Выбрать язык
Книги Ветхого Завета
Книги Нового Завета
с русским текстом1Sit minä näin: kačo vai, Vuonu seizou Sionan mäil da Hänenke sada n'ellikymmenn'elli tuhattu, kudamien oččah on kirjutettu Hänen nimi da Hänen Tuatan nimi.2Minä kuulin taivahaspäi iänen, kudai oli gu suurien vezien bauhu, libo gu suuren jyryn räčkeh. Iäni, kudaman minä kuulin, oli vie kui arfan iäni, konzu arfansoittajat soitetah omal arfal.3Prestolan ies da niilöin n'ellän elävän da vahnimien ies hyö pajatettih uuttu pajuo. Niken muut ei voidu opastuo sidä pajuo, vai net sada n'ellikymmenn'elli tuhattu, kudamii oli ostettu mualpäi.4Hyö ollah net, kudamat ei paganoitettu iččie naizienke, hyö ollah koskemattomat. Hyö mennäh Vuonan peräh, mengäh Häi kunnetahto. Heidy on ostettu rahvahien joukos gu uudine Jumalale da Vuonale.5Heijän suus ei kuultu kielastustu, hyö ollah soimuamattomat.
6Sit minä näin vie yhten anhelin, kudai lendi keskitaivahal. Häi kandoi ilmanigästy jevangeliedu, gu kuuloittua se kaikile muan eläjile, kaikile rahvahile, roduloile, kielile dai mualoile.7Häi sanoi korgiel iänel: «Varakkua Jumalua da ozutakkua Hänele kunnivuo, Hänen suvvon aigu on tulluh! Kumarduattokseh Hänele, kudai on luadinuh taivahan, muan, meren dai kai viennouzemat!»
8Hänele jälles tuli toine anheli da kirgui: «Kuadui, kuadui suuri Vavilon, kudai omal karguandal pani kai rahvahat juomah Jumalan vihan viinua.»
9Nämile kahtele anhelile jälles tuli vie kolmas anheli, kudai sanoi korgiel iänel: «Ken kumardannehes zvierile da hänen kuvale, ken ottanou oččah libo kädeh hänen merkin,10segi rubieu juomah Jumalan vihan viinua, kudai on laimendamattomannu valettu Hänen vihan mal'l'ah. Händy ruvetah muokkuamah tulel da rikil pyhien anheliloin da Vuonan ies.11Sit tules, kudamal muokatah nämii ristikanzoi, nouzou savvu yläh ainos dai ilmazen ijän, i ni yöl, ni päiväl ei rodei rauhua niilöile, kudamat kumardetahes zvierile da hänen kuvale, eigo nikelle, ken ottau hänen nimen merkin.12Täs kyzytäh lujuttu jumalanuskojis, niilöis, kudamat noutah Jumalan käskylöi da uskotah Iisussah.»
13Sit minä kuulin taivahaspäi iänen, kudai sanoi: «Kirjuta: Ozakkahat ollah net, kudamat täs aijas lähtijen kuoltah Ižändän ominnu! Se on tozi, sanou Hengi. Hyö voijah huogavuo omis vaivois, gu heijän ruavot tullah heile peräh.»
14Sit minä näin: oli valgei pilvi, a pilvel istui kenlienne ristikanzan luaduine. Hänel piäs oli kuldaine venču i käis terävy širpi.15Vie yksi anheli tuli pyhäkoispäi. Häi kovah kirgai pilvel istujale: «Pane širpi ruadamah da leikkua, nygöi on leikkavoaigu - muan vil'l'u on kypsi leikattavakse!»16Pilvel istuju lykkäi oman širpin muale, i muan vil'l'u oli leikattu.
17Vie toine anheli tuli taivahallizes pyhäkoispäi, hänel sežo oli terävy širpi.18Altarispäi sežo tuli anheli, se kudai ižändöičči tuldu. Häi kovah kirgai sille anhelile, kudamal oli terävy širpi: «Pane ruadamah oma terävy širpi da keriä viinumuarjuskänčät muan viinumuarjupellos, gu muarjat kypsettih.»19Anheli lykkäi oman širpin muale, leikkai viinumuarjuskänčät muan viinumuarjupellos da lykkäi net Jumalan vihan suureh viinupuzerdamoh.20Muarjat polgiettih puzerdamos linnan ulgočural, i veri valui piäliči puzerdamon reunois, katoi muan tuhandele kuvvelesuale stadionale*a da nouzi hevon suiččih suate.
*a 14:20 Tuhat kuuzisadua stadionua on nenga 300 virstua.
Глава 14