Выбрать язык
Книги Ветхого Завета
Книги Нового Завета
с русским текстом1Uskottavu on sanondu: ken tahtou piästä uskojien kanzukunnan kaččojan ruadoh, se hyväh ruadoh tahtou.2Kanzukunnan kaččojannu pidäy olla mies, kudamua ei ole mis moittie, yhten naizen ukko, selgiel piäl da oigieh eläjy, vagavumieline da ičenkaččoi, rahvahansuvaiččii da hyvä opastai,3ei humalniekku, ei toračču, a hil'l'aine da hyväsanaine, i ei d'engansuvaiččii.4Hänel pidäy hyvin pidiä käzis omua perehty, kaččuo, gu lapset kuultas sana da počitoittas kaikkii.5Gu ken ei voinne pidiä käzis omua perehty, kuibo sit häi voibi huolie Jumalan kanzukundua?6Kaččojannu ei sua olla vaste uskoh kiändynyöl, gu häi ei rodies ylbiekse da ei rodies suuditukse moizel suvvol kui pahalaine.7Hänel pidäy olla hyväl kuulužu uskojien kanzukunnan ulgopuolelgi, gu hänes ei paistas pahua da gu häi ei puuttus pahalazen verkoloih.
8Mugai diakonoinnu oldahes počitoitut ristikanzat, ei kaksikielizet, ei juomarit, ei ahnehet eloloih.9Heil pidäy pidiä uskon peittodielo riähkättömäs henges.10No heidygi pidäy enzimäi hyvin kaččuo, i gu heidy ei olle mis moittie, vaste sit tartuttahes diakonan ruadoh.11Muga i naisdiakonoinnu oldahes počitoitut ristikanzat. Heil ei sua paista toizis pahua. Heil pidäy olla selgiel piäl da kaikes suremattomannu.12Diakonal voibi olla vaiku yksi akku, hänel pidäy hyvin pidiä käzis lapsii da taloidu.13Net, ken hyvin ruatah diakonan ruado, suajah ičele korgei sija rahvahan silmis da voijah julgieh sanella uskoh näh, kudai heil on Hristossah Iisussah.
14Kirjuttajes tädä sinule, nad'eičemmos, gu terväh piäzen sinun luo.15A ku hätkestynnen, sinä tiijustat täs kirjazes, kui pidäy vediä iččie Jumalan talois, kudai on elävän Jumalan kanzukundu, toven pačas da alustu.16Kiistämättäh, suuri on meijän uskon peittodielo:
Häi jiäviihes ristikanzan rungas,
Händy ozutti oigiekse Hengi, anhelit nähtih Händy,
Häneh näh saneltih Jumalua tundemattomile rahvahile,
Häneh uskottih muailmas,
Händy otettih taivahallizeh valgieh.
Глава 3