandekse vuottu,3lykkäi pohjattomah haudah, salbai havvan da pani pečatin sen uksele, gu se lendäimado ei enämbi muanittelis rahvahii, kuni ei mene tuhat vuottu. Sit se pidäy piästiä kodvazekse välläle.
4Minä näin prestolat, niilöil istuttih net, kelle oli annettu valdu suudie. Minä näin i niilöin henget, kudamil leikattih piä Jumalan sanan täh da sendäh, gu hyö sanottih tozi Iisusas. Hyö ei kumardettuhes zvierile da hänen kuvale, eigo otettu sen merkii ni oččah, ni kädeh. Hyö elavuttih da piettih valdua yhtes Iisusanke tuhat vuottu.5A toizet kuolluot ei elavuttu, kuni ei mennyh tuhat vuottu.
Tämä on enzimäine kuollieloisnouzendu.6Ozakkahat da pyhät ollah net, kudamat elavutah enzimäzen kuollieloisnouzendan aigua! Toizel surmal ei ole valdua heijän piäl, hyö roijah Jumalan da Hristosan papit i ruvetah pidämäh valdua Hänenke tuhat vuottu.
7A konzu täyttyy tuhat vuottu, sattanua piästetäh tyrmäs,8i se lähtöy muan n'elläh puoleh muanittelemah rahvahii, Gogua dai Magogua, gu kerätä heidy torah. Heidy on gu peskuu meren rannal.9Hyö levitäh muan lagevole da otetah suarrokseh pyhien stuanu da suvaittu linnu. No taivahaspäi išköy tuldu, se tuli hävittäy heidy.10Pahalaine, heijän muanittelii, lykätäh tulizeh rikkijärveh, kunne jo lykättih zvieri da se, kudai heittelihes Jumalan iänenkandajakse. I ruvetah heidy sie muokkuamah yöt dai päivät, ainos dai ilmazen ijän.
11Minä näin suuren valgien prestolan da sil istujan. Hänen ies pajettih mua dai taivas - ei olluh niilöile sijua.12Minä näin kuolluzii, suurii dai pienii, kudamat seizottih prestolan ies. Avattih kniigat, avattih sit elaijankniigugi. Kuolluzii suudittih heijän ruadoloi myö, sidä myö, midä oli kirjutettu kniigah.13Meri andoi omii kuolluzii, surmu da tuonilmaine annettih omii kuolluzii, i jogahistu suudittih hänen ruadoloi myö.14Sit surmu dai tuonilmainegi lykättih tulijärveh. Se on toine surmu - tulijärvi.15Kenen nimie ei löydynyh elaijankniigas, sidä lykättih tulijärveh.
Глава 20