Выбрать язык
Книги Ветхого Завета
Книги Нового Завета
с русским текстом1Minä Puavil, Jumalan käskyläine da Iisusan Hristosan apostol työnnän tervehytty sinule, Tiittu. Minuu on työtty, gu kehittiä Jumalan vallittuloi uskomah Häneh da tundemah toven, kudai vedäy jumalahizeh elaigah.2Sit hyö voijah nad'eijakseh ilmanigäzeh elokseh. Jumal, kudai ei kielasta, enne aijoin alguu uskaldi sen eloksen meile,3a omal aijal jiävii tämän viestin, kudaman sanelemine on annettu minule Jumalan, meijän Piästäjän, käskys.4Sinä, Tiittu, olet meijän yhtehizen uskon täh minule gu oma poigu. Armuo da rauhuttu Jumalas, Tuataspäi da Hristosas Iisusas, meijän Piästäjäspäi!
5Jätin sinuu Kritale sih niškoi, gu sinä luadizit sie kai, midä on vie luadimattah, da gu panizit linnoi myö uskojien kanzukunnile vahnimat juuri muga, kui minä käskin.6Vahnimannu voibi olla moittimatoi mies, yhten akan ukko. Hänen lapsil pidäy olla Jumalan uskojinnu, a ei moizinnu, kudamii suau soimata vällillizikse libo sanankuulemattomikse.7Kanzukunnan kaččojalehäi on annettu Jumalan ruado, sikse hänel pidäy olla moizennu, kudamua ei sua moittie nimis. Anna häi ei olis omanenäine, ruttotabaine, juomari, toračču, libo moine, kudai muanivol tahtou hyödyö.8A hänel pidäy olla rahvahan suvaiččijannu, hyväntahtojannu, vagavumielizenny, oigieh eläjänny, jumalahizennu da hänel pidäy pidiä iččie käzis.9Hänel pidäy pyzyö uskottavas sanas, kudamah on opastettu, ku häi vois toizii n'evvuo tervehel opastandal da ozuttua vastahsanojile, mis hyö ollah viärät.
10On äijy vällillisty, tyhjän pagizijua da muanittajua, semmite ymbärileikattuloin uskojien keskes.11Heil pidäy salvata suut, sendäh ku hyö uraitetah kogonazii perehii, opastajen midä ei pidäs, ku olis vai ičele hyödyy.12Onhäi yksi kritalazis, heijän oma ennustai sanonuh:
«Kritalazet ollah ainos kielahat,
pahatabazet gu zvierit,
täydymättömät da laškat.»
13I se on tozi. Sendäh kiännytä heidy oigiele dorogale lujal sanal, ku hyö roittas tervehet uskos.14Anna hyö ei kuunnella jevreilöin zuakkunoi da niilöin rahvahien käskendöi, kudamat kiännyttih iäre toves.15Puhtahile on kai puhtas, a paganoile da uskomattomile ni mi ei ole puhtas, heijän mieli dai hengi on rikottu.16Hyö sanotah buite tundietah Jumalua, a omil ruadoloil hyö kieldävytäh Hänes, ku ollah ilgiet da sanankuulemattomat eigo pätä nimittumah hyväh ruadoh.
Глава 1