Выбрать язык
Книги Ветхого Завета
Книги Нового Завета
с русским текстом1Gu kerran teidy on yhtes Hristosanke nostatettu kuollielois, ga sit ečikkiä sidä, mi on ylähän, kus Hristos istuu Jumalan oigiel puolel.2Pangua mielet sih, mi on ylähän, älgiä sih, mi on mual.3Työhäi oletto kuolluot, i teijän elaigu on Hristosanke peitetty Jumalah.4Konzu Hristos, teijän elaigu, jiävihes, sit työgi jiävittökseh Hänenke taivahallizes valgies.
5Ga sit tapakkua se, mi teis on muallistu: karguandu, paganruavot, kärvänpiendy, pahat himot da ahnehus, gu ahnehus on valehjumaloile kumardelendu.6Niilöin täh tulou Jumalan viha [kuulemattomien piäle].7Nämil jällil työgi kävelittö, konzu elittö mostu elaigua.8A nygöi työ hylläkkiä tämä kai: viha, tabavundu, pahus, toine toizen kiruondu da suuslähtijät huijuttomat sanat.9Älgiä kielastelkua toine toizele. Työhäi jaksavuitto vahnas omas ičes da sen ruadolois10da šuoriittokseh uudeh ristikanzah, kudai ainos vai uvvistuu, opastujen parembi tundemah omua Luadijua da roijen Hänen nägyjäkse kuvakse.11Sit enämbiä ei rodei ni gretsielästy ni jevreidy, ni ymbärileikattuu ni ymbärileikkuamattomua, ei varvarua, ei skifua, ei orjua eigo välliä, vai Hristos on kai i kaikes.
12Työ, Jumalan vallitut, pyhät da Hänele armahat, sellikkiä sit žiälöičendäh, kaikkienke hyvänny olendah, nuorembakse heityndäh, hyväsanazuoh da tirpandah.13Tirpakkua da prostikkua toine tostu, hos ollou kel mis moittie tostu. Kui Ižändy prostii teidy, muga prostikkua työgi.14No kaikis piälimäzikse pangua piäle suvaičendu, kudai hyvin sidou kai yhteh.15Anna teijän sydämis pidäy valdua Hristosan rauhus, kudamah teidy on Hristosan rungah kuulujinnu kučuttu. Älgiä unohtakkua kiittiä.16Anna Hristosan sana kaikes sen bohattuos eläy teijän keskes. Opastakkua da n'evvokkua toine tostu kaikel mielevyöl. Kiittäjen sydämes Jumalua pajatakkua Hänele psalmoi, ylendysvirzilöi da pyhii pajoloi.17Midä luajitto sanoil libo ruadoloil, luajikkua kai Ižändän Iisusan nimes, kiittäjen Hänen kauti Jumalua, meijän Tuattua.
18Akat, kuunnelkua omua ukkuo, muga kui pidäy kuunnella Ižändän uskojil.19Ukot, suvaikkua omua akkua, älgiä olgua händy vaste kovat.20Lapset, kuunnelkua kaikes omii vahnembii, se on Ižändäle mieldy myö.21Tuatat, älgiä ainos čakakkua lapsii, gu heil nivelet ei katkettas.
22Orjat, kuunnelkua kaikes muallizii ižändii, ei vai silmis, gu ugodie, a puhtahas sydämes, taivahallistu Ižändiä varaten.23Olletto hos midä ruadamas, ruadakkua kai kaikes sydämes, kui luadizitto Ižändäle, a ei rahvahile.24Työ tiijättö, työ suatto Ižändäs palkakse kodivuitin. Työhäi sluužitto Ižändäle Hristosale.25Viäryönluadii suau palkan omii ruadoloi myö, sendäh gu Jumal ei kačo čomah rožah.
Глава 3