Выбрать язык
Книги Ветхого Завета
Книги Нового Завета
с русским текстом1Minä Puavil, Hristosan Iisusan kiiniotettu, dai velli Timofei työnnämmö tervehytty kallehele meijän ruadovellele Filimonale,2sizärele Apfiele, toravellele Arhipale da uskojien kanzukunnale, kudai kerävyy sinun taloih.3Armuo da rauhuttu teile Jumalas, meijän Tuataspäi, da Ižändäs Iisusas Hristosaspäi!
4Minä ainos kiitän minun Jumalua, konzu mustelen sinuu omis malittulois.5Kuulenhäi puaksuh sinun suvaičukseh da uskoh näh, kudai sinul on Ižändäh Iisussah da kaikkih jumalanuskojih.6Minä molimmos, gu sinä väzymättäh sanelizit omas uskos muga, ga iče loppuh suate ellendäzit kaiken hyvän, midä meil on Hristosas.7Sinun suvaičus, velli, minuu äijäl ihaskoittau da andau minule rohkevuttu, gu sinä annat jumalanuskojien hengile hoivua.
8Hos minul on Hristosan annettu valdu käskie sinule ruadua, midä kuuluu,9no gu suvaičen sinuu, ga minä parembi kyzyn. Se minä Puavil, jo vahnu mies da ližäkse vie Hristosan Iisusan kiiniotettu,10kyzyn sinuu Onisiman puoles, kudai minule rodih gu poigu minun tyrmäs olles.11Enne häi oli sinule hyövytöi, a nygöi hänes on hyödyy sinule dai minule.*a12Työnnän händy järilleh sinun luo - händy, minun omua syväindy.13Minä tahtozin pidiä händy tiä, anna häi auttas minule sinus tuači, gu olen jevangelien täh tyrmäs.14No en tahto luadie nimidä sinun luvattah, gu sinun hyvys ei rodies gu vägeh luajittu, a olis sinun omas himos lähtenyh.15Toinah sendäh hänele tuli eruondu sinus kodvazekse, gu sinä suazit händy järilleh ijäkse,16no jo ei orjannu, a orjua kallehembannu, armahannu uskovellenny. Ylen armas on häi minule, no vie armahembi on sinule ristikanzannu dai Ižändän omannu.
17Sit gu pidänet minuu uskovellenny, vastua händy, kui vastuazit minuu.18A ku häi liennou luadinuh sinule viärytty libo ollou vellas, pane net minun čottah.19Minä, Puavil, omal käil kirjutan: minä maksan net. En tahto ni paginoih ottua, kui sinä olet vellas minule - vellas omal ičel!20Muga, velli, gu luadizit minule tämän hyvyön meijän Ižändän täh! Anna minun hengele hoivua Hristosan täh!
21Kirjutan tämän, gu uskon: sinä luajit, kui minä kyzyn, i tiijän, luajit vie enämbän, migu minä kyzyn.22Yhtel tiel vie lövvä minule perti. Nad'eičemmos, näit, gu teijän malittuloin vuoh työ suatto minuu sinne.
23Sinule työtäh tervehytty Epafras, kudai minun jytyi on otettu kiini Hristosan Iisusan täh,24da minun ruadovellet Marku, Aristarhu, Dimas da Luka.25Ižändän Iisusan Hristosan hyvys olgah teijän hengenke.
*a 1:11 Nimi Onisimu merkiččöy «hyövylline».
Глава 1