Выбрать язык
Книги Ветхого Завета
Книги Нового Завета
с русским текстом1Enzimäzes sovus oldih sluužbua koskijat käskyt dai oli mualline pyhäkodi.2Pyhäkoinnu oli stuanu, kudaman enzimäzes pertis oli lampanjalgu, stola da sil pyhät leivät. Tädä pertii sanottih Pyhäkse.3Toizen zuavesin tagan oli stuanun toine puoli, kudamua sanottih Kaikispyhimäkse.4Sie oli kuldaine kuajindualtari da sovun lipas, kudai oli kaikkielpäi piällystetty kullal. Lippahas oli kuldaine ast'e, kudamas oli mannua, da lehteh puhkennuh Aaronan keppi da sovun kivipliitat.5Lippahan kannel oldih heruvimat, taivahallizen valgien anhelit, kudamat levitettih omat siivet riähkien prostindukohtan piäle. Tädä kaikkie nygöi ei ole hädiä sellittiä tarkembah.
6Nenga kai oli luajittu. Stuanun enzimäzeh pertih ainos kävväh papit vedämäh sluužbua.7A stuanun toizeh pertih menöy vai ylimäine pappi, da häigi vai kerran vuvves. Hänel pidäy olla keral verdy, häi tuou sen Jumalale omas ičes tuači dai rahvahan tiedämättömis riähkis tuači.8Nenga Pyhä Hengi ozuttau, gu dorogu Kaikispyhimäh ei ole avattu, kuni seizou stuanun enzimäine perti.9Kai tämä ozuttau nygösty aigua, konzu tuvvah lahjua da žertvua, no net ei voija loppuh suate puhtastua Jumalale sluužijan hengie.10Nämä käskyt, juuri muga kui syömizet da juomizet, kaikenjyttymät pezendät da pezevyndätgi, koskietahes vai ristikanzan rungua da pyzytäh väis sih aigah suate, kuni kai pannah uudeh luaduh.
11No tuli Hristos, tulijan hyvän ylimäine pappi. Häi sluužii suurembas da parembas stuanus, kudai ei ole luajittu käzil, se stuanu ei ole täs muailmaspäi tulluh.12Häi meni Kaikispyhimäh, ei kozlien da häkäččylöin verenke, a meni sinne oman verenke. Nenga Häi yhtel kerdua piästi meidy välläle ilmazekse ijäkse.13Gu jo kozlien da häkäččylöin veri da poltetun lähtemän tuhkuvezi, kudamii pirskutetah paganois olijan piäle, puhtastau ulgoči,14ga kui äijiä enämbäl sit puhtastau Hristosan veri! Ilmanigäzen Hengen väil Hristos andoi iččie vijattomannu žertvannu Jumalale, i Hänen veri puhtastau meijän hengen tyhjis ruadolois, gu sluužie eläväle Jumalale!
15Juuri sikse on Hristos uvven sovun keskusmies, gu kučutut suadas ilmanigäzen kodivuitin, kudaman Jumal uskaldi heile. Hristoshäi kuoli, gu piästiä ristikanzoi välläle enzimäzen sovun aigua luajittulois riähkis.16Sobu on vie uskalmobumuagu, da uskalmobumuagan luadijan kuolendu pidäy ainos ozuttua tovekse.17Uskalmobumuaguhäi pädöy dieloh vai luadijan kuoltuu, se ei päi, kuni sen luadii on elos.18Sikse enzimästygi sobuu ei lujendettu verettäh.19Konzu Moisei oli lugenuh rahvahale kai Zakonan käskyt, häi otti häkäččylöin da kozlien verdy vienke, ruskiedu villua da isopan korzii da pirskutti sidä kniigan da kaiken rahvahan piäle,20da sanoi: «Tämä on sovun veri, sen sovun, kudamas Jumal käski teile pyzyö.»21Muga häi pirskutti verdy pyhästuanun piäle da kaikkien vehkehien piäle, kudamii pietäh Jumalale sluužijes.22Zakonan mugah vähilleh kai puhtastetah verel, ei ole prostindua veren valuttamattah.
23I gu taivahallizien kuvat pidäy puhtastua nenga, ga sit iče taivahallizet pidäy puhtastua vie parembil žertvoil miku elättilöin veri.24Hristoshäi meni, ei ristikanzan käzil luajittuh pyhäkodih, kudai on vai tozi pyhäkoin kuvahaine, a meni ihan taivahah, gu jiäviekseh nygöi Jumalan edeh pagizemah meis tuači.25I ei mennyh sikse, gu andua iččie žertvakse moneh kerdah, muga kui ylimäine pappi joga vuottu menöy Kaikispyhimäh vierahan verenke.26Muitehäi Hristosal pidänys äijy kerdua muailman luajindas tirpua kuolendugor'at. No Häi jiäviihes nygözeh muailmah vai kerran, nygöi, aijoin agjas, gu hävittiä riähkät oman veren hinnal.27Joga ristikanzal pidäy kerdu kuolta, a sit rodieu suudo.28Mugai Hristos, kudai oli annettu žertvakse kerran ilmazekse ijäkse, gu ottua iäre kaikkien riähkät, tulou toizen kerran, ei riähkien täh, a piästämäh niilöi, ket Händy vuotetah.
Глава 9