Выбрать язык
Книги Ветхого Завета
Книги Нового Завета
с русским текстом1Puavil, Jumalan tahtos Hristosan Iisusan apostol, da velli Timofei2työtäh tervehytty Jumalan rahvahale, Hristossah uskojile vellile Kolossah. Armuo da rauhuttu teile Jumalas, meijän Tuataspäi.
3Ainos, konzu molimmokseh teijän puoles, myö sanommo passibot Jumalale, meijän Ižändän Iisusan Hristosan Tuatale.4Myö kuulimmo, gu työ uskotto Hristossah Iisussah da suvaičetto kaikkii jumalanuskojii.5Usko da suvaičus ollah teil, gu työ nad'eičettokseh sih, mi vuottau teidy taivahis. Täh nad'oužah näh työ kuulitto jo toven sanas, jevangelies,6kudai tuli teijän luo. Juuri muga kui kaikkiel muailmas se sana tuou andimii da leviey, muga se ruadoi teijängi keskes sit päiväs lähtijen, konzu kuulitto sen da tiijustitto Jumalan hyvyön juuri moizennu, mittuine se toven on.7Epafras, kudamas työ sen kuulitto, on meijän kallis ruadovelli da surematoi Hristosan käskyläine teijän hyvyökse.8Häi saneli meile suvaičukseh näh, kudaman Hengi nostatti teis.
9Sendäh, sit päiväspäi, konzu kuulimmo täs kaikes, myögi heittelemättäh molimmokseh teijän puoles da kyzymmö teile äijän Hengespäi tulluttu mielevytty da ellendysty, gu työ tiijustazitto loppuh suate Jumalan tahton.10Molimmokseh, gu työ eläzittö Ižändäle kunnivokse, kaikes Hänele mieldy myö, da gu tuozitto andimii kaikenjyttymäl hyväl ruavol da kazvazitto Jumalan tundemizes.11Anna Hänen taivahallizen valgien vägi kaikkeh luaduh lujendau teidy, gu työ tirpazitto da kestäzittö kaikes.12Hyväl mielel kiitäkkiä Tuattua, kudai luadii teidy pädijöikse suamah sen kodivuitin, kudai roih jumalanuskojile valgien valdukunnas.13Häi piästi meidy pimien vallas da siirdi meidy oman armahan Poijan valdah.14Poijan täh myö piäzemmö välläle - meijän riähkät meile prostitah.15
Häi on nägymättömän Jumalan nägyjy kuva,
enzimäine, rodinuhes enne kaikkie luajittuu.16Hänen kauti on kai luajittu,
midä on taivahis dai mual,
nägyjy dai nägymätöi,
valdusijat dai herruot,
vallat dai väit –
kai on luajittu Hänen kauti
da Häneh niškoi.
17Häi oli enne kaikkie muudu,
i Hänes kai pyzyy tukus.
18Häi on rungan piä,
a rungu on uskojien kanzukundu.
Häi on algu.
Häi enzimäzikse nouzi kuollielois,
gu olla kaikes enzimäzenny.
19Jumal kačoi hyväkse,
gu Hänes olis kai Jumalan täydehys,20da gu Jumal, Hänen ristan verel rauhan luadihuu,
Hänen kauti tuos iččehke sobuh kai,
midä on mual dai taivahis.
21Työgi olitto enne vierahat da vihamielizet Jumalale teijän pahoin ruadoloin täh.22A nygöi, konzu Hristos omas rungas tirpi kuolendutuskat, Jumal tuli sobuh teijänke, gu azettua teidy pyhänny, vijattomannu da viäryöttömänny iččeh edeh.23Teil vai pidäy seizuo lujannu uskon alustal, ei ni lekahtuakseh sit nad'oužas, kudai rodih teis jevangelien kuultuu. Tämä jevangelii on saneltu kaikile luajittuloile taivahan al, a minä, Puavil, rodiimmos sen ruadajakse.
24Nygöi olen hyväs mieles, gu tirpan gor'ua teijän hyvyökse. Midä Hristosan ahtistuksis vie ei tävvy, sen minä täytän omas rungas Hänen rungan hyvyökse. Hänen rungu on uskojien kanzukundu.25Minus on roinnuh sen ruadai, konzu Jumal omien tahtoloin mugah andoi minule ruavokse loppuh suate sanella teile Hänen sana,26net peittomielet, kudamat oldih salvačis aijoin alluspäi, polves polveh, i kudamat Jumal nygöi avai Hänen uskojile.27Häi tahtoi, gu hyö tiijustettas, mittuine kummansuuri on tämä kaikile rahvahile avattavu peittomieli: Hristos eläy teijän keskes*a, i sikse teidy vuottau taivahalline valgei.28Häneh näh myö sanelemmo, myö n'evvommo da opastammo jogahistu kaikel mielevyöl, gu azettua joga ristikanzu Jumalan edeh vadrastunnuonnu Hristosas.29Sih niškoi minä murran da ponnistelemmos kaikel Hänen väil, kudai ruadau minus.
*a 1:27 Sanat «Hristos eläy teijän keskes» voibi kiändiä sežo «Hristos eläy teis».
Глава 1