Выбрать язык
Книги Ветхого Завета
Книги Нового Завета
с русским текстом1Otammo nygöi paginoih Ižändän Iisusan Hristosan tulendan da sen, gu meidy kerätäh Hänen luo. Pokoroičemmokseh teile, vellet,2älgiä hedi menetäkkiä mielii, älgiä annakkua pöllättiä iččie sil, buite Hengi jiävii Ižändän päivän jo tulluokse, ni paginoil sih näh, ni buitegu meijän kirjutetul kirjazel, kudamas on se samaine viesti.3Älgiä annakkua nikelle nimih luaduh muanittua iččie. Se päivy ei tule, kuni rahvas ei hyllätä Jumalan uskuo da kuni ei jiävei Jumalan zakonoin vastustai*a, häviendäh lepitty.4Häi, vastustai, nostau iččie korgiembale kaikkie, midä sanotah jumalakse da midä palvotah, istuhes iče jumalankodih i panou iččie Jumalakse.5Mustatto, kui minä sanelin teile täh niškoi jo silloi, konzu olin teijän luo.6Työ tiijättö, mi piettelöy händy, ei anna jiäviekseh, kuni ei tule hänen aigu.
7Viha Jumalan zakonoi vastah peitoči jo ruadau omua. Vai vältyy tiel se, mi vie piettelöy,8dai jiävihes se Jumalan zakonoin vihaniekku, kudaman Ižändy Iisus tappau oman suun hengähtyksel da hävittäy omal jiävindyvalgiel.9Jumalan zakonoin vihaniekan jiävindy on sattanan ruado. Se roih suuren väinke, tunnusruadoloin da kummienke, kudamat muanitetah.10Se kielastelii muanittau niilöi, kudamat ollah menemäs häviendäh, sendäh gu ei suvaittu tottu, kudai piästänys heidy.11Sikse Jumal työndäy heijän piäle vägevän yöksytändän, anna hyö uskottas kielastukseh,12i nenga suajah suvvon kaikin net, kudamat ei uskottu tottu, a suvaittih viärytty.
13No meil ainos pidäy kiittiä Jumalua teijän täh, vellet, kudamat oletto Ižändäle kallehet. Jumalhäi valličči teidy piäzemäh enzimäzenny, konzu Hengi luadiu teidy pyhäkse, i konzu työ uskotto praudah.14Sih niškoi Häi kučuigi teidy jevangelien kauti, kudaman myö toimmo, anna työgi suazitto meijän Ižändän Iisusan Hristosan kunnivon.15Ga olgua sit lujannu, vellet, da ripukkua niilöis opastuksis, kudamat myö annoimmo teile suusanal libo kirjutimmo kirjazes.16Iče meijän Ižändy Iisus Hristos da Jumal, meijän Tuatto, kudai suvaičči meidy da omas hyvyös andoi meile ilmanigäzen urostuksen da lujan nad'oužan,17vagavutakkah teijän mielet da lujendakkah teidy kaikis hyvis ruadolois da paginois.
*a 2:3 Täs on pagin tiedämättömäs ristikanzas, kudamua vastah Hristos toruau jälgipäivänny. Kačo javot 8-9.
Глава 2